Մի քանի օր առաջ կոռուպցիայի դեմ պայքար հռչակած վարչապետի քթի տակ տեղի է ունենում կոռուպցիայի դասական, ցնցող օրինակ...

Հետք պարբերականը գրում է, որ ինչ որ մարդիկ մտել են Գառնի գյուղի բնակիչ Արուսյակ Այվազյանի դեղատուն եւ սպառնալիքներ տեղացել: Արուսյակը մյուս գառնեցիների հետ պայքարում է Ազատ գետի ջրերը տանելու որոշման դեմ: Նա տեսել է այն մեքենայի համարանիշը, որով ժամանել են այդ մարդիկ՝ 01 TP 001, ճանաչել է նրանց, նրանցից երկուսը դեպքից երեք օր առաջ Գառնի էին եկել ՀՀ ԳՆ ջրային տնտեսության պետական կոմիտեի նախագահ Արամ Հարությունյանի, Կոտայքի մարզպետ Կարապետ Գուլոյանի եւ այլոց հետ: Նա հայտնել է ոստիկանություն, որտեղից բնականաբար արձագանք չկա: Մեքենայի համարանիշից երեւում է, թե ինչ «կռուդների» մարդիկ են սպառնացել տիկնոջը:
Գառնի գյուղի բնակիչները պայքարում են կառավարության այդ որոշման դեմ: Գառնեցիների դեմ միավորվել է պետական-գողական ապարատը, ծանր տեխնիկա են մտցրել Ազատ գյուղի կիրճ: Այդ տեխնիկան արդեն հասցրել է ավերներ գործել կիրճում: Մասնագետները նշում են, որ այս ծրագրի իրագործման դեպքում խախտվելու է Գառնիի կիրճի, ինչպես նաեւ շրջակա այլ տարածքների էկոհամակարգը:
Ջուրը ցանկանում են տանել Արարատյան դաշտավայր, ինչպես պարզել է լրագրողական հետաքննությունը՝ ինչ որ մասնավոր հողատարածքներ ու ջերմոցային տնտեսություններ ոռոգելու համար: Ընդ որում, խոսակցություն կա, որ այդ հողատարածքների մի զգալի մասը պատկանում է անձամբ վարչապետ Հովիկ Աբրահամյանին ու նրա ընտանիքին:
Դատելով նրանից, որ գործի մեջ խառնված են Հովիկ Աբրահամյանի որդու բաջանաղը, պետական պաշտոնյաներն ու կրիմինալը, այդ տեղեկությունները ճիշտ են, քանի որ այս մարդիկ հետեւողական են միայն այն հարցերում, որոնք վերաբերվում են իրենց անձնական շահերին:
Այս ծրագիրն իրագործվում է համաշխարհային բանկի տված վարկով: Այսինքն, վերցվում է վարկ, որի տոկոսները մարելու են ՀՀ քաղաքացիները եւ մասնավորապես Գառնի գյուղի բնակիչները, ավերում են էկոհամակարգը եւ տանում են գառնեցիների ջուրը վարչապետի ու նրա մերձավորների սեփական տարածքները ջրելու համար:
Մի քանի օր առաջ կոռուպցիայի դեմ պայքար հռչակած վարչապետի քթի տակ տեղի է ունենում կոռուպցիայի դասական, ցնցող օրինակ՝ պետական լծակները եւ պետական վարկերն օգտագործվում են չինովնիկների եւ նրանց մերձավորների հարստացման համար: 

Աղբյուր՝lragir.am