Հետախույզներն իրենց գործը շատ թե քիչ արել են, բայց հետախուզությունը հետևություն արել է թե ոչ` Աստված գիտի. Վարդանովը համացանցում տարածված տեսանյութի մասին

Արդեն մի քանի օր է, ինչ համացանցում տեսանյութ է տարածվել, որտեղ երևում է թշնամու տեղաշարժը: Հակառակորդի մոտեցումը նկատելով` հայկական կողմի դիրքապահները անընդհատ կապ են տալիս` փորձելով զգուշացնել և կրակ բացելու թույլտվություն ստանալ, սակայն կապը չի ստացվում:

Fnews.am-ի հետ զրույցում նախկին հետախույզ Վովա Վարդանովը նկատեց, որ այդ տեսանյութը խոսում է միան այն մասին, որ դիտակետում նստած անձնակազմը քնած չի եղել և ուրիշ ոչինչ չի ասում:
«Շատ հասարակ, տեխնիկական նյութ է, որի վրա ոչ մի լուրջ մեկնաբանություն չես կարող անել: Դա ուղղալի խոսում է այն մասին, որ մեր հետախույզ տղերքը, ովքեր գիշերային դիտարկում են անցկացրել, նկատել են հակառակորդին և համապատասխան գործողությունների դիմել` զգուշացնելով կողքի դիրքերին»,-նկատում է նախկին հետախույզը:

Նա չի բացառում, որ այդ տեսանյութը կարող է նաև ֆեյք լինել: Վովա Վարդանովի դիտարկմամբ` իրենից խնդիր չէր ներկայացնի այն, որ 30-40 հոգու խնդրեն գիշերով անցնել մի տարածքով ու նկարեն դա: Ըստ հետախույզի, եթե դա ֆեյք է, ուրեմն առավել ևս լուրջ մեկնաբանության կարիք չունի:

Մյուս կողմից էլ նրա կարծիքով` ֆեյքը ինքնանպատակ չի լինում, մինչդեռ այս տեսագրությունը ոչինչ չասող նյութ է ու ոչ մեկի դեմ ուղղված չէ: Նույնիսկ չի երևում հակառակորդը շո՞ւտ է հայտնաբերվել, թե՞ ոչ:
«Տեսանյութում, դիտարկման հենց առաջին պահերին արդեն, 40 մարդ գնում էին առջևից, ու պարզ չէ թե նրանց իրականում ե՞րբ են հայտանբերել… դա չի երևում»,- ասում է Վովա Վարդանովը` ընդգծելով, որ թշնամուն տեղաշարժը պետք է նկատել մի քանի կիլոմետրից, ոչ թե խրամատի կողքին, որն արդեն հնարավոր չէր չնկատել:

Նա պարզաբանում է, որ ամեն մի հետախույզ իր տեսնելու և լսելու դաշտն ունի. մեկը 20 կմ հեռավորության վրա դիտարկում է անցկացնում, մյուսը որոշ հեռավորության վրա լսում է, իսկ մեկ ուրիշը գործակալների միջոցով 100 կմ-ի վրա տեղեկություն է հավաքում և այստեղ խնդիրը հետախույզների թերացման մեջ չէ, նրանք իրենց գործը լավ են արել:
«Խոսքը գնում է նրա մասին, որ հետախույզները տեսել են, բայց վերլուծողները ճիշտ չեն վերլուծել… մի քանի տեղ շարժ են նկատել ու համապատասխան զեկուցում չի արվել և ներկայացվել հրամանատարին, որպեսզի վերջինս ճիշտ որոշում կայացնի: Խնդիրը դրա մեջ է, որ հետախույզը տեսել է: Հետախույզներն իրենց գործը շատ թե քիչ արել են, բայց հետախուզությունը հետևություն արել է թե ոչ, Աստված գիտի»,- ասում է նախկին հետախույզը` նկատելով, որ հետախուզության ճիշտ հետևության վրա է հրամանատարը որոշում կայացնում: Միաժամանակ նա նկատում է, որ այդ որոշումները ապրիլյան քառօրյաի ժամանակ այնքան էլ ճիշտ չեն եղել ու ադեկվատ: