«Մինչև երկիրը «սիմպատիչնի» չդառանա, կունենանք մարդիկ, ովքեր անդադար կպայքարեն և անդադար էլ գլուխները կխփեն պատին»

Ռեժիսոր Աշոտ Ադամյանը կոռուպցիայի դեմ պայքարին չի հավատում: «Կոռուպցիոները հայտարարում է, որ ինքը կոռուպցիայի դեմ պայքարելու է. ասես` տո սուտլիկ որսկան, ձենդ կտրի վեր ընկի տեղդ… մենք հո մեզ չե՞նք խաբելու, ամբողջությամբ կոռումպացված համակարգում ենք ապրում. ուզում ենք ենթադրել, որ մարդ ազնվորեն կարող է մխրճվել համակարգի մեջ և ուղղե՞լ. չի կարող…»,-Fnews.am-ի հետ զրույցում նկատեց Աշոտ Ադամյանը:
Նրա կարծիքով ծայրից ծայր կոռումպացված համակարգ է: Ու մինչև պայքարի ելած մեկը ծայրաեղ միջոցների չդիմի, կամ գործարքներ չկնքի, չի կարող պայքարել դրա դեմ:
Ըստ Ադամյանի` մենաշնորհները բացառիկ են գործում: Այն, որ երկրում այսօր արտագաղթը զգալի չափերի է հասնում դա ևս, ըստ նրա, կոռուպցիոն դրսևորումների և իշխանության նկատմամբ անվստահության հետևանք է:
«Եթե նույնիսկ ինչ-որ մեկը էսպես նվիրվել ու պայքարում է, դա էլ է հետևանք. Ամբողջ այդ կծիկը մենք ունեցել ենք, ունենք և քանի դեռ երկիրն այսպիսի ավազակային կառավարություն ունի, այդ ամենը ունենալու ենք անդադար, ան-դա-դար, մինչև երկիրը չդառնա «սիմպատիչնի»:
Ոչ թե, որ բոլորն ընկնեն իրենց մայրիկների փորը, այլ որ երկիրը հաճելի լինի, ձգողական հմայք ունենա»,-ասում է արվեստագետը` պարզաբանելով, որ խոսքը վերաբերում է, ոչ թե մշակութային արժեքներին, այլ երկրին` որպես պետության:
Իսկ քանի դեռ դա չկա, Աշոտ Ադամյանի կարծքով, Հայաստանում կլինի արտագաղթ և դժգոհություն:
«Մինչև երկիրը «սիմպատիչնի» չդառանա, կունենանք մարդիկ, ովքեր անդադար կպայքարեն և անդադար էլ գլուխները կխփեն պատին. Աստված տա հասնեն արդյունքի, հակառակ դեպքում` այս ամենը կծիկի է նման , ինչը եւ մենք մշտապես կունենանք»,-նկատում է Ադամյանը: