Չարաշահումները ոչ թե ստվերում, այլ շա~տ լուսավոր տեղերում են, ու եթե վարչապետը ցանկանար` արդեն վաղուց և շատ արագ այդ չարաշահումները բացահայտած կլիներ...

Կառավարության որոշումը անհիմն է և ծիծաղելի, որն անեծքի է արժանի

Կառավարության երեկվա նիստում վարչապետ Հովիկ Աբրահամյանը հայտարարել է, թե սոցիալական փաթեթների հանգստի բաղադրիչը ժամանակավորապես կկասեցվի, քանի որ այս բաղադրիչում չաշահումներ են եղել: Երևանի ավագանու «Բարև Երևան» խմբակցության անդամ Անահիտ Բախշյանը կառավարության այս որոշումն համարում է անհիմն և ծիծաղելի:

Նա Fnews.am-ի հետ զրույցում նշեց, որ դա հերթական անազնիվ քայլն էր այն խավի նկատմամբ, ում կառավարությունը սոցիալական փաթեթ է հատկացնում` հանգստի համար: Անահիտ Բախշյանը հանգստի բաղադրիչը ժամանակավորապես կասեցման համար` լուրջ հիմնավորումներ չի տեսնում: «Այդ չարաշահումները բացահայտելու համար հանգստի բաղադրիչը կասեցնելը պարզապես ծիծաղելի է»,-ասում է մեր զրուցակիցը, ում համոզմամբ կասեցման համար այդ չարաշահումը պետք է համատարած բնույթ կրեր, այսինքն առկա լիներ յուրաքանչյուրի դեպքում, ինչը, սակայն Անահիտ Բախշյանը քիչ հավանական է համարում, քանի որ գիտի շատ մանկավարժների, ովքեր ազնվորեն գնում են իրենց նախընտրած հանգստան վայրն ու 5 օր հանգստանում: «Ասեմ ի դեպ, որ այդ մանկավարժներն իրենց հանգստի համար օրհնում են կառավարությանը…

Չարաշահումները ոչ թե ստվերում, այլ շա~տ լուսավոր տեղերում են ու եթե վարչապետը ցանկանար` արդեն վաղուց և շատ արագ այդ չարաշահումները բացահայտած կլիներ…այդ բաղադրիչի արդյունավետությունը կբարձրանար ու նրանք էլի օրհնանքի կարժանանային, իսկ հիմա համատարած անեծքի են արժանանալու, քանի որ ` բոլոր այն մարդիկ, ովքեր օգտվում էին այդ հանգստյան բաղադրիչից ու հաջորդ տարի արդեն զրկվելու են դրանից 3 տարի ժամկետով` անիծելու են կառավարությանը»,-ասում է Անահիտ Բախշյանը: Նրա դիտարկմամբ` չարաշահումների բացահայտումն ու փաթեթը կասեցնելը պատրվակ էր ավելորդ անգամ բարձրաձայնել, թե իբր կառավարությունը պայքարում է կոռուպցիայի դեմ: «Կառավարությունը կարող էր ազնվորեն ասել, որ ժողովուրդ ջան, քաղծառայողներ ջան, մանկավարժներ ջան մենք դժվար կացության մեջ ենք, բյուջեն ճեղքվածք ունի և պատռվել է արդեն ու ստիպված ենք այդ քայլին դիմել. մենք ձեզնից այդ մասն ենք վերցնում ու մենք էլ ամբողջ կառավարությունով պարտավորվում ենք մեր աշխատավարձի 10-20 տոկոսը չվերցնել, այսինքն իջեցնում ենք մեր աշխատավարձի չափը: 

Այդ դեպքում ուսուցիչները գուցե հանուն մեր պետության, հանուն տնտեսական վիճակի բարելավման ու բյուջեյի պատռվածքը փոքրացնելու` ասեին ոչինչ դե մի կերպ յոլա կգնանք…»,-ասում է Անահիտ Բախշյանը: Նա կառավարության այս գործելակերպին իր բնութագրումն է տալիս: Անահիտ Բախշյանի որակմամբ` սա կառավարության կողմից հերթական թալանն էր: «Սա նշանակում է օրը ցերեկով մարդկանց գրպանը մտնել ու այդ գումարը գողանալ… սա թալան է` կառավարության մակարդակով, որը կառավարությունը հիմնավորում է նրանով, թե կոռուպցիայի դեմ են պայքարում: Մանկամիտ, ծիծաղելի հիմնավարում է, որ անեծքի է արժանի»,-ընդգծեց Անահիտ Բախշյանը: