Նրանք պետք է գոյատևեն ու եկել են Երևան՝ մուրացկանությամբ զվաղվելու, իսկ այստեղ բոլորը ճանաչում են իրենց…

Օրեր առաջ լրատվական կայքերում տարածվեց մի տեսանյութ, որտեղ վարչապետ Կարեն Կարապետյանը մոտեցավ իր մեքենայի մոտ կանգնած 2 կանանց, վերցրեց նրանց դիմումն ու խոստացավ այդ հարցին հետամուտ լինել:

ՈՎՔԵՐ ԵՆ ՀԱՅՏՆԻ ԿԱՆԱՅՔ 

Fnews.am-ըփորձեց պարզել, թե ովքե՞ր են այդ կանայք և ի՞նչ եղավ նրանց հետ: Նրանք մայր ու աղջիկ են` 60-ամյա Սվետա Դավթյանն ու 39-ամյա Կարինե Ավետիսյանը։

Fnews.am-ի հարցին ի պատասխան` Սվետա Դավթյանը, դժգոհեց, թե ինչու է կառավարությունը իրենց մարզպետի մոտ ուղարկել. «մարզպետի տեղը մենք էլ գիտենք… քաղաքապետին էլ, մարզպետին էլ վաղուց մոտեցել ենք, բայց մինչև էսօր թափառականի նման ենք ապրում, ոչ մի բանով չեն օգնել…»,- ասաց Սվետան: Կանայք պատմում են, որ իրենք Գավառ քաղաքից են: Նրանք վստահեցնում են, որ իրենց տունը թալանել են, իսկ իրենց` տնից «վռնդել»: «Մենք ամեն ինչ ունեցել ենք, աղջիկ ջան, էսօրվա օրով տուն չունենք, Հոկտեմբերյանում ենք մնում, կամ որտեղ մթնում է. դարձել ենք թափառական: Մեզ ասում են մարդասպան ենք ու գիժ: Գիժ ու մարդասպանն իրենք են, որ մեր տունը թալանեցին ու մեզ փողոցները գցեցին»,-ասում է տիկին Սվետան, չպարզաբանելով, թե ովքեր են իրենց տունը թալանել: «Չգիտենք ովքեր են… եկան տարան-տարան, սաղ տունը սրբեցին տարան, հիմա էլ Գավառի ոստիկանությունը մեզ ուզում ա բռնի … մենք էլ Գավառ չենք գնա…»,-ասաց տիկին Սվետան` դարձյալ չբացելով փակագծերը ու չպարզաբանելով, թե ինչու է ոստիկանությունը հետապնդում իրենց: Սվետայի դուստրը` Կարինեն էլ նշեց, թե իրենք հատկապես դժգոհ են Արթուր Գնդոյանից: Թե ո՞վ է Արթուր Գնդոյանը և ինչո՞ւ գավառցիները «չեն սիրում» Սվետային ու Կարինեին, փորձեցինք պարզել ինքներս, քանի որ կանանց տարօրինակ պահվածքն անհասկանալ էր, ու այդպես էլ սպառիչ պատասխաններ չստացանք: Պարզվում է Արթուր Գնդոյանը ՆԳՆ-ում զբաղվում է անչափահասների գործերով: Այդ մասին մեզ տեղեկացրեցին Գավառի ոստիկանությունից:

Ի դեպ, լրատվամիջոցներից մեկի հետ զրույցում Կարինեն ասել էր, թե Արթուր Գնդոյանը իրեն սեռական բնույթի առաջարկություն է արել: Մեզ հետ զրույցում ոստիկանության աշխատակիցը լսելով «մեղադրանքը»` ծիծաղեց: «Ի՞նչ… (ծիծաղում է), Արթո՞ւրը… չէ, Արթուրը հաստատ նման բան չէր անի, դուք պարզապես նրան չեք ճանաչում: Նա շատ պատասխանատու, իր գործը կատարող ու աշխատասեր մարդ է. Ո՞նց կարող է նա իրեն նման բան թույլ տալ, նա մակարդակով անձնավորություն է.. չէ, չէ` հաստատ չէ…»,-ասաց ոստիկանության աշխատակիցը: Նա պարզաբանեց, որ կանայք 2005 թվականից հաշվառված են հոգեկան առողջության կենտրոնում և իրենց մոտ։ «Նրանք քարերով ու դանակով վախեցնում են անցորդներին, հարևաններին: Պատկերացրեք, որ նրանց տեսնելիս` մարդիկ իրենց ճանապարհը փոխում են. Վախենում են նրանցից… հարձակվել են նաև երեխաների վրա: Արթուր Գնդոյանն էլ, քանի որ անչափահասների բաժանմունքի պետն է, նա զբաղվել է այն երեխաների գործերով, որոնց անպատվել են, նա կողմերի հետ բացատրական աշխատանքներ է տարել»,-ասաց մեր զրուցակիցը:

Այս լուրը հաստատցին նաև հարևաններից երկուսը, ովքեր չցանկացան ներկայանալ: Նրանցից 12-ամյա երեխան, լսելով կանանց անունները, պարզապես սկսեց ծամծմել բառերն ու վախվորած պատմեց, որ նրանք միշտ իր և բակի մյուս երեխաներին հետևից են ընկել, որ կանայք «գիժ են»: Վախենում են նրանցից, քանի որ քարերով հարձակվում են: Մեր մյուս զրուցակիցը` տիկին Ն. Մ.-ն ասաց, որ նրանց աշխատել են չհանդիպել փողոցում, քանի որ վախենում են: Իսկ տունն էլ ամբողջությամբ աղբանոցի էին վերածել, քաղաքապետարանից եկել ու իրենց խնդրանքով մաքրել են: Բնակիչները նշեցին, որ 2-3 տարի է, ինչ կանայք չեն երևում:

Գավառի փոխքաղաքապետ Գրիգոր Բոշյանն էլ, Fnews.am-ի հետ զրույցում նշեց, որ բազմիցս բողոքներ են եղել շենքի բնակիչներից, քանի որ տունն ամբողջությամբ աղբով էր լցվել ու խոլերիայի բույն էր դարձել: Նա պարզաբանեց, որ կանայք ոչ թե մեկ, այլ այս պահին նույնիսկ 2 բնակարան ունեն: Նույն շենքի 3-րդ և առաջին հարկերում: 3-րդ հարկի բնակարանը նրանք փակել-գնացել են, այն ի սկզբանե պատկանել է հենց մայր ու աղջկա, իսկ առաջին հարկի բնակարանը չունի դուռ և լուսամուտ: Դա պատկանել է Սվետայի մահացած քրոջը, և նրա մահից հետո հանդիսանում է կանանց սեփականությունը: Հենց այդ տունն էլ, քաղաքապետարանի ջանքերով, մաքրվել է «կեղտից», ինչը Սվետան ու Կարինեն որակում են` «թալան»: «Ես ոչինչ կարող եմ չասել, եթե դուք գաք ինքներդ էլ կարող եք տեսնել ու նկարել, թե ինչ վիճակում է այդ տունը: Դեռ Սվետայի քրոջ կենդանության օրորք տունը վերածվել էր աղբանոցի. Պատուհանները ջարդված էին, կատուներ էին մտնում-դուրս գալիս: Բնակիչների ստորագրահավաքությամբ կազմվեց հանձնաժողով և կատարվեց գույքագրում: Մենք 3 մեքենա աղբ ենք հանել բոլորի աչքի առաջ, ունենք նաև լուսանկարներ: Այդ ժամանակ իրենց էլ առաջարկեցինք գալ մասնակցել, բայց հրաժարվեցին: Նրանք թողեցին ու գնացին քաղաքից, չեկան նաև քրոջ մահվան ժամանակ: Քաղաքապետարանն է կազմակերպել է Սվետայի քրոջ հուղարկավորությունը…»,-պարզաբանեց փոխքաղաքապետը:

Նրանք պետք է գոյատևեն ու եկել են Երևան՝ մուրացկանությամբ զվաղվելու, իսկ այստեղ բոլորը ճանաչում են իրենց…

Թ՞ե ինչն է վախեցնում Գավառում կանանց, որ նրանք հրաժարվել են բնակարաններից ու դարձել են թափառական, հարցին ի պատասխան, Գրիգոր Բոշյանը նկատեց. «Կարծում եմ, ոչ թե վախենում են գալ, այլ այդպես են նպատակահարմար գտնում. Նրանք պետք է գոյատևեն ու եկել են Երևան՝ մուրացկանությամբ զվաղվելու, իսկ այստեղ բոլորը ճանաչում են իրենց… ոչ թե իրենք` այլ հարևաններն են իրենցից վախենում»,-ասաց Գրիգոր Բոշյանը: Ի դեպ, եթե կանայք իսկապես վտանգավոր են, ապա ինչո՞ւ հիմա հոգեբուժարանում չեն, հարցի պատասխանը մենք այդպես էլ չստացանք մեր զրուցակիցներից: Իսկ Սևանի հոգեկան առողջության կենտրոնի տնօրեն Գագիկ Կարապետյանը, լսելով հարցը, պարզապես անջատեց հեռախոսը, և մեզ այդպես էլ չհաջողվեց այլևս նրա հետ կապ հաստատել:

Մենք կփորձենք ներկայացնել նաեւ Սեւանի հոգեբուժարանի պարզաբանումները՝ հասկանալու թե որքանով են այս կանայք վտանգավոր հասարակության համար, իսկ եթե վտանգավոր են՝այդ դեպքում ինչու են նրանք համապատասխան բուժումներ ստանալու փոխարեն դրսում , եւ ինչու են իրենց իսկ խոսքերով ասած՝դաևձել թափառական:

Ա. Սահակյան