«Քաղաքականության մեջ երբեք չպետք է ասել երբեք…».Մկրտիչ Մինասյանը՝Գագիկ Ծառուկյանի քաղաքականություն վերադառնալու եւ նոր կառավարության մասին

«Քաղաքականության մեջ երբեք չպետք է ասել երբեք… կյանքն ինքը ցույց կտա»: Fnews.am-ի հետ զրույցում նկատեց ԱԺ ՀՀԿ խմբակցության պատգամավոր Մկրտիչ Մինասյանը` անդրադառնալով Բարգավաճ Հայաստան կուսակցության նախկին նախագահ Գագիկ Ծառուկյանի հնարավոր վերադարձին:
Հիշեցնենք, որ ԲՀԿ նախկին նախագահ Գագիկ Ծառուկյանը հայտարարել էր, որ եթե անհրաժեշտություն լինի, եթե դրա կարիքը լինի` դարձյալ կբացի քաղաքականության ծալած էջը:
«… Թող քաղաքական գործիչներն իմանան, որ Ծառուկյանը նենգ մարդ չի, կամեցող ա, ներող ա… ես բոլորին ներում եմ»,-հայտարարել էր Ծառուկյանը: Մկրտիչ Մինասյանի խոսքով` եթե Գագիկ Ծառուկյանի կուսակիցները, այն միջավայրը որտեղ նա եղել է, հայտ, պահանջ ներկայացնեն` նրան վերադարձնելու համար, ապա հնարավոր է Ծառուկյանը վերադառնա քաղաքականություն:

«Ծառուկյանն ինքնը պետք է որոշի հասարակական ու քաղաքական պահանջ կա՞, թե՞ ոչ: Քաղաքականության մեջ երբեք չպետք է ասել երբեք… շատ հնարավոր է, որ նա վերադառնա: Դա և' իրենց գաղափարախոսության, և' իրենց քաղաքական դրսևորման ձևն է»,-ասաց իշխող կուսակցության ներկայացուցիչը:
Դիտարկմանը, թե ավելի քան մեկ տարի առաջ իշխող կուսակցության ներկայացուցիչները Ծառուկյանին, մեղմ ասած, «վտարեցին» քաղաքականությունից, իսկ այսօր հանգիստ խոսում են նրա վերադարձի մասին, հանրապետական պատգամավորը նկատեց, որ այն ժամանակ ստեղծված իրավիճակն այդպես էր պահանջում: «Հանրապետականները չեն, որ պետք է թողեն կամ չթողեն, ընդունեն կամ չընդունեն: Ծառուկյանին ընդունում է կուսակցական այն զանգվածը, որը հանրապետական կուսակցության մեջ չէ, և որը որդեգրել է իրեն Բարգավաճ Հայաստանի քաղաքական գիծը: Ճիշտ է` հանրապետականներից և այլ կուսակցություններից նրան քննադատել են, կամ ինչ որ խոսք են ասել, բայց դա բոլորովին այլ բան է:

Տվյալ իրավիճակում նրա գործունեությունը նման ձևով գնահատման պահն է եղել: Հիմա էլ, եթե կյանքը ցույց կտա, որ հասարակական ու քաղաքական պահանջ կա, և ինքն էլ կգտնի, որ իր վերադառնալով կուսակցությունը կարող է ուժեղ ու հզոր լինել` դա իրենց խնդիրն է»,-նշեց Մկրտիչ Մինասյանը` հավելելով, որ հանարապետական կուսակցությունը իր և երկրի առաջ ծառացած խնդիրներով պետք է զբաղվի:

Թեև հանրապետական պատգամավորը տարբեր առիթներով անդրադարձել է այս հարցին, սակայն ևս մեկ անգամ հարկ համարեց նկատել, որ կառավարության փոփոխությունները կնպաստեն մեր երկրի առջև ծառացած խնդիրները լուծել արդյունավետ ու արագ տեմպերով: «Հույս ունեմ և վստահ եմ, որ վարչապետի կողմից, երկրի նախագահի հանձնարարությամբ և պահանջով իրականացվող քաղաքականությունը իր արդյունքները տալու է, և մենք էլ ձեզ հետ միասին տեսելու ենք: Պարզապես, անհրաժեշտ է որ մեր ժողովուրդը, հանրությունը, և քաղաքական ուժերը լինեն ավելի զգոն և յուրաքանչյուր պարզաբանում կատարեն սրբորեն: Այդ դեպքում մեր երկրի առաջ դրված խնդիրները ավելի արդյունավետ կլուծվեն: Մենք այլ ճանապարհ չունենք…»,-ընդգծեց հանրապետական պատգամավորը և ավելացրեց. «Մենք այնպիսի տարածքում ենք ապրում և այնպիսի աշխարհաքաղաքական կիզակետում ենք, որ դատապարտված ենք այս հատվածում պաշտպանել խաղաղություն ու մեր ոխերիմ հարևաններին խաղաղություն պարտադրել… դրա համար ամեն ինչից բացի հարկավոր է նաև երկրի տնտեսության արդյունավետ զարգացում և հզորացում»:

Ա. Սահակյան