«Ջերմուկ գրուպի» նոր գործարանը ռոբոտացված է, արտահանման ծավալներն էլ երկու անգամով ավելացել են. տնօրեն
Դեկտեմբերի 12-ին Ջերմուկում տեղի ունեցավ «Ջերմուկ գրուպ» ընկերության նորակառույց գործարանի բացման հանդիսավոր արարողությունը, որին մասնակցում էր նաև Հանրապետության Նախագահ Սերժ Սարգսյանը:
Նախագահը շրջեց գործարանում, ծանոթացավ իրականացված ներդրումներին, գործարանի արտադրական հզորություններին և «Ջերմուկ գրուպ»-ի զարգացման ծրագրերին: Գործարանի կառուցման նպատակով կատարվել է մոտ 5 մլրդ դրամի ներդրում, որից միայն 3,4 մլրդ դրամն ուղղվել է ժամանակակից սարքավորումների ձեռքբերմանը:
«Ջերմուկ գրուպի» տնօրեն Վահագն Արսենյանը լրագրողների հետ զրույցում ասաց, որ հին ու նոր գործարանները միավորել են, գործարանը հագեցած է գերժամանակակից սարքավորումներով և ամբողջովին ռոբոտացված է:
Անդրադառնալով արտադրանքի ծավալներին՝ Վահագն Արսենյանն ասաց, որ դրանք երկու անգամ ավելացել են, իսկ նոր գործարանը հիմնականում նախատեսված է արտահանվող ապրանք արտադրելու համար.« «Ջերմուկ գրուպն» ու մայր գործարանը միացել են մեկ տարուց ավել է, ընդամենը մեկ տարում այս գործարանը զրոյից կառուցվել է: Այսօր արտադրանքի 50% արտահանում ենք ունենում, պետք է մաքսիմալացնել, ավելացնել, որովհետև հին գործարանը բավականացնում էր տեղական շուկային»:
Տնօրենի խոսքով՝ արտահանման հիմնական մասը՝ 40%-ը, արտահանվում է Ռուսաստան, իսկ 2015-ից հետո արտադրանք է արտահանվում Չինաստան, «Ջերմուկ գրուպը» որոշ քանակով արտադրանք է արտահանում Արաբական Միացյալ Էմիրություններ:
Tert.am-ի հետ զրույցում «Ջերմուկ գրուպի» արտադրության տնօրեն Դանիել Ղևոնդյանն ասաց, որ գործարանը երկու տեսակի արտադրանք ունի՝գազավորված հանքային ջուր և մշակված խմելու ջուր՝ «Բյուրեղ», որն աղբյուրից միանգամից հասնում է գործարան:
Ղևոնդյանը նշեց, որ ջուրն իր ֆիլտրման պրոցեսն անցնում է ամենաբարձր տեխնոլոգիաների միջոցով, «դրանից այն կողմ այլ տեխնոլոգիա չկա».«Ունիկալ է նաև օզոնացման սարքը, որը շատ բարձր կարգի վերահսկման տակ է պահում ջուրը և այն զերծ է պահում ցանկացած աղտոտվածությունից: «Ջերմուկը» զինված է ամենագերժամանակակից տեխնոլոգիաներով և հնարավորություններով»:
Արտադրության տնօրենն ասաց, որ «Ջերմուկը» արտահանվում է ԱՄՆ և մի շարք այլ երկրներ, որոնց չափանիշներին հանքային ջուրը համապատասխանում է, և քայլեր են ձեռնարկվում «Բյուրեղի» արտահանման համար:
Լաբորատորիայի որակի մասնագետ Հասմիկ Պողոսյանն էլ Tert.am-ի հետ զրույցում ասաց, որ «Ջերմուկ գրուպը» միշտ էլ հագեցած է եղել գերժամանակակից սարքավորումներով և միշտ աշխատել են լավագույն սարքավորումներ արտադրողների հետ. «Մենք անընդհատ հետևում ենք նորություններին, և գնալով ավելի ենք կատարելագործվում, որպեսզի ավելի որակով կարողանանք կատարել մեր գործը, որը «Ջերմուկ գրուպի» որակի երաշխավորն է»:
Նշենք, որ վերաբրենդավորման արդյունքում փոխվել են «Ջերմուկ» և «Բյուրեղ» ապրանքանիշերով ապրանքների շշի ձևերը, պիտակները և ապրանքային նշանը: Ընկերությունը ներկայումս արտադրում է տարեկան 60 մլն շիշ ջուր: