Վիրավորանքի և զրպարտության գործերով դրական պրակտիկան շարունակվում է, լրագրողների գործերով՝ ոչ. Արա Ղազարյան

Իրավաբան Արա Ղազարյանը, Tert.am-ի հետ զրույցում ամփոփելով 2016 թվականը` մարդու իրավունքների պաշտպանության առումով, նշեց, որ կան ոլորտներ, որտեղ առաջընթացներ է գրանցվել, կան ոլորտներ որտեղ ձեռքբերումները պահպանվել են, իսկ որոշ ոլորտներում էլ գրանցվել է հետընթաց:

«Շարունակվում է դատական դրական պրակտիկան վիրավորանքի և զրպարտանության գործերով, մասնավորապես լրատվամիջոցների դեմ դատարանները պահպանում են համաչափությունը՝ հասկանալով, որ հասարակական շահ կա»,– ասաց նա՝ խոսելով առաջընթացի մասին:

«Արձանագրվել է խտրականության վերաբերյալ առաջին դատական գործերը, վճռաբեկ դատարանը շարունակում է նախադեպային որոշումներ կայացնել, որոնք տարածվում են, Ճանապարհային ոստիկանության խախտումների վարչաիրավական տիրույթում: Բավականին լավ դրական պրակտիկա է սկսվել զարգանալ՝ քաղաքացիների դատավարական իրավունքների հետ կապված և տարվա մեջ բավականին լավ դատական ակտեր են կայացվել»,-ասաց նա:

Ինչ վերաբերում է հետընթացին, ապա Արա Ղազրայանը հետընթաց համարեց լրագրողների նկատմամբ բռնությունները՝ կապված «Սասնա ծռեր»-ի գործունեության օրերին: «Փաստ է մնում, որ տարիներ շարունակ լրագրողների նկատմամբ ֆիզիկական բռնությունների գործով դատական պրակտիկան չի զարգանում: Այսինքն՝ դատարան գործը չի գնում, ինչը արդեն 10 տարվա պրակտիկա է և շարունակվում է»,-ասաց նա:

Իրավաբանը նշեց, որ հիմնականում մարդու իրավունքների պաշտպանության ոլորտը կայուն է, մեծ ձեռքբերումներ չկան, ինչպես նաև փոփոխություններ առանձնապես չկան կոռուպցիոն ռիսկերի առումով:

Tert.am