«Իմ թևերը բաց են ու ես կարողանում եմ թռչել».Լուսին Ղազարյանի «Սեր թևերս» գրքի շնորհանդեսը. PHOTO,VIDEO

Հեղինակի նման բաց, մաքուր, պայծառ ու միևնույն ժամանակ խորը: Այսպես այսօր բնութագրցեին մեր գործընկերուհի՝ լրագրող, բանաստեղծուհի Լուսինե Ղազարյանի «Սեր թևերս» գիքը, մտավորականներն ու նրա բոլոր ընկերներն, ովքեր եկել էին մասնակցելու գրքի շնորհանդեսին: Հեղինակին գրքի ծննդյան առիթով եկել էին շնորհավորելու նրա գործընկերները, մտավորականներ, արվեստագետներ, ազատամարտիկներ, ԵԿՄ անդամներ, և Էջմիածնի քաղաքապետ Կարեն Գրիգորյանը: Բացելով միջոցառումը՝ Ավ. Իսահակյանի անվան կենտրոնական գրադարանի տնօրեն Հասմիկ Կարապետյանը նկատեց, որ գրադարանն ունի թիմ, որը սովորաբար զբաղվում է շնորհանդեսների կազմակերպման գործով ու ներկայացնում հեղինակին, սակայն սա այն եզակի դեպքն է, երբ ինքն անձամբ է ձեռնամուխ եղել միջոցառման անցկացմանը: 

Հասմիկ Կարապետյանը հիշեց, թե ինչպես է առաջին անգամ Լուսինե Ղազարյանը եկել գրադարան և գիրք խնդրել: Հետո նրա այցելությունները դարձել են հաճախակի, իսկ մի պայծառ օր էլ գրադարանում կազմակերպվել է լրագրողի առաջին գրքի շնորհանդեսը: «Սեր թևերս» բանաստեղծությունների հավաքածուն հեղինակի արդեն երկրորդ գիրքն է, որի շնորհանդեսը կազմակերպվում է այս գրադարանում: Գիրքն իր մեջ ներառում է 59 բանաստեղծություն: Այն տպագրվել է ավելի քան 200 օրինակով: Բանաստեղծ Խաչիկ Մանուկյանը, ով նաև Լուսինե Ղազարյանի գրքի խմբագիրն է, ներկայացնելով ստեղծագործությունները նշեց, որ գրքում արծածված են մտքեր ու խոսքեր, որոնք նոր են գրականության մեջ: «Սա նոր ոճ ու նոր խոսք է գրականության մեջ... Բախտավորություն է՝ լինել այսպիսի գրքի խմբագիր, քանի որ կարդում ես գիրքը ու տաք շունչ է գալիս դեմքիդ»,-ասաց նա և հավելեց, որ գիրքը կարող է ուղենիշ լինել երիտասարդների համար՝ գտնելու իրենց սիրո թևերը:

Հրավիրվածներից շատերը տվեցին Լուսինե Ղազարյանի նկարագիրը, որպես մարդու, ընկերոջ և զինակցի: Մի քանիսն էլ ընթերցեցին բանաստեղծուհու գրքի ստեղծագործությունները, եղան նաև երաժշտական կատարումներ: Հեղինակին շնորհավորելու էր եկել նաև Էջմիածնի քաղաքապետ Կարեն Գրիգորյանը: Իր խոսքում նա նշեց, որ հպարտ է ներկա լինելու գրքի շնորհանդեսին: Խոսելով գրքի մասին՝ Կարեն Գրիգորյանն ասաց, որ. «Մեր երկիրը ֆինանսների կարիք չունի, այլ սիրո և հույսի կարիք ունի»։ Կարեն Գրիգորյանը հույս հայտնեց, որ «Սեր թևերս» ժողովածուն կդառնա շատերի սեղանի գիրքը: «Ես շնորհավորում եմ քեզ չհուսահատվելու համար, և որ ուժ գտար քո մեջ այս գիրքը հրատարակելու»,-ասաց Էջմիածնի քաղաքապետը: 

Շնորհանդեսի ժամանակ Լուսինե Ղազարյանը ԵԿՄ վարչության կողմից պարգևատրվեց «Եռասերունդ երկրապահ» մեդալով: Այն Լուսինեին հանձնեց ԵԿՄ լրատվության բաժնի պատասխանատու Վարդան Վարդանյանը: Նա նկատեց, որ Լուսինեն որպես լրագրող, հաճախակի է լինում դիրքերում, հանդիպում զինվորներին ու սահմանամերձ գյուղերի բնակիչներին: Նկատենք, որ Լուսինեն սահմանին եղել նաև ապրիլյան քառօրյայի ժամանակ:

Լուսինե Ղազարյանի ընկեր, գործընկեր ու նրա ընտանիքի լավ բարեկամ, լրագրող Գայանե Զարգարյանն էլ, մեզ հետ զրույցում նշեց, որ կրկնակի հուզված է, բայց նաեւ շատ ուրախ, որ իր լավ ու թանկ ընկերոջ՝ Լուսինե Ղազարյանի երկրորդ «Ծննդյան Տարեդարձ»-ն է, ով այնքան լույս, ջերմություն ու հույս պարգեւեց ներկաներին, իսկ նրա կողմից լույս աշխարհ եկած բանաստեղծությունների ժողովածուն թակեց ժամանակակից գրականության դուռը: 
«Մեր օրերում իսկապես հազվագյուտ է նման հաջողություն արձանագրելը, ու նաեւ այնքան ոգեւորող, որ իմ սիրելի գործընկերուհի, իմ լավ ընկերուհի, բանաստեղծուհի Լուսին Ղազարյանը կարողանում է ապրել ու ապրեցնել, լույս ու խինդ պարգեւել իր ամեն մի տողով, գրչով, իր ասելիքով՝ որն այնքան հարուստ է ու անկաշառ:
Լուսինեի հոգու ներկապնակը իսկապես շատ գունեղ է. այնտեղ ե'ւ կյանք կա, ե'ւ տխրություն, ե'ւ ցավ, ե'ւ թռիչք, ե'ւ բերկրանք… Եվ  ամենակարեւորը` կա ՍԵՐ, որն էլ մարդուն միշտ թեւեր է տալիս: Ուզում եմ նա միշտ «թռչի»՝ իր թեւերով ու այն սիրով, որով նա լցնում է իր շրջապատը»,-իր խոսքում նկատեց Լուսին Ղազարյանի գործընկերուհին: 

Իր մայրիկին խոսք ուներ ասելու նաև Լուսինե Ղազարյանի որդին՝ Արայիկը: Նա գրքի բանաստեղծություններից մեկի հիման վրա գրել էր երաժշտություն: «Բանաստեղծության բառերը մի քիչ փոփոխել էի, ու երբ այս երգն առաջին անգամ կատարեցի մայրիկիս մոտ, ասաց՝ երգիդ մեջ ծանոթ բառեր կան… հետո ասացի որ դա իր բանաստեղծությունն է, ու նա շատ հավանեց այդ ստեղծագործությունս»,-հրավիրվածներին իր երգի պատմությունը ներկայացրեց Արայիկը, ով այն կատարեց կիթառի նվագակցությամբ:

Որդին հպարտ էր իր մոր հաջողության համար, մայրը հուզված՝ որդու ջերմ խոսերից: Շնորհակալություն հայտնելով բոլորին ժամանակ գտնելու և իր գրքի շնորհանդեսին մասնակցելու համար՝ Լուսինե Ղազարյանը նկատեց, որ իրեն և իր հեղինակած գրքին ուղղված դրվատանքի խոսքեր լսելիս՝ նոր մտքեր ու տողեր ծնվեցին իր մեջ: «Ինձ համար կյանքում ամենակարևորը ծնունդն է: Կյանքում երեք արարում, ծնունդ եմ ունեցել՝ որդուս և երկու գրքերիս: Վերջին այս գիրքս բաղկացած է երեք մասից «Սեր թևերս», «Գրավադրված երջանկություն» և «Իմ հասցեն՝ Մոռացում»: Ինչո՞ւ գրավադրված երջանկություն, քանի որ մարդիկ շատ հաճախ իրենց զգացմունքները զոհաբերում են կյանքում տեղի ունեցող իրական երևույթներին»,-ասաց Լուսինե Ղազարյանը: