Սեյրան Օհանյանի համար լուրջ ընդդիմադիրի կերպար ստեղծել, երբ նա ընդամենը 5 րոպե է, ինչ դուրս է եկել իշխանությունից`անլուրջ է...

Սեյրան Օհանյանի համար ակնհայտորեն հայտարարություններ են գրում մարդիկ, ովքեր նրան դնում են շատ վատ վիճակում: Fnews.am-ի հետ զրույցում ասաց քաղաքագետ Ստյոպա Սաֆարյանը, անդրադառնալով Սեյրան Օհանայանի վերջին հայտարարություններին:

Հիշեցնենք, որ օրերս ՊՆ նախկին նախարարն անդրադարձել էր մասնավորապես երկրում տիրող սոցիալական վիճակին, ասելով որ չի  կարելի այլևս հանդուրժել այն անարդարությունը, այն սոցիալական իրավիճակը, որում ապրում է երկրի կրթագիտական, սոցիալական շերտը: Երկրում պետք է գործեն սոցիալական արդարության, հավասարության մեխանիզմները: Բևեռացումը, որ կա հայ հասարակության մեջ,  եւ հասել է անթույլատրելի չափերի:

Մեզ ջրի պես ազատություն է պետք, հացի պես՝ արդարություն...
«Եկեք ճեղքե՛նք մեր ազատությանն ու արդարությանը խոչընդոտող բոլոր արգելքները:
Հերի՛ք է հանդուրժել, երբ երկրի ողջ ռեսուրսները կենտրոնացած են փոքրաթիվ մարդկանց ձեռքում…»,-հայտարարել էր  Սեյրան Օհանյանը

Քաղաքագետ Ստյոպա Սաֆարյանը, հրապարակավ Սեյրան Օհանյանին խորհուրդ է տալիս լուրջ-լուրջ ընթերցել իրեն առաջարկվող տեքստերը՝ մինչև դա կարտաբերվի:

Նա չի հերքում, որ Սեյրան Օհանյանն իրավունք ունի ընդդիմադիր լինել,  կամ մերժել մեր իրականության որոշ արատավոր երևույթներ: Սակայն այն, ինչ նա ընթերցում է՝ ըստ Սաֆարյանի, անլուրջ է:
«Այնպիսի մի կերպար են ստեղծել Սեյրան Օհանյանի համար, կարծես նա 10 տարի և ավելի չի հասկացել, թե երկրում ինչ է կատարվում և հանկարծ հիմա, ընդդիմություն դառնալով, աչքերը բացել է: Ստեղծվել է զավեշտալի տպավորություն և մի շարք ինչուներ… քիչ ա մնում իր հաջորդ տեքստում ինքը դատապարտի ասենք մարտի մեկը, բանակի տոնին կարդա «բանակը քաղաքականությունից դուրս» թեմայով դասախոսություն կամ «ինչպես հաղթել պատերազմում»… նման տեքստեր չի կարելի գրել: Իրականում այս մարդն ունի կենսագրություն և նրա նոր իմիջը խոր հակասություն է նրա իրական կերպարի հետ»,-ասում է Սաֆարյանն ու նշում, որ ժամանակ պետք անցնի, որպեսզի Սեյրան Օհանյանը կարողանա ապացուցել, որ ինչ որ բաների դեմ է:

Նա բերում է Վարդան Օսկանյանի օրինակը:

«Տեսե՛ք, Վարդան Օսկանյանի դեպքում ասենք հայ-թուրքական հարաբերությունների առնչությամբ, թեկուզ թեթևակի, շա՜տ թեթևակի անհամաձայնություն հայտնեց, բայց Սեյրան Օհանյանի համար լուրջ ընդդիմադիրի կերպար ստեղծել, երբ նա ընդամենը 5 րոպե է, ինչ դուրս է եկել իշխանությունից՝ զավեշտալի է:

Ա. Սահակյան