Այսօրվա կուրսով 1 ձայնը՝ 50 000 դրա՞մ է... ի դեպ, գիտե՞ք , թշնամին արդեն ջարդում է մեր սահմանների ՛՛դռները՛՛

Այն , ինչ այսօր կատարվում է մեր իրականության մեջ շատ հակասական է,   վտանգավոր ու վախեցնող: Ընտրապայքարը  դեռ չսկսված՝ վերածվել է մղձավանջի: Այս պայքարում չկան  անգամ բարեկամներ՝ այնպես է ստացվել, որ  ՛՛մեծն ռեյտինգայինը՛՛ իրար դեմ է հանել անգամ հարազատ ընկերներին: Բոլորն իրար թշնամին են, պատրաստ իրար կոկորդ ծակելուն, վկան՝ թեկնածուների երեկվա բախումները: Մինչդեռ այդ նույն ժամանակահատվածում , գրեթե ամեն օր սահմանին զոհ ունենք, գրեթե ամեն օր   տեղեկանում ենք, որ սահմանին լարվածությունն աճում է, իսկ ադրբեջանական ԶԼՄ-ներն էլ գրում են, որ Ադրբեջանի պաշտպանության նախարարի հրամանով իրենք արդեն սկսել են զորքերի կուտակում սահմանում։

Այնպիսի տպավորություն է,  ասես սահմանն ու բանակն ապրում են մեկ  հարթության մեջ, քաղաքականությունն ու պետականությունը՝ մեկ այլ և մեկը մյուսի հետ ոչ մի առընչություն չունի: Այլապես , ինչպես բացատրել այն հանգամանքը, որ  դեռ մեկ տարի առաջ   պահածոյի բանկաներով զինված սահման ունեցող երկրի մեծ ու փոքր չինովնիկներն  այնքան են հարստացել, որ  աջ ու ձախ փողեր բաժանելու մասին են խոսում և  թվերն արդեն հասնում են մեկ մարդու հաշվով՝ 50 000 դրամի:

Երևի սա միակ դեպքն է, որ ժողովուրդն իրեն հզոր է զգում, տեր է զգում. Անգամ իրար մեջ կատակում են՝ .՛՛ ՛՛Էսօրվա կուրսով 1  ձայնը  քանի՞ դրամ ա՛՛...

Ժողովուրդը դիտում է   այս շոուն ու քմծիծաղ է տալիս, թեկուզ , ի՞նչ եմ ասում, ժողովուրդը վաղուց է հասկացել, որ  ընտրութուններից հետո իր քթերից բերվելու է: ՛՛Արմենիա՛՛ հեռուստաընկերությունը մի հնդկական սերիալ է ցուցադրում, երեկվա սերիան ասես մեր իրականության արտացոլանքը լիներ՝ Բայաջին խաբեց խեղճ ու միամիտ ժողովրդին, որ կրթություն կտա, ընտրվեց ու  սկսեց ծիծաղել, որ իրեն այդպես անվերապահորեն հավատացել են:

Ասածս ինչ է, պարոնայք, մեր երկրի սահմանները շատ լարված են, թուլացրեք ձեր ներքին լարվածությունը, թուլացրեք աթոռակռիվը, թշնամին ոչ թե ծեծում, այլ ջարդում է մեր տան դռները....

Արփի Վանյան 

Hayreniq.am