Հայաստանում պարտադիր ժամկետային զինծառայողները սեփական ցանկությամբ կներգրավվեն պայմանագրային ծառայության մեջ

Հայաստանում պարտադիր ժամկետային զինծառայության ենթակա անձինք սեփական ցանկությամբ պայմանագրային զինվորական ծառայության մեջ ներգրավվելու հնարավորություն կստանան: 

Հնարավորությունը սահմանվել է Հայաստանում պայմանագրային զինծառայության հնարավորությունների ընդլայնման վերաբերյալ ՀՀ պաշտպանության նախարարության նոր ծրագրով: 

Այս մասին «Արմենպրես»-ի հարցմանն ի պատասխան հայտնել են ՀՀ պաշտպանության նախարարությունից՝ մեկնաբանելով նախարար Վիգեն Սարգսյանի հայտարարությունը, որ նախարարությունն ավարտին է հասցրել մի ծրագիր, որով նախատեսվում է ընդլայնել պայմանագրային զինծառայության հնարավորությունները:

Ծրագրի ներդրման նպատակն է զարգացնել պայմանագրային զինծառայության համակարգը, ստեղծել ավելի արհեստավարժ բանակ և ավելացնել մարտական հերթապահության գործընթացում պայմանագրային զինծառայողների ներգրավվածությունը:

Հարցին՝ ծրագրի ներդրումը ենթադրո՞ւմ է պայմանագրային զինծառայողների աշխատավարձերի բարձրացում, նախարարությունը տվել է հետևյալ պատասխանը. «Զինծառայողների դրամական ապահովության չափերը սահմանվում են համապատասխան տարվա պետական բյուջեի և միջնաժամկետ ծախսային ծրագրի հնարավորությունների շրջանակներում»:

Մարտի 12-ին Վայոց ձորի մարզում ազատամարտիկների հետ հանդիպմանը ՀՀ պաշտպանության նախարար Վիգեն Սարգսյանը հայտարարել է, որ պաշտպանության նախարարությունը ավարտին է հասցնում մի ծրագիր, որով ընդլայնվելու են պայմանագրային զինծառայության հնարավորությունները: 

«Մենք այժմ ավարտական փուլի ենք հասցնում պայմանագրային ծառայության հնարավորությունները ընդլայնելու վերաբերյալ ծրագիրը, որը, վստահ եմ, մեծ ոգևորությամբ է ընդունվելու մեր հասարակության կողմից»,- նշել է Վիգեն Սարգսյանը: