«Եթե նախկինոմ մարդիկ գոնե ինչ-որ չափով կապիտալ ունեին՝ տուն, մեքենա, աշխատանք, ոսկի, հիմա զրկված են մի շարք բաներից, վարկեր են մարում»...

Քարոզարշավի վերջին օրերն են մոտենում ու քաղաքական ուժերն աստիճանաբար ամփոփում են իրենց քարոզարշավային աշխատանքները: Ի վերջո,բնականաբար, արդյունքը կերևա ընտրություններից հետո: Սոցիոլոգիական բազմաթիվ հարցումները վկայում են այն մասին, որ ֆավորիտները ՀՀԿ-ն ու «Ծառուկյան» դաշինքն են: Այս օրերին շատերը նշեցին՝ «Ծառուկյան» դաշինքի ծրագրերը ոչ իրատեսական են, պոպուլիստական: Այս և այլ հարցերի շուրջ Fnews.am-ը զրուցել է «Ծառուկյան» դաշինքի ընտրացուցակով թիվ 2 ընտրատարածքում առաջադրված թեկնածու Զոհրաբ Զոհրաբյանի հետ:

-Պարո՛ն Զոհրաբյան, մի քանի օրից քարոզարշավը կավարտվի: Հետևելով քարոզարշավի ընթացքին՝ ի՞նչ կարող եք ասել, ինչպե՞ս է ընթանում քարոզարշավը:

-Ի տարբերություն մի շարք քաղաքական ուժերի՝ մեր՝ «Ծառուկյան» դաշինքի կողմից քարոզարշավն ընթանում է օրենքի տառին համահունչ: Մենք պարբերաբար հանդիպումներ ենք ունենում մեր բնակիչների հետ, լսում նրանց հարցերը, մտահոգությունները, առաջարկները: Ներկայացնում ենք մեր ծրագրերը, դրույթները, և ուրախությամբ պետք է նշեմ, որ այսօր ակտիվ հարցադրումների շարքում են երիտասարդները, որոնք հետաքրքրվում են, թե ինչպիսին կլինի իրենց ապագան մեր տեսլականով: Մեզ անվերապահ վստահում են բոլոր այն մարդիկ, որոնք Հայաստանի առաջընթացն ու զարգացումը տեսնում են մեր քաղաքական ուժի կողքին: Ապրիլի 2-ին մենք տանելու ենք համոզիչ հաղթանակ:
Ցանկանում եմ հիշեցնել, որ այս պահին դեռ երկրի սոցիալական և քաղաքական իրավիճակը փրկելու հնարավորություն կա, որը հետո չի լինելու: Կոչս և խնդրանքս մեր քաղաքացիներին. մի գրչի հարվածով դուք կարող եք ձեր կյանքը, ձեր երկրի ապագան 80 աստիճան փոխել: Դուք որոշեք, ուզում եք ապրել բարեկեցիկ կյանքով, թե համակերպվել եք այն մտքին, որ պետք է անընդհատ թալանվեք: Եթե նախկինոմ մարդիկ գոնե ինչ-որ չափով կապիտալ ունեին՝ տուն, մեքենա, աշխատանք, ոսկի, հիմա զրկված են մի շարք բաներից. վարկեր են մարում, անգամ չեն կարողանում վճարել իրենց տան վարձը, կոմունալները: Հայը պետք է հասկանա, որ ունի ընտրելու իրավունք, նա իր քվեն պետք է տա այն կուսակցությունների, անհատների օգտին, որոնց ծրագրերն ավելի իրատեսական են: Եթե կվստահեն ու կընտրեն մեզ, ապրիլի 3-ից մարդիկ իրենց տան մեջ նստած իրենց մաշկի վրա կզգան դրական փոփոխության առաջին ալիքը:

-Համամի՞տ եք այն պնդումների հետ, թե նոր Ընտրական օրենսգիրքն ու նոր ընտրակարգը հնարավորինս նվազեցնում է ընտրակեղծարարության հավանականությունը: Հույս ունե՞ք, որ այս անգամ ընտրություններ կտարբերվեն նախորդներից՝ աչքի ընկնելով թափանցիկությամբ ու ժողովրդակարական սկզբունքներով:

-Տարածքային ընտրացուցակի հանգամանքը մարդկանց հնարավորություն է տալիս ընտրել այն թեկնածուին, որը սերում է հենց ժողովրդի միջից, իրենց տարածաշրջանից, համայնքից, ուստի ավելի քաջատեղյակ և սրտացավ է իրենց հոգսերին: Ես այօր ապրում եմ իմ արաբկիրցիների կողքին: Նրանք գիտեն, որ միշտ պատրաստ եմ լսել նրանց հուզող հարցերը, օգնել ցանկացած պահի: Իմ թիկունքում ես զգացել եմ հասարակության աջակցությունը, որն ինձ ուժ և վստահություն է ներշնչել ավելի համարձակ գործելու: Ես միշտ կանգնած եմ ինձ վստահության քվե տված քաղաքացիների կողքին: Այսօր էլ պատրաստ եմ իմ ամբողջ ներուժը գործի դնել երկրի շենացմանն ու բարգավաճմանը: Իսկապես, նոր Ընտրական օրենսգիրքը մի քանի անգամ նվազեցնում է ընտրակեղծարարության հավանականությունը: Ժողովրդի մի գրչի հարվածն է որոշելու առաջիկա տարիների զարգացման պատկերը: