Հայտնի դերասան Ռուդոլֆ Ղեւոնդյանը՝ Դոն Պիպոյի դեմ իրականացված մահափորձի, ներկա ու նախկին վարչապետերի, եւ հայրենի մանդատավորների իրական կերպարի մասին. PHOTO,VIDEO

«ԻՐԱԿԱՆՈՒՄ» նախագծի հյուրը Կինոյի և թատրոնի հայ դերասան Ռուդոլֆ Ղևոնդյանն է: Հայտնի ու սիրված դերասան, ում կերպարները տարրաբնույթ են՝ հանցագործից օրինապահ, ավազակից՝ գնդապետ: Էկրաններից խիստ ու կոպիտ էությամբ մարդը կյանքում բազմազան է՝ որքան բարի ու ներողամիտ, այնքան էլ չոր ու խստաբարո է: Անկեղծ զրուցակից, ում հետ խոսելիս ցանկություն ունես՝ անվերջ լսել…

«Թացը չորի, լավը՝ վատի հետ վառվում ու գնում է: Չեն գնահատվում, իսկ մարդը հոգեպես գովեստի կարիք ունի և ունի այն արժանիքները, որոնց համար պետք է նրան գովես»,-ասում է Ղեւոնդյանը, ու անկեղծանում. «Ամեն մարդ պետք է իր ներսում երեխա լինի…Երեխայի միջից ատելությունը, տագնապը շուտ է դուրս գալիս, «յարեն» շուտ է լավանում: Երեխայի առողջությամբ, զգացողությամբ, մաքրությամբ պետք է ամեն ինչին մոտենալ, և ոչ թե փոքրոգությամբ: Մարդկանց պիտի սիրես, գովես, ծափահարես… Մայրս մի անգամ ասեց. «Կյանքդ տալիս ես ծափահարությանը՞»…

Այո, խենթանալու բան է ծափահարությունը: Երբ ներկայացման վերջում բեմ ես դուրս գալիս, զգում ես, թե հանդիսատեսը քեզ քանի ափ ավել կամ պակաս ծափ տվեց: Դա գերագույն երջանկություն է, որը հնարավոր չէ բացատրել խոսքերով: Երեխայությունից, մանկականությունից զուրկ, չափազանց լուրջ մարդիկ մտածում են՝ ո՞նց «լափեն», «ֆռռացնեն», գցեն դիմացինին: Անճաշակ «գեղցու», քյասիբի դատողություն՝ հավաքի, դիզի ինչքան հնարավոր է: 

Հարցին, մարդուն արտաքինո՞վ, թե՞ արարքով եք «չափում», դերասանը վստահեցրեց, որ.«Արտաքինը շա՜տ խափուսիկ է: Ես հաճախ իմ ծանոթներին, գործընկերուհիներին ասում եմ՝ փորձիր մի հատ առանց «մակիաժ» քեզ գտնել: Ամեն անգամ, երբ դիմահարդարում ես անում ու ինքդ քեզ հավանում, իմացիր՝ դու այդ օրվա «մասկան» ես հավանում»:

Դերասանի կերտած կերպարների վրա հիմնվելով, շատերը կարծում են, որ նա չոր ու կոպիտ մարդ է: Այնինչ, իրականում կա ուրիշ Ռուդոլֆ Ղեւոնդյան, ով լավ գիտի, թե մեր երկրում ինչն է պակաս, կամ ինչն է ավել.

«Ես ոչ թե չոր եմ, կոպիտ եմ, այլ ահավոր բծախնդիր եմ, ինչի մեջ էլ մտնում են երեւի Ձեր նշած հատկանիշները: Ես իմ Հայաստանը շատ եմ սիրում, բայց եւ շատ եմ ուզում, որ մերօրյա լրջագույնները նույնպես՝ սիրեն ու փայփայեն մեր հայրենիքը, ու «Կազնայից» փող չգողանան»…

Ի դեպ, այս եւ այլ հարցերի, ինչպես նաեւ երկրի ներսում առկա մի շարք հիմնախնդիրների, նախկին ու ներկա վարչապետերի, այսօրվա չինովնիկների, ու մանդատավորների իրական կերպարի ու գործունեության շուրջ, Ռուդոլֆ Ղեւոնդյանը հնչեցրել է բավականին կոշտ ու դիպուկ գնահատականներ, որն էլ ներկայացնում ենք «ԻՐԱԿԱՆՈՒՄ» նախագծի շրջանակներում:

 Լուսանկարները՝Fnews.am-ի :