Երևանում ոստիկանները հայտնաբերել են Բերդ քաղաքում 33-ամյա տղամարդուն սպանած, նախկինում ավազակային հարձակման համար դատված՝ 29-ամյա կասկածյալին

Երեկ՝ հուլիսի 12-ին, ոստիկանության քրեական հետախուզության գլխավոր վարչության, ոստիկանության Տավուշի մարզային վարչության և ոստիկանության Բերդի բաժնի ծառայողները ստացված օպերատիվ տվյալներն իրացնելով՝ Երևանում հայտնաբերել են Բերդ քաղաքի բնակիչ, 29-ամյա Հրանտ Անանյանին: 

Ինչպես հայտնում է ֆոտոլրագրող Գագիկ Շամշյանը, վերջինս կասկածվում է հուլիսի 5-ին Բերդ քաղաքում տեղի բնակիչ, 33-ամյա Դավիթ Բադալյանին սուր կտրող-ծակող առարկայով սպանելու մեջ: 

Ֆոտոլրագրողի տեղեկություններով՝ սպանություն կատարող կասկածյալին հայտնաբերելու օպերացիան ղեկավարել են ոստիկանության քրեական հետախուզության գլխավոր վարչության պետ Սամվել Ասատրյանը, Տավուշի մարզի ոստիկանապետ Գրիգոր Գրիգորյանը, և Բերդի ոստիկանապետ Գագիկ Դալլաքյանը: 

Ֆոտոլրագրողի տեղեկություններով՝ այսօր Հայաստանի քննչական կոմիտեի Տավուշի մարզային քննչական վարչության քննիչը միջնորդություն է ներկայացնելու Տավուշի մարզի ընդհանուր իրավասության դատարան, որպեսզի դատարանը որպես խափանման միջոց երկամսյա կալանքի որոշումը վերահաստատի:

Ինչպես ավելի վաղ հայտնել էր ֆոտոլրագրողը, հուլիսի 11-ին Հայաստանի քննչական կոմիտեի Տավուշի մարզային քննչական վարչության քննիչը միջնորդություն էր ներկայացրել Տավուշի մարզի ընդհանուր իրավասության դատարան, որպեսզի դատարանը սպանություն կատարելու կասկածանքով երկամսյա կալանքի որոշում կայացնի Բերդ քաղաքի բնակիչ 29-ամյա Հրանտ Անանյանի նկատմամբ:

Դատարանը բավարարել է քննչական մարմնի միջնորդությունը և Հ. Անանյանի նկատմամբ խափանման միջոց էր ընտրել երկամսյա կալանքը: 

Եթե Հ. Անանյանը հայտնաբերվի կամ մեղայականով ներկայանա իրավապահներին, ապա նա տեղափոխվելու է Վանաձոր քրեակատարողական հիմնարկ: 

Գ. Շամշյանի տեղեկություններով՝ Հ. Անանյանը նախկինում ավազակային հարձակում կատարելու համար դատապարտված է եղել: Իսկ այս անգամ նա կասկածվում է հուլիսի 5-ին Բերդ քաղաքում 33-ամյա Դավիթ Բադալյանին սպանելու մեջ՝ իրար միջև եղած պարտք ու պահանջի պատճառով: 

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: 

Լուսանկարները՝ Սմբատ Պետրոսյանի