«Տավուշի ճանապարհները երկար կյանք չունեն, գումարներ են փոշիացվում». ուր եւ ում է նայում Տավուշի մարզպետ Հովիկ Աբովյանը

Ամիսներն առաջ՝ 2017 թ-ի մայիսի 10-ին Տավուշի մարզկենտրոնում՝ Իջեւանում խառնաշփոթ ու իրարանցում էր ստեղծվել. Տավուշի մարզի բնակիչները փակել էին մարզի միջպետական ճանապարհի Իջևանով անցնող ճանապարհահատվածը:
Տավուշցիներն ընդամենը իրենց բողոքի արդար ձայնն էին բարձրացնում. մարզի ճանապարհները անմխիթար վիճակում են գտնվում և առավել ամոթալի է այն փաստը, երբ խոսքը միջպետական ճանապարհի մասին է:

Այս խնդրի վերաբերյալ մամուլը բազմից բարձրաձայնեց, բայց առանձնապես, դրական փոփոխություններ չեղան:

Այս խնդրի վերաբերյալ բազմիցս բարձրաձայնել է նաև ծնունդով տավուշցի, ՀՅԴ-ական պատգամավոր  Սուրեն Մանուկյանը: 

Անդրադառնալով վերոնշյալ թեմային՝ Սուրեն Մանուկյանը Fnews.am-ի թղթակցի հետ զրույցում նշեց՝ թեև այդ խնդիրը բարձրացնելուց հետո ճանապարհները վերանորոգվեցին, բայց դրանք դարձյալ նորմալ վիճակում չեն գտնվում:

«Ճանապարհները սարքվեցին, բայց դրանք էլի քայքայվում են: Այդ ճանապարհները երկար կյանք չունեն: Ես հենց այս ճանապարհների ասֆալտապատման ժամանակ էլ բարձրացրել եմ այդ հարցը՝ ասելով, որ այդ ճանապարհաշինարարական աշխատանքները անորակ ձևով են իրականացվում: Այս մասին ասել եմ նաև այն օրը, երբ տավուշցիները ճանապարհը փակել էին», - նշեց պատգամավոր  Սուրեն Մանուկյանը:

Սուրեն Մանուկյանը նշեց նաեւ, որ տեղեկություն չունի, չգիտի՝ ում է պատկանում այդ Լեւոն Երկրորդ  ՍՊԸ-ն, ապա ավելացրեց. «Ես մանրամասնորեն չգիտեմ՝ իրենք ինչ աշխատանքներ պետք է կատարեին՝ որակական առումով: Փաստը մնում է փաստ, որ այստեղի ճանապարհները երկար կյանք չեն ունենա: Ես այդ հարցը ամենաբարձր ամբիոններում բարձրացնելու եմ: Սա ոչ միայն մեր մարզի խնդիրն է, այլև պետք է հասկանալ՝ խոսքը միջպետական ճանապարհի մասին է: Հազար մարդ է անցնում այդ ճանապարհով: Այդ գումարները որ այդպես փոշիացնում են, դա ճիշտ չէ, էլի...»:

Հիշեցնենք, որ վերոնշյալ ճանապարհահատվածի ճանապարհաշինական աշխատանքներն իրականացրել  է «Լեւոն Երկրորդ» ՍՊԸ–ն, որն ըստ էության իր գործի մեջ պարբերաբար թերացել է, իսկ անորակ աշխատանքի պատճառով  տավուշցիներն աընդհատ բախվել են տխուր իրականության հետ:

Նկատենք նաեւ, որ օր-օր առավել ակտիվանում են խոսակցություններն այն մասին, որ «Լեւոն Երկրորդ» ՍՊԸ-ի տանիքը՝ ՀՀ նախկին վարչապետ Հովիկ Աբրահամյանի հետ մինչ օրս սրտակեղեք ու եղբայրական հարաբերությունների մեջ գտնվող  Տավուշի մարզպետ Հովիկ Աբովյանն է, ով  մարզի ճանապարհների հարցը մի կողմ դրած,   զբաղված է առավել լուրջ գործերով:

Մարզպետ Աբովյանը, այս օրերին լուրջ կերպով ընկղմվել է Իջեւանի քաղաքապետ Վարդան Ղալումյանի հետ բիզնես պրոյեկտներ կյանքի կոչելու գործին: 

Տպավորությունն այնպիսին է, որ «տամոժնիկի հոգեբանություն»-ից այս մարզի ղեկավարը չի կարողանում դուրս գալ. փաստորեն Տավուշի մեծն մարզպետին բոլորովին էլ չի մտահոգվում Տավուշի մարզի ճանապարհների անմխիթար վիճակը, քանի որ այս ամենով հանդերձ,  չգիտես թե հանուն որ հերոսական գործողության  համար է Արգամիչի լավ բարեկամ Հովիկ Աբովյանը ջերմագին հարաբերություններ  պահպանում  մի ընկերության հետ, ով  պետությունից մեծ  գումարներ է ստանում, բայց ժողովրդական լեզվով ասած՝ «գլխառադ գործ» է անում...

Ճանապարհները դեռ չնորոգած՝ կրկին քանդվում են: Չէ՞ որ մարզպետարանը՝ մարզպետի գլխավորությամբ, պետք  է որ մտահոգ լիներ թե ով ինչ տեսակ աշխատանք է կատարում իր իբր ղեկավարած մարզում: Անզեն աչքով էլ կարելի է տեսնել ու հասկանալ, որ շատ կարճ ժամանակում  այդ  վորանորոգված ճանապարհները կրկին քանդվելու են:

ՀԳ. Բոլորին է հայտնի, որ Տավուշի մարզպետը բավականին մեծ ունեցվածքի տեր է, և ինչպես մամուլն է գրում, «Լեւոն Երկրորդ» ՍՊԸ-ի կատարած աշխատանքներին էլ նա մի այլ հիացմունքով է հետեւում:

Եթե ճանապարհաշինարարական աշխատանքներն իրականացվում են թերացումներով ու բացթողումներով, որի   արդյունքում ինչ խոսք  գումարներ են «խնայվում», ապա հարց է առաջանում.  ինչի՞ հաշվին, ո՞ւմ հաշվին, ի՞նչ գնով.... է այդ ամենը իրականացվում: 
Մնում է Տավուշի մարզպետին հորդորել եւ  խորհուրդ տալ.
Մի՛ լինի ուրագի պես՝
Միշտ դեպի քեզ, միշտ դեպի քեզ, 
Այլ եղիր սղոցի պես, 
Մին դեպի քեզ, մեկ-մեկ էլ ղեկավարածդ մարզին տես...

Հեղինե   Ավագյան