Ինչ կապ ունի Սոֆի Դևոյանի որդին Բաղրամյանի թռչնաբուծական ֆաբրիկայի սեփականատիրոջ հետ, և որտեղ է հիմա վերջինս

Նախօրեին լրատվամիջոցներից մեկն անդրադարձել էր «Բաղրամյանի» թռչնաբուծական ֆաբրիկայի սեփականատեր Արմենակ Խաչատրյանի «ոդիսականին»։ Գրվել էր, որ թռչնաբուծարանը մոտ մեկ տարի է՝ փակվել է, իսկ սեփականատեր Արմենակ Խաչատրյանը հետախուզման մեջ է: Գրվել էր նաև, որ Արմենակ Խաչատրյանին պատկանող բոլոր ընկերությունները, այդ թվում և «Հավիցա», «Գժուկ» ՍՊԸ-ները սնանկ են ճանաչվել վարկային մեծ պարտավորությունները մարել չկարողանալու պատճառով: Իսկ պարտատերերի ցանկում է նաև պարուհի, դերասանուհի Սոֆի Դևոյանի որդին՝ Հովհաննես Պողոսյանը, որին և պատկանում է Գնդեվազի թռչնաֆաբրիկան: Պողոսյանն այն շահագործման իրավունքով հանձնել էր Խաչատրյանին, բայց վերջինս այստեղ էլ պարտքեր կուտակելուց հետո անհետացել է։

«Առաջին լրատվական»-ին, սակայն, հայտնի դարձավ, որ Արմենակ Խաչատրյանի նկատմամբ որևէ քրեական գործ չկա, նա հետախուզման մեջ չէ, պարզապես բացակայում է երկրից։ Բացի այդ, վերը նշված ընկերությունները դեռևս սնանկ չեն ճանաչվել, պարզապես սնանկության վարույթ է հարուցվել, գործերը սնանկության կառավարչի մոտ են, և գործընթացը դեռ չի ավարտվել։

Ինչ վերաբերում է Սեֆի Դեվոյանի որդու հետ ունեցած խնդիրներին, ապա Խաչատրյանի ընտանիքին մոտ կանգնածները մեզ պատմեցին, որ, առհասարակ, այդպիսի խնդիր չկա, քանի որ նրանք ազգականներ են։ Սոֆի Դևոյանի որդին Արմենակ Խաչատրյանի կնոջ եղբայրն է։ Երկուսն էլ զբաղվել են թռչնաբուծական բիզնեսով։ Եվ հետո Սոֆի Դևոյանի որդին Գնդեվազի թռչնաֆաբրիկան ձեռք է բերել հենց Արմենակ Խաչատրյանի շնորհիվ։ Ներկայումս որևէ պարտքուպահանջ չկա, քանի որ Խաչատրյանը չի աշխատեցրել այդ ֆաբրիկան, պարզապես շփումներ է եղել գործի բերումով։

Առհասարակ, Արմենակ Խաչատրյանը բիզնես ոլորտում չհաջողեց, քանի որ իշխանության շրջապատից հովանավորներ չուներ։ Շարքային գործարար էր։ Տևական դադարից հետո նրան հաջողվեց 2016-ին վերաբացել Բաղրամյանի թռչնաբուծական ֆաբրիկան, սակայն մի քանի ամիս աշխատեցնելուց հետո խնդիրները չվերացան, և գործարանը նորից փակվեց։ Դեռևս անցած տարի «Առաջին լրատվական»-ի հետ զրույցում Արմենակ Խաչատրյանն ասել էր, որ «պատրաստ է փայ տալ ոմանց, միայն թե թողնեն գործարանը աշխատեցնի», բայց դա էլ չփրկեց։ Ներկայումս Խաչատրյանի շրջապատը տարածվող այդ լուրերի մեջ ևս միտում է տեսնում։

1in.am