Մինչ 40-ամյա փաստաբանը հայտարարում է, որ իրեն սպառնացել են ու պահանջել 2 հազար դոլար, հակառակ կողմը այլ բան է պնդում . SHAMSHYAN.COM

Դեռևս 2014 թվականից Ռուսաստանի Դաշնության քաղաքացի, 27-ամյա Մարիամ Ավետիսյանը դիմել էր ընկերուհուն՝ Ալավերդի քաղաքի բնակչուհի Կարինե Թորոսյանին, որպեսզի նա օգներ մինչև 10 հազար ԱՄՆ դոլարի սահմաններում բնակարան ձեռք բերել Լոռու մարզի Ալավերդի քաղաքում։

Կ. Թորոսյանը գտել է հարմար տունը Ալավերդու Սանահին թաղամասում և այդ մասին տեղեկացրել է Մ. Ավետիսյանին։ Վերջինս Հայաստանում հանդիպում է տանտիրոջ՝ Սուրիկ Միկոյանի հետ և պայմանավորվածություն է ձեռք բերվում։ 

Նախնական գինը գնահատվում է 8 հազար ԱՄՆ դոլար, Մարիամը տանտիրոջը հայտնում է, որ կարող է մաս-մաս վճարել տան գումարը և տանտերը համաձայնվում է։ Վերջինս Մ. Ավետիսյանին է հանձնում տան բանալիները, ինչից հետո Մարիամը նախքան այդ տուն տեղափոխվելը, լուծում է էլեկտրականության, գազաֆիկացման և ջրամատակարարման հարցերը։

Ավելի ուշ Մարիամին զանգահարում է Ս. Միկոյանը և տեղեկացնում, որ ինքը ուրիշ գնորդ ունի, ով պատրաստ է վճարել տան համար 10 հազար ԱՄՆ դոլար, եթե Մարիամը չհամաձայնվի տան համար վճարել ոչ թե նախնականորեն պայմանավորված 8 հազար ԱՄՆ դոլարը, այլ 10 հազար ԱՄՆ դոլար։

Մարիամը համաձայնվում է տունը գնել 10 հազար ԱՄՆ դոլարով, և պատրաստվում են տունը անվանափոխել, որի ժամանակ էլ նկատում են, որ տունը Ս. Միկոյանի տղայի՝ Դավիթ Միկոյանի անվամբ է։

Դ. Միկոյանին վճարում է 1000 ԱՄՆ դոլար, ինչից հետո պարտավորագիր է ստորագրվում, համաձայն որի՝ Մ. Ավետիսյանը պետք է մաս-մաս վճարումները կատարի։ Հետո նա փոխանցում է 4 հազար ԱՄՆ դոլար, բայց ժամանակի սղության պատճառով նոտարը չի կարողանում հաստատել և որոշում են 1000 դոլար վճարման մասին փաստաթղթի հակառակ կողմում նշել այդ մասին։ 

Դրանից հետո Մարիամը ՌԴ-ից ուղարկում է ևս 2 հազար ԱՄՆ դոլար։ Այնուհետև վերջնականապես Դավիթն ու Մարիամը պայմանավորվում են, որպեսզի Մարիամը գա և վճարի մնացած մասը և տունը անվանափոխեն։ 

Երբ Մարիամը Դավիթըը գալիս են նոտարի մոտ՝ անվանափոխության, պարզվում է, որ պակասում է փաստաթուղթ, որտեղ պետք է նշված լիներ, որ տունը կալանքի տակ չէ։ Նոտարը ասում է, որ 10 օրվա ընթացքում Դավիթը ներկայացնի այդ փաստաթուղթը, իսկ Դավիթը պահանջում է Մարիամից մնացած գումարը՝ ասելով, թե՝ պարտքեր ունեմ, պարտքատերերը դրսում են և սպասում են ինձ։ 

Մարիամը ևս 1000 ԱՄՆ դոլար է փոխանցում Դավիթին և պայմանավորվում են, որ Դավիթը թուղթը բերի և առքուվաճառքի գործընթացը ավարտեն։

10 օր անց նոտարի մոտ Դավիթը Մարիամին ասում է. «Կամ 3 հազար դոլար պիտի տաս ինձ, կամ էլ գործարքը չեմ կատարի»։

Գործը հասնում է դատարան, Մարիամին խորհուրդ են տալիս փաստաբանի օգնությանը դիմել, նա հանդիպում է փաստաբան Մուրադ Ասրյանին, իսկ վերջինս ասում է. «Ինձ վճարիր 300 հազար դրամ և ես կանեմ գործը»։ Իսկ ավելի ուշ Մարիամին ասում է, թե. «Արի 3 հազար դոլար տանք դատավորին, որպեսզի գործը շահենք»։

Դրանից հետո գործը գնում է Վերաքննիչ դատարան, փաստաբան Մ. Ասրյանը այնտեղ Մարիամի շահերը պաշտպանելու համար նորից գումար է պահանջում Մարիամից։ 

Մարիամը վերադառնում է ՌԴ, իսկ Մ. Ասրյանը կեղծ համաձայնության պայմանագիր է կնքում Դ. Միկոյանի փաստաբանի հետ, որ իբրև Մարիամը պարտք ու պահանջ չունի Միկոյանների հանդեպ։ 

Մարիամը դիմում է տարբեր կառույցների, սակայն անօգուտ, իսկ այս տարվա հունիսի 27-ին հուսահատության մեջ փորձում է ինքնասպան լինել, քանի որ դատարանում իրեն տանից վարելու որոշում է կայացվել, նոյեմբերի 8-ին էլ նա ինքնահրկիզման փորձ է կատարում Երևանի գլխավոր դատախազության շենքի դիմաց, սակայն կանխում են։ 

Մարիամը խնդրանքով դիմում է բոլոր ատյաններին, որպեսզի խնդիրը լուծվի օրենքի սահմաններում, և պատրաստ է ներկայացնել դրա համար անհրաժեշտ բոլոր փաստաթղթերը։

Ինչպես ավելի վաղ հայտնել էր SHAMSHYAN.com-ը, նոյեմբերի 11-ին Երևան քաղաքի բնակիչ, 40-ամյա Մուրադ Ասրյանը դիմել էր ՀՀ Գլխավոր դատախազություն և հայտնել, որ այս տարվա հոկտեմբերի կեսերին Սոնա Ավետիսյան անձը իր հեռախոսահամարին հաղորդագրություններ է ուղարկում՝ իրենց պահանջելով 2000 ԱՄՆ դոլար: 

Մ. Ասրյանը հայտնել էր նաև, որ «հեռախոսային ահաբեկիչը» սպառնացել է, որ եթե գումարը չտրամադրի, ինքը բռնություն է գործադրելու իր և իր ընտանիքի նկատմամբ:

Գ. Շամշյանի տեղեկություններով, Մ. Ասրյանը ՀՀ փաստաբանների պալատի անդամ է և փաստաբան, իսկ դատախազւթյունից էլ դիմումի ընթացքը լուծելու համար այն փոխանցել են ոստիկանության Արաբկիրի բաժին, որտեղ էլ Արաբկիրի ոստիկանության պետ, ոստիկանության գնդապետ Արմեն Գասպարյանը հանձնարարել է հետաքննչական բաժանմունքում հետաքննություն սկսել:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: 

SHAMSHYAN.COM