3-ամյա երեխային պատանդ վերցնելու մեջ մեղադրվող տղամարդու եւ նրա նախկին կնոջ միջեւ առերեսում է տեղի ունեցել. NEWS.AM

Արմավիր քաղաքի «Մանուշակ» մանկապարտեզում 3-ամյա երեխային պատանդ վերցնելու եւ նախկին կնոջն ու նրա տատիկին մարմնական վնասվածքներ հասցնելու մեջ մեղադրվող Արգամ Հովիկյանի մասնակցությամբ առերեսումներ են տեղի ունեցել:

NEWS.am-ի հետ զրույցում Արգամ Հովիկյանի պաշտպան Արսեն Սարգսյանը հայտնեց, որ առերեսումներ են եղել իր պաշտպանյալի եւ նրա նախկին կնոջ ու նրա տատիկի միջեւ:

«Ամեն մեկն իր ասածն է պնդել առերեսման ժամանակ: Այլ քննչական գործողություններ իմ պաշտպանյալի մասնակցությամբ տեղի չեն ունեցել»,- ասաց Արսեն Սարգսյանը:

Նշենք, որ արդեն իսկ ստացվել է արյան նմուշի փորձաքննության պատասխանը, որի համաձայն, Արգամ Հովիկյանը դեպքի պահին եղել է սթափ վիճակում:

Ավելի վաղ ոստիկանությունը հայտնել էր, որ 2017թ. հոկտեմբերի 30-ին, ժամը 16:25-ին ահազանգ է ստացվել, որ մի տղամարդ դանակով զինված ներխուժել է Արմավիր քաղաքի «Մանուշակ» մանկապարտեզ: Պարզվել է, որ այդ քաղաքացին Արգամ Հովիկյանն է, որը դանակի սպառնալիքով մանկապարտեզում պատանդ է պահել 3-ամյա երեխայի՝ պահանջելով հանդիպում իր նախկին կնոջ հետ:

Նրա հետ բանակցություններ են վարել իրավապահ մարմինների ներկայացուցիչները: Բանակցությունների ընթացքում ոստիկանության ծառայողներին հաջողվել է երեխային անվնաս հանել սենյակից:

Ձեռք բերված բավարար ապացույցների հիման վրա՝ քննիչը որոշում է կայացրել տղամարդուն մեղադրանք առաջադրել Քրեական օրենսգրքի 34-104-րդ հոդվածի 2-րդ մասի 1-ին կետով եւ 218-րդ հոդվածի 2-րդ մասի 3-րդ եւ 4-րդ կետերով: Նա կալանավորված է եւ գտնվում է «Դատապարտյալների հիվանդանոց» քրեակատարողական հիմնարկում:

Արգամ Հովիկյանը ցուցմունք է տվել եւ հայտնել, որ մանկապարտեզ էր գնացել կնոջ հետ վերջնական խոսելու եւ նրան տուն վերադարձնելու նպատակով, իսկ եթե չստացվի, նպատակ է ունեցել կնոջ աչքի առջեւ ինքնասպան լինել:

NEWS.AM