Ամուսնու կողմից կնոջը սպանելու գործով դատաքննությունը դեռ չի սկսվել. տուժողի իրավահաջորդը նիստին չի գալիս

Արմավիրում ապրիլի 12-ին 38-ամյա կնոջ սպանության գործով դատաքննությունը դեռ չի սկսվել: Այս մասին NEWS.am-ին ասաց գործով ամբաստանյալ Բախշի Մարտիրոսյանի պաշտպան Համլետ Ստեփանյանը:

Բախշի Մարտիրոսյանը մեղադրվում է երկու դրվագով՝ նախկին կնոջը սպանելու եւ դրանից ամիսներ առաջ Դդմաշենում շուրջ 10 հազար դոլարի գողություն կատարելու:

«Սպանության դրվագով տուժող կողմը նախապատրաստական փուլերին չի եկել, իսկ գողության դրվագով տուժողը ներկայացել էր: Հույս ունենք, որ դեկտեմբերի 26-ին նշանակված նիստին դատաքննությունը վերջապես կկարողանանք սկսել»,- ասաց Համլետ Ստեփանյանը:

Պաշտպանը հայտնեց, որ կատարվածից հետո երեխան գտնվում է սպանված Սյուզաննա Գալստյանի ազգականների մոտ: Նշենք, որ Բախշի Մարտիրոսյանն իրեն առաջադրված մեղադրանքն ընդունում է:

Ըստ մեղադրանքի՝ Բախշի Մ.-ն կնոջը կասկածել է ամուսնական անհավատարմության մեջ: Խանդի հողի վրա նրան ապօրինաբար կյանքից զրկելու դիտավորությամբ՝ Բախշին ապրիլի 12-ին գնացել է Արմավիր եւ սպասել այնքան, մինչեւ կինը դուրս գա խմորեղենի արտադրամասից: Աննկատ հետապնդելով կնոջը՝ տղամարդը մեկ փողանի կարճեցված փողով հրացանից մեկ անգամ կրակել է նրան՝ տեղում սպանելով:

Բացի դրանից, Բախշի Մ.-ն, համաձայնությամբ գալով Այգեւորդ Հ.-ն հետ, 2016թ. հոկտեմբերին Դդմաշենում գաղտնի հափշտակել են 1500 ԱՄՆ դոլար և շուրջ 8000 ԱՄՆ դոլարին համարժեք ոսկյա զարդեր:

Բախշի Մ.-ին մեղադրանք է առաջադրվել Քրեական օրենսգրքի 104-րդ հոդվածի 1-ին մասով եւ 177-րդ հոդվածի 3-րդ մասի 1,1 կետով: Նա կալանավորված է:

Գործը քննվում է Արմավիրի մարզի ընդհանուր իրավասության դատարանում:

Ավելի վաղ Քննչական կոմիտեն հայտնել էր, որ 2017թ. ապրիլի 12-ին երեկոյան սպանություն է տեղի ունեցել Արմավիր քաղաքում: Հանրապետության 1 հասցեում հայտնաբերվել է 38-ամյա Սյուզաննա Գալստյանի դին` գլխի շրջանում հրազենային վնասվածքով:

NEWS.AM