«Երեխայի պես խաբեցի ու հաղթեցի․ մոռանալ չի կարելի».Նարեկ Աբգարյանը պատրաստվում է նոր մենամարտի․նպատակը հաղթանակն է

Fnews.am-ի զրուցակիցը Հայաստանի բռնցքամարտի հավաքականի անդամ Նարեկ Աբգարյանն է: Օլիմպիական խաղերից հետո այս բռնցքամարտիկը դուրս եկավ պրոֆեսիոնալ ռինգ։

-Նարե՛կ, Ձեր հարցազրույցներից մեկում նշել եք ՝ բռնցքամարտով սկսել եք զբաղվել դեռ 8 տարեկանից: Իսկ ինչպե՞ս որոշեցիք գնալ հենց բռնցքամարտի պարապմունքների։

-Հայրս և հորեղբայրս զբաղվել են բռնցքամարտով , մեր ընտանիքում միշտ շոշափվել է բռնցքամարտի թեման։ Ու այդպես, մի օր եղբայրս ինձ տարավ բռնցքամարտի։

-Ո՞վ է եղել Ձեր առաջին մարզիչը։

-Իմ առաջին մարզիչը եղել է Խաչիկ Խաչատրյանը, բայց բռնցքամարտի պարապմունքների գնալուց մի քանի տարի անց, ընտանիքով տեղափոխվեցինք, և դրանից հետո ես սկսեցի մարզվել Կարեն Աղամալյանի մոտ։

-Որպես մարզիկ՝ ո՞ւմ կուզենայիք նմանվել։

-Ինձ համար չկա մի այդպիսի կուռք, ում կուզենայի նմանվել։

-Սովորաբար, օրական քանի՞ ժամ եք մարզվում։ Ընդհանուր առմամբ, ինչո՞վ է տարբերվում մարզիկի կյանքը մյուսներից, ի՞նչ գրաֆիկ կա, որին պարտադիր պետք է ուշադրություն դարձնել։

-Մարզումներն օրական կարող են տևել 1-3 ժամ՝ նայած, թե ինչ մրցումների փուլում եմ։ Մարզիկը պետք է հստակ հետևի իր սննդակարգին, պարապմունքների ռեժիմին։

-Եղե՞լ են դեպքեր, որ հիասթափություն եք ապել և ցանկացել եք թողնել բռնցքամարտը։

-Շատ անգամներ հիասթափվել եմ անարդար մրցավարության պատճառով, բայց միշտ համարել եմ, որ եթե թողնեմ բռցքամարտը, այդժամ, իրոք, կպարտվեմ։

-Ո՞րն է եղել ամենահիշարժան պահը ռինգում, կա՞ ինչ-որ մենամարտ, որն այս առումով կառանձնացնեիք։

-Այո՛, կա մի մենամարտ, որը չեմ մոռանա։ Ես մենամարտում էի իտալացի մի մարզիկի հետ․ եթե հաղթեի ուղեգիր կնվաճեի դեպի Ռիո՝ Օլիմպիադա։ Այդ իտալացին էլ Եվրոպայի և աշխարհի փոխչեմպիոն էր և ինձանից ավելի փորձառու, բայց ես իրեն հաղթեցի մրցավարների միաձայն որոշմամբ։ Երեխայի պես խաբեցի ու հաղթեցի․ մոռանալ չի կարելի (ծիծաղում է- հեղ․)։

-Առաջիկայում ի՞նչ մրցաշարերի եք պատրաստվում մասնակցել, Ձեր առջև ի՞նչ նպատակներ եք դրել։

-Հիմա ես պատրաստվում եմ պրոֆեսիոնալ 8-րդ մենամարտիս, որը կկայանա փետրվարի 10-ին Ամերիկայում։ Նպատակս հաղթելն է։

-Ինչպիսի՞ն էր Ձեզ համար 2017 թվականը, ի՞նչ ձեռքբերումներ ունեցաք։

-2017 թվականը լավ տարի էր․ ունեցա 6 պրոֆեսիոնալ մենամարտ, ևս մեկ պրոֆեսիոնալ մարտ ունեցել էի 2016 թվականին, ստացվում է ընդհանուր 7 մարտ և 7 հաղթաակ, այնպես որ, գոհ եմ 2017 թվականից։

- Ձեր տոնական բարեմաղթանքը մեր ընթերցողին։

- Շնորհավոր բոլորիս Նոր տարին։ Թո՛ղ Աստծո օրհնությունը լինի բոլոիս ընտանիքներում և թո՛ղ 2018 թվականը լինի առողջության և հաջողության տարի։