«Բազմաթիվ փորձություններ եղան՝ սկսած նրանից, որ օձի արյունից մինչև միջատներ ուտելով գոյատևեցինք, իսկ...»

Fnews.am-ի զրուցակիցը դերասան, ռեժիսոր, հաղորդավար Արմեն Դալլաքյանն է։

-Արմե՛ն, ինչպիսի՞ն էր Ձեզ համար 2017 թվականը։ Ձեր կյանքում ի՞նչ կարևոր իրադարձություններ եղան, որոնք կարող եք առանձնացնել։

-Չեմ ստի, կասեմ, որ 2017 թվականը շատ բուռն տարի էր։ Նախ մեկ տարվա ընթացքում նկարահանեցի 2 գեղարվեստական ֆիլմ։ Այդ երկու ֆիլմերը առանձնանում էին նրանով, որ երկուսն էլ առանձնանում էին իրենց ժանրային տարբերությամբ, և այդ արդյունքը ստանալը շատ դժվար էր ինձ համար։ Առաջինը սարսափ ֆիլմ էր, իսկ երկրորդը կոմեդիայի ժանրից էր։ Նշեմ, որ կոմեդիան կապ ունի Ամանորի հետ և հայ հանդիսատեսը կարող է այն հունվար ամսից դիտել մայրաքաղաքի բոլոր կինոթատրոններում։ Ֆիլմի թեման ամանորյա կատակերգություն է։ Մյուս իրադարձությունն այն է, որ A-TV հեռուստատեսության <<Անհայտ հասցե>> հեռուստանախագծին մասնակցեցի, և երկու ամիս տևեցին նկարահանումները։ Խաղի ժամանակ բազմաթիվ փորձություններ եղան՝ սկսած նրանից, որ օձի արյունից մինչև միջատներ ուտելով գոյատևեցինք, իսկ հաջորդ ձեռքբերումս եղավ այն, որ դարձա խաղի հաղթող։ Մյուս ձեռքբերումս, թերևս, այն էր, որ կինոստուդիայիս կից՝ բացվեց ձայնագրման ստուդիա, ֆոտո-վիդեո նկարահանման համար նախատեսված տաղավարներ։ 2017-ին ահա այսպիսի ձեռքբերումներ ունեցա, իսկ 2018 թվականին Աստծո կամոք կլինեն ավելի շատ ձեռքբերումներ։

-2017-ին որպես ռեժիսոր՝ հանդիսատեսի դատին նկարահանեցիք "Սարսափ" ֆիլմը։ Այն ե՞րբ կհայտնվի մեծ էկրաններին։

-Սարսափ ժանրի ֆիլմը մեծ էկրաններին կհայտնվի փետրված ամսին։

-Դերասան, հաղորդավար, ռեժիսոր․․․ Ո՞րն է Ձեզ ավելի հոգեհարազատ։

-Բնականաբար, դերասանի մասնագիտությունը, բայց փորձելով և աշխատելով որպես ռեժիսոր և հաղորդավար՝ կարծում եմ՝ իմ աշխատանքով արդարացրել եմ ինձ իմ հանդիսատեսի առաջ։

-Առաջիկայում ի՞նչ նոր աշխատանքներ եք իրականացնելու, հանդիսատեսն առաջիկայում Ձեզ նոր կերպարներում կտեսնի՞։

-Առաջիկայում դեռևս հեռուստասերիալներում հանդես չեմ գա։ Այժմ նկարահանվում եմ գովազդներում, բայց, այնուամենայնիվ, սերիալներում դեռ կհասցնեմ հանդես գալ։

-Իր վերջին մամուլի ասուլիսի ընթացքում մշակույթի նախարար Արմեն Ամիրյանը վստահեցրեց՝ անցնող 2017-ի տվյալները հուսադրող են․ հայ հանդիսատեսը ավելի շատ է սկսել թատրոն գնալ, անհամեմատ ավելի է մերձեցել մշակույթին ու արվեստին։ Որպես արվեստի գործիչ՝ ի՞նչ կարող եք ասել սրա վերաբերյալ․ դրական առաջընթաց նկատե՞լ եք։

-Կասեմ, որ պատտադիր է թատրոն գնալ և ներկայացումներ դիտել, քանի որ թատրոնն իր մեջ կրում է շատ ուսուցողական տարրեր։ Կարծում եմ՝ թատրոնը մեր ժողովրդին ավելի շատ է պետք, քան սերիալները։

-Ի՞նչ եք կարծում, այսօր մեր ֆիլմարտադրության մեջ ամենաշատն ի՞նչն է պակասում։

-Եվրոպական չափանիշերով ֆիլմերը, ոչ թե տրագեդիաներ, լացուկոծ։ Մեզ ավելի շատ թեթև ֆիլմեր են պետք։

-2018-ին ընդառաջ՝ ի՞նչ նպատակներ եք դրել Ձեր առջև։

-Չեմ ուզում փակագծերը բացել, քանի որ այս տարի շատ պլաններ ունեմ։ Շատ աշխատանքներ պետք է իրականացնեմ իմ և հանդիսատեսի համար։

-Ձեր տոնական բարեմաղթանքը մեր ընթերցողին։

-Մաղթում եմ, որ լինենք առողջ, բարին ավետենք մեկս մյուսին և ապրենք խաղաղ երկնքի տակ։