Փոքր որդուս առողջական վիճակը շատ վատ է, նա չորս ամսական է, ուժեղ հազում է, բայց անգամ դեղեր գնելու գումար չունենք

Fnews.am-ն արդեն նախորդիվ անդրադարձել է սոցիալական ծանր վիճակում գտնվող Մխիթարյանների ընտանիքին։

Հիշեցնենք՝ մայրաքաղաք Երևանի Շենգավիթ համայնքի Արցախի փոցողի 4-րդ նրբանցքի 71-րդ բնակարանում ապրող բազմազավակ ընտանիքն ապրում է սարսափելի պայմաններում, ավելին՝ երեխաների մոր՝ տիկին Նինայի խոսքով՝ չեն կարողանում անգամ երեխաների հանապազօրյա հացի խնդիրը լուծել․ ընտանիքի հայրը գործազուրկ է։ Հինգ երեխաներից երեքը՝ Անահիտը, Ծովինարն ու Սիրանույշը դպրոցահասակ են, բայց դպրոց չեն գնում ճանապարհածախ, հագուստ ու կոշիկ չունենալու պատճառով։

«Մենք ապրում ենք մի փոքր, խոնավ սենյակում, երեխաներս հիվանդանում են։ Չգիտեմ՝ ինչ անել։ Հատկապես փոքր որդուս առողջական վիճակը շատ վատ է, նա չորս ամսական է, ուժեղ հազում է, բայց անգամ դեղեր գնելու գումար չունենք։ Բժշկի մոտ տարա, ասաց՝ եթե այդպես շարունակվի, նա թոքաբորբով կհիվանդանա։ Այս խոնավության հետ կապված՝ ես էլ առողջական խնդիրներ ունեմ․ երեք ամիսը մեկ ներարկումներ էի ստանում, որ վիճակս մի քիչ բարելավվեր։ Թոքերս վատ վիճակում են․ արդեն երկու տարի է, այս սեզոնին յոթ ասեղ սրսկվում եմ, որ այս վիճակն անցնի։ Մի ասեղը 2300 դրամ է, ես էլ այդ գումարը չունեմ», - նշեց տիկին Նինան։
Ցավով ասաց, որ բոլոր երեխաներն էլ հիվանդ են, հազում են, իսկ ինքն անզոր է, չգիտի՝ ինչ անել։

Տիկի Նինան նշեց՝ երեխաների հիվանդությունը կապված է սենյակի խոնավության հետ, իսկ այդ խնդիրը կարծես անլուծելի լինի։
«Երբ երեխաների շորերը հագցնում եմ, արդուկում եմ, որ գոնե չորանան․ տանն ամեն ինչ խոնավանում է»,-ասաց Տիկին Նինան։ Նա նշեց ՝ամուսինը վերջերս վարձույթով ավտոմեքենա է վերցրել, որ տաքսի վարի ու գոնե ընտանիքի հանապազօրյա հացի խնդիրը լուծի, բայց, ցավոք, տաքսիներից օգտվողները շատ քիչ են։

«Ընդամենը 53 հազար դրամ նպաստ ենք ստանում, որը, բնականբար, չի հերիքում։ Մենք ուրիշ եկամտի աղբյուր չունենք։ Փոքրիկ երեխայիս կաթն էլ Ավետարանչական եկեղեցուց եմ ստանում։ Բայց հիմա նա արդեն շիլաներ պիտի ուտի, սակայն գումար չունենք, չեմ կարողանում գնել։ Տան եղածն էլ, որ եփում եմ, չի ուտում։ Ես, իսկապես, չգիտեմ ինչ անել։ Մեր ընտանիքը անելանելի վիճակում է հայտնվել։ Մի չոր տուն է անհրաժեշտ, որ այս խոնավությունը չլինի, որ հինգ երեխաներս միշտ չհիվանդանան։ Ես ու ամուսինս ևս մշտապես հիվանդանում ենք։ Ամուսինս էլ առողջական խնդիրներ ունի։ Տունը շատ խոնավ է, բայց տուն վարձելու հնարավորություն չունենք․․․ Գոնե մեկը անվճար մեզ մի չոր տուն տրամադրեր, գոնե ինչ-որ լուծում լիներ։ Չգիտեմ՝ անելանելի վիճակում ենք հայտնվել։ Բոլոր բարի մարդկանց, բարերարներին խնդրում եմ օգնության ձեռք մեկնել մեզ։ Մենք բարեգութ մարդկանց կարիքն ունենք», - եզրափակեց տիկին Նինան։

ՀԳ- Բոլոր նրանք, ովքեր ուզում են օգնել այս ընտանիքին, կարող են դիմել Նինա Մխիթարյանին, հասցե՝ ք․ Երևան, Արցախի 4-րդ նրբանցք, բնակարան 71, հեռ․՝ 093 76 74 18։