Դաժան ու ողբերգական ավտովթար Կոտայքի մարզում. Mitsubishi-ն 90 մետր գահավիժել է անդունդը. անչափահաս տղաներից մեկը տեղում մահացել է, երկուսի կյանքի համար բժիշկները պայքարում են

Մարտի 18-ին, ողբերգական ավտովթար է տեղի ունեցել Կոտայքի մարզում: Ժամը 14:30-ի սահմաններում Mitsubishi Pajero io մակնիշի 34 RZ 811 համարանիշի ավտոմեքենայի վարորդը Լուսակերտի վարչական տարածքում դուրս է եկել ճանապարհի երթևեկելի գոտուց և մոտ 90 մետր գահավիժել անդունդը:

Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 1 հոգի տեղում մահացել է, 2 հոգի մարմնական վնասվածքներով տեղափոխվել են Աբովյանի բժշկական կենտրոն:

Վիրավորներին առաջինը օգնության են հասել քաղաքացիները, այնուհետև դեպքի վայր ժամանած Արտակարգ իրավիճակների նախարարության փրկարար ծառայության Եղվարդի թիվ 46 հրշեջ-փրկարարական ջոկատի փրկարաներն ու ճանապարհային ոստիկանության 2-րդ սպայական գումարտակի 3-րդ վաշտի 1-ին դասակի ծառայողները:

Օպերատիվ են գործել նաև Աբովյանի բժշկական կենտրոնի բժիշկները: 

Ֆոտոլրագրողը հայտնում է, որ մահացածին քաղաքացիները, փրկարաներն ու ոստիկանները հայտնաբերել են մեքենայից դուրս շպրտված:

Վթարի մասին ՃՈ 1-77 օպերատիվ կառավարման կենտրոնի պատասխանատու հերթապահ Գեղամ Մարգարյանը տեղեկությունը փոխանցել է ոստիկանության Նաիրիի բաժին, որտեղից ժամանել է օպերատիվ խումբը՝ համայնքային ոտիկանության և անչափահասների գործերով բաժանմունքի ծատայողները:

Դեպքի վայր է ժամանում նաև Հայաստանի քննչական կոմիտեի Կոտայքի մարզային քննչական վարչության քննչական խումբը՝ մարզային քննչական վրաչության պետ Մհեր Վադանյանի գլխավորությամբ:

Փաստի առթիվ քննչական բաժնում հարուցվել է քրեական գործ՝ ՀՀ քր. օր.-ի 242 հոդվածի 2-րդ մասի /ճանապարհատրանսպորտային պատահար, որն անզգուշությամբ առաջացրել է մարդու մահ/ հատկանիշներով:

Ոստիկանությունն ու քննչական բաժինը պարզում են վարորդի, մահացածի և վիրավորների ինքնությունը:

Դեպքի վայրում հավաքվածները նշում էին նաև, որ վիրավորներին հիվանդանոց է ուղեկցել ՃՈ 2-րդ սպայական գումարտակի 3-րդ վաշտի հրամանատար Արթուր Պետրոսյանը:

Ֆոտոլրագրողը հայտնում է, որ մահացածն ու վիրավորները անչափահաս տղաներ են:

18.00

Քիչ առաջ ֆոտոլրագրողը հայտնեց Կոտայքի մարզի քննչական վարչությունում պարզվել է, որ ավտոմեքենան վարել է Կոտայքի մարզի Նոր Գեղի գյուղի բնակիչ, 16-ամյա Հրայր Գրիգորյանը, ով տեղում մահացել էր, իսկ հիվանդանոց են տեղափոխվել ուղևորներ՝ նրա համագյուղացիներ, 17-ամյա Միշա Գրիգորյանը և 16-ամյա Գևորգ Հակոբյանը:


Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Լուսանկարները՝ Գագիկ Շամշյանի

Shamshyan.com