Երևանի քաղաքապետարանի ու Կենտրոն վարչական շրջանի պատասխանատուների շնորհիվ քաղաքի կենտրոնում «ստեղծվել է» առնետների բանակ. բնակիչները պատրաստվում են առնետներին «դեպորտ անել» քաղաքապետարան

Մինչ Երևանի քաղաքապետարանի ու վարչական շրջանների ղեկավարները երևանցիներիս «ուղեղները լվանում են», թե կյանքի գնով փորձում են մայրաքաղաքում վերացնել հակասանիտարական վիճակը, մայրաքաղաքի սրտում՝ Երևանի կենտրոնում, առնետների մի ամբողջ բանակ է օր-օրի «շենանում»:

Ինչպես հայտնում է ֆոտոլրագրող Գագիկ Շամշյանը, Կենտրոն վարչական շրջանի Պուշկինի 40 շենքի բնակիչները, 2 տարուց ավելի է՝ օր ու արև չունեն:

Մինչ աշխարհը պայքարում է ահաբեկչության դեմ, նշված շենքի բնակիչները ահաբեկված են դիմավորում ամեն օրը:Պատճառը շենքում վխտող առնետներն են:

SHAMSHYAN.com-ի թղթակցի հետ զրույցում բնակիչները ասում էին. «2 տարուց ավելի է՝ դիմել ենք Երևանի քաղաքապետարանի և Կենտրոն վարչական շրջանի պատասխանատուներին, որպեսզի խնդիրը լուծեն, սակայն ամեն անգամ միայն խոստանում են ու ստացվում է «էշ մի սատկի, գարուն կգա»: 

Հետաքրքիր է՝ էդ կաբինետներում նստած չինովնիկները, որ մտածում են իրենց թափանները լցնելու մասին, իրենք էս պայմաններում կապրե՞ն: Չնայած մի մասը երևի ապրեն, քանի որ նրանց մոտ բույն է դրել առնետավազքի հոգեբանությունը: Այս տարի նշվելու է Երևանի 2800-ամյակը ու մեր մայրաքաղաքը, որ դարերի պատմություն ունի ու կոչվում էր Վարդագույն քաղաք, վերածվում է առնետների քաղաքի: 

Գոնե նամուս ու թասիբ ունենան՝ սրա դեմն առնեն, հակառակ դեպքում՝ դրանց բոլոր խոսքերը դուրս կգա օդ»:

Բնակիչերը նշում էին նաև, որ առնետների պատճառով թե՛ տարեցները, թե՛ փոքրերը միշտ վախի ու զզվանքի մեջ են ապրում: 

«Հարևանությամբ գտնվող դեղատան աշխատակիցներն արդեն շատերիս դեմքով գիտեն, հենց մտնում ենք դեղատուն, ասում են՝ Առնետների ահից էլի եկել եք դեղ առնելո՞ւ:

Եղել են նաև դեպքեր, որ մարդիկ առնետների վախից սրտի հետ կապված խնդիրներ են ունեցել ու հայտնվել են հիվանդանոցներում:

Բավական է՝ հետո էլ պատասխանատուները ասում են, թե իրենք Երևանը սիրում են: Երևանը սիրող մարդը շուտվանից վերացրել էր առնետների բազմանալը: Բնակիչները հուսով են, որ գոնե այս հրապարակումից հետո Երևանի քաղաքապետարանն ու Կենտրոն վարչական շրջանի պատասխանատուները միջոցներ կձեռնարկեն այս հակասանիտարական վիճակը վերացնելու համար:

Հակառակ դեպքում՝ այլ ելք չի մնա, քան հավաքենք մի քանի կռիսներ ու որպես ընծա ուղարկենք Երևանի քաղաքապետարան»:

shamshyan.com