Մալաթիայի ոստիկանները պարզել են Մալաթիայի թիվ 121 դպրոցի բակում 3 անձանց դանակահարած անձանց ինքնությունը. եղբայրներից մեկը ձերբակալվել է, մեկը ստորագրությամբ բաց է թողնվել

SHAMSHYAN.com-ի տեղեկություններով՝ սեպտեմբերի 9-ին, ոստիկանության Մալաթիայի բաժնի քրեական հետախուզության բաժանմունքի ծառայողները ձեռնարկված օպերատիվ միջոցառումների շնորհիվ պարզել են սեպտեմբերի 8-ին «Աստղիկ» բժշկական կենտրոն տեղափոխված 29-ամյա Գոռ Պետրոսյանին, 21-ամյա Ժորա Կարագուլյանին և 29-ամյա Մհեր Գրիգորյանին վիճաբանության ժամանակ սուր կտրող-ծակող առարկայից հարվածներ հասցրած անձանց ինքնությունը։

Ինչպես հայտնում է ֆոտոլրագրող Գագիկ Շամշյանը, պարզվել է, որ նշված անձանց հետ վիճաբանել են Երևան քաղաքի Իսակովի պողոտայի բնակիչներ՝ 21-ամյա Գևորգ Պետրոսյանը և նրա եղբայրը՝ 15-ամյա Հ. Պետրոսյանը։

Ոստիկանների անցկացված բացատրական աշխատանքների շնորհիվ երեկ երեկոյան եղբայրներն ինքնակամ ներկայացել են ոստիկանության Մալաթիայի բաժին, որտեղ Գ. Պետրոսյանը ներկայացրել է հանցագործության գործիք դանակը։

Ֆոտոլրագրողի տեղեկություններով՝ Գ. Պետրոսյանը ձերբակալվել է, իսկ եղբայրը՝ Հ. Պետրոսյանը, ստորագրությամբ ազատ է արձակվել։

Պարզվել է նաև, որ ոստիկանների ստացված տեղեկությունը, թե վիճաբանություն-դանակահարությունը տեղի է ունեցել Մալաթիա- Սեբաստիա վարչական շրջանի թիվ 121 դպրոցի մոտ, համապատասխանում է իրականությանը։

Ինչպես ավելի վաղ հայտնել էր ֆոտոլրագրողը, ոստիկանության Մալաթիայի բաժնի հետաքննչական բաժանմունքում նյութեր էին նախապատրաստվում սեպտեմբերի 8-ին «Աստղիկ» բժշկական կենտրոնից ոստիկանության Մալաթիայի բաժին ստացված ահազանգի փաստով: 

Ժամը 23:30-ի սահմաններում նշված կենտրոնից տեղեկացրել էին, որ դանակահարված վիճակում իրենց մոտ են տեղափոխվել 3 հոգի: 

Հիվանդանոց էին մեկնել ոստիկանության Մալաթիայի բաժնի օպերատիվ խումբը՝ բաժնի պետի օպերգծով տեղակալ Անդրանիկ Շահբազյանի գլխավորությամբ: Ոստիկանները պարզել էին, որ վիրավորներն են՝ Երևան քաղաքի Շահումյան 16-րդ փողոցի բնակիչ՝ 29-ամյա Գոռ Պողոսյանը, ով հիվանդանոց էր տեղափոխվել «որովայնի առաջնային պատի կտրած-ծակած վերք» ախտորոշմամբ, Երևան քաղաքի Տիչինայի փողոցի բնակիչ՝ 21-ամյա Ժորա Կարագուլյանը՝ «գլխի վնասվածք» ախտորոշմամբ և Երևան քաղաքի Տիչինայի փողոցի բնակիչ՝ 29-ամյա Մհեր Գրիգորյանը՝ «որովայնի և կրծքավանդակի ծակած վերքեր» ախտորոշմամբ: 

Հիվանդանոցում բժիշկները ոստիկաններին հայտնել էին, որ վերջիններս ի վիճակի չեն կատարվածի մասին հայտարարություն կամ բացատրություն տալու: Մալաթիայի ոստիկանները պարզել էին, որ նրանք հիվանդանոց էին տեղափոխվել Տիչինայի փոոցի թիվ 121 դպրոցի մոտ տեղի ունեցած վիճաբանության ժամանակ: 

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: