Վառոդը այրել է ափերի մեջ, վերքերին աղ, եռացրած ջուր լցրել. սերժանտը խոշտանգել է զինվորին՝ դիրքում քնելու պատճառով

1-in.am-ը գրում էՎերաքննիչ քրեական դատարանում ավարտվել է Նարեկ Գ.-ի և Հակոբ Չ.-ի գործի քննությունը:

Գործը քննվել է Սյունիքի մարզի ընդհանուր իրավասության դատարանում Արսեն Սարդարյանի նախագահությամբ:

Նարեկ Գ.-ին մեղադրանք էր առաջադրվել հետևյալ արարքների համար: Նա, հանդիսանալով ջոկի հրամանատար, կոչումով՝ սերժանտ, 2017 թվականի հունիսի 9-ից 23-ը ընդգրկված լինելով մարտական հերթապահության մեջ, լինելով դիրքի ավագ՝ դիրքի գետնատնակում ժամկետային զինծառայող, կոչումով շարքային Միքայել Ա.-ի կողմից քրոջ բջջային հեռախոսի համարն իրեն չտրամադրելու պատճառով վիճել է նրա հետ ու ծեծել է՝ պատճառելով ֆիզիկական ցավ:

Բացի այդ, նույն մարտական հերթապահության ընթացքում, ըստ մեղադրանքի, սերժանտ Նարեկ Գ.-ն զրույցներ է վարել շարքային Միքայելի հետ, վերջինիս կողմից կեղտոտ ճտքակոշիկներով ու ենթաօձիքով գտնվելը, դիրքում քնելը համարել է «սխալ արարք» ու դրա պատճառով բռնություն է գործադրել զինվորի նկատմամբ՝ սպառնալիքներ է հնչեցրել՝ առաջարկելով «սխալ արարքի» համար որպես պատիժ կամովին ընտրել կա՛մ ծեծվելը, կա՛մ դիրքի բոլոր զենքերով տագնապ կատարելը կա՛մ իրեն 20 հազար դրամ ու 1 զույգ ճտքակոշիկ տալը:

Զինվորը նախընտրել է վերջինը, հունիսի վերջին Նարեկ Գ.-ն շարքային Միքայելից ստացել է պահանջած 20 հազար դրամն ու ճտքակոշիկները: Միևնույն ժամանակ նա վերցրել է նաև տնից Միքայել Ա.-ի համար ուղարկված քաղցրավենիքն ու անձնական հիգիենայի պարագաները:

Բացի այդ, ըստ մեղադրանքի՝ 2017 թվականի հունիսի վերջին սերժանտ Նարեկ Գ.-ն զորանոցում զրուցել է շարքային Միքայել Ա.-ի հետ, մարտական հերթապահության ժամանակ դիրքում քնելը նորից մատնանշելով, այն անվանելով «սխալ արարք»՝ այդ արատավորող տեղեկությունը հրապարակելու սպառնալիքով դարձյալ Միքայել Ա.-ից պահանջել ու ստացել է 20 հազար դրամ:

Բացի այդ, ըստ մեղադրանքի՝ 2017 թվականի հուլիսի 12-ից 17-ը մարտական դիրքում քնելու պատճառով սերժանտ Նարեկ Գ.-ն ծեծել է շարքային Միքայել Ա.-ին ու պատճառել է վնասվածքներ:

Բացի այդ, ըստ մեղադրանքի՝ Նարեկ Գ.-ն շարքային Հակոբ Չ.-ի օժանդակությամբ ԱԿ-74 ինքնաձիգի փամփուշտների վառոդի օգտագործմամբ բռնություն է գործադրել շարքային Միքայել Ա.-ի նկատմամբ՝ վառոդը լցրել է նրա ձեռքերի ափերի մեջ ու կրակայրիչով այրել է՝ զինվորին պատճառելով երկու ձեռնափերի՝ ջերմային այրվածքի տեսքով՝ առողջության թեթև վնասի հատկանիշներ պարունակող վնասվածքներ:

Բացի այդ, ըստ մեղադրանքի՝ Նարեկ Գ.-ն, նաև այլ բռնություն է գործադրել Միքայելի նկատմամբ՝ նրա այրված ձեռնափերի մեջ աղ է լցրել, այնուհետև տափաշշից ջուր է լցրել աղի վրա և Միքայել Ա.-ին ֆիզիկական ցավ է պատճառել:

Բացի այդ, ըստ մեղադրանքի՝ երեկոյան ժամերին Նարեկ Գ.-ն Հակոբ Չ.-ի հետ նախնական համաձայնության գալով՝ նրա հետ միասին Միքայել Ա.-ին ապօրինի զրկել է ազատությունից՝ նրան մտցրել է մարտական դիրքում ջրահեռացման նպատակով փորված խոր փոսի մեջ ու պահել է այնտեղ…

Բացի այդ, ըստ մեղադրանքի՝ դիրքում քնելու պատճառով շարքային Միքայել Ա.-ին «դաս տալու» նպատակով սերժանտ Նարեկ Գ.-ն եռացրած ջուր է լցրել զինվորի աջ ձեռքին՝ նախաբազուկ-դաստակային շրջանում ջերմային այրվածքների տեսքով վնասվածքներ պատճառելով նրան:

Բացի այդ, երբ շարքային Միքայել Ա.-ն առողջական վիճակից բողոքել է, սերժանտ Նարեկ Գ.-ն ծեծել է նրան ու ստորացրել՝ ոտքով հարվածելով՝ գցել է գետնին, ապա փամփուշտի վառոդը լցրել է նրա հետույքի շրջանին ու կրակայրիչով այրել է՝ ջերմային այրվածքների տեսքով տուժողի առողջությանը պատճառելով թեթև վնասի հատկանիշներ պարունակող վնաս: Դրանից հետո Նարեկ Գ.-ն Միքայելին դարձյալ մտցրել է դիրքի ջրահեռացման խոր փոսի մեջ ու պահել է այնտեղ…

Բացի այդ, ըստ մեղադրանքի՝ 2017 թվականի հուլիսի 17-ին սերժանտ Նարեկ Գ.-ն շարքային Միքայել Ա.-ին կանչել է գետնատնակի մոտ, զրուցել է նրա հետ, մեղադրել է իրենից թաքուն ծխախոտ վերցնելու և իրեն այդ առիթով խաբելու՝ «սխալ արարք» կատարելու համար և արատավորող տեղեկությունը չհրապարակելու համար պահանջել է 20 հազար դրամ…

մանրամասն՝այստեղ: