Բաց նամակ Երեւանի քաղաքապետ Հայկ Մարությանին. հոսանքի տատանման պատճառով բնակիչները լուրջ խնդրի առաջ են կանգնել

Բաց նամակ՝Երեւանի քաղաքապետ Հայկ Մարությանին. հոսանքի տատանման պատճառով բնակիչները լուրջ խնդրի առաջ են կանգնել

Հարգելի պարոն քաղաքապետ, արդեն ութ օր է, ինչ Շիրազի 52 (14 հարկանի) շենքի բնակիչներս պարալիզացված ենք մեր բնակարններում, քանի որ 52 շենքի վերելակի անսարքության պատճառով, չենք կարողանում որեւէ կերպ տեղաշարժվել:
Մենք արդեն ծեր մարդիկ ենք. օգնող ձեռք չունենք, վերելակով մի կերպ տեղաշարժվելով կարողանում ենք ինչ-որ կերպ մեր օրվա գնումներն անել ու մեր դեղորայքը ձեռք բերել: Բայց արդեն ութ օր է. չենք կարողանում ո՛չ տանից դուրս գալ, ո՛չ շտապօգնգության դիմել, եւ ո՛չ էլ ինչ-որ մեկին օգնության կանչել, եւ չգիտենք էլ, թե այս անորոշությունը որքան ժամանակ դեռ պետք է շարունակվի:

Ծանր հիվանդությամբ՝քաղցկեղով, դիաբետով տառապող մարդը. ինչպես կարող է ութ օր գամված մնալ անկողնում, եւ ոչ մի դեղորայք չընդունել: Ո՞ր մեղքի համար:

Հարգելի պարոն քաղաքապետ, խնդիրը նրանումն է, որ հոսանքի լարման տատանման
պատճառով վնասվել է Շիրազի 52 շենքի վերելակի շարժիչը, որը վերականգնելու համար, մեզ հասած տեղեկությունների համաձայն, ՀԷՑ-ը դեռ պետք է նիստեր ու որոշումներ կայացնի՝ գումար փոխահատուցելու եւ վերելակը գործարկելու համար:
Էլ չենք խոսում այն մասին, թե նույն շենքում այդ չարաբաստիկ հոսանքի լարման պատճառով քանի ընտանիքի են վնաս հասցրել, եւ թե որքան էլեկտրատեխնիկա է շարքից դուրս եկել՝ այդ ամենաթողության արդյունքում:
Եւ ցավալին այն է, որ երբ ամեն անգամ այդ խնդրով դիմում ես ՀԷՑ-ին, այնքան են տանում-բերում, գրում-ջնջում, ու նյարդերդ քայքայում, որ այլեւս փոշմանում ես՝ խնդիրը վեր բարձրացնելու համար:
Ի դեպ, նման բարդ իրավիճակներում ոչ պակաս անտարբերություն է ցուցաբերվում նաեւ Աջափնյակ համայքնի համատիրության ներկայացուցիչների կողմից, որոնց բան ու գործը բնակչության գլխի տակ փափուկ բարձ դնելն է, այլ ոչ թե «մատը՝մատին խփելը»:

Երբ այդ նույն ՀԷՑ-ի աշխատակցին ցանկացած տարեց խնդրում է, որ տաս րոպե ուշ կարող է վճարում կատարել, քանի որ դեռ իր քոռ կոպեկ թոշակն անգամ չի ստացել, ՀԷՑ-ի աշխատակիցը առանց աչքը թարթելու, հոսանքը գլխին անջատում ու հեռանում է: Հիմա ինչո՞ւ պետք է օրերով, ժամերով, մենք ծերերս՝հիվանդ մարդիկ, նստենք ու սպասենք, թե երբ են ի վերջո պատկան կառույցները բարեհաճելու՝ փոխհատուցել վնասը…
Հարգելի քաղաքապետ, ուզում ենք Ձեզ տեղեկացնել նաեւ , որ իրականում Շիրազի 52 շենքի վերելակը գտնվում է կատաստրոֆիկ անմխիթար վիճակում, որի մասին բազմիցս ահազանգ ենք ե՛ւ համատիրությանը, ե՛ւ թաղապետարանին , ե՛ւ թե քաղաքապետարանին (նախկին քաղաքապետ Տարոն Մարգարյանի օրոք), սակայն ինչպես միշտ ձայն բարբառո հանապատի:

Պարոն Մարության, հուսով ենք, որ դուք որպես իսկական ընտրյալ եւ ժողովրդի իրական ներկայացուցիչ, ով ստանձնել է Երեւանի քաղաքապետի պատասխանատու աթոռը, ականջալուր կլինեք խնդրին, եւ որեւ լուծման տարբերակ կգտնեք՝ այս իրավիճակից մեզ դուրս բերելու համար:

Աջափնյակ համայնքի մի խումբ բնակիչներ