Մահվան ելքով վրաերթ Արարատի մարզում. Mercedes-ի վարորդը վրաերթի է ենթարկել հետիոտնին. վերջինը տեղում մահացել է. ոստիկանների ու քննիչների ճիշտ գործողությունների արդյունքում կանխվել է Mercedes -ի հրկիզման փորձը

Այսօր՝ փետրվարի 18-ին, մահվան ելքով վրաերթ է տեղի ունեցել Արարատի մարզում: Ժամը 19:00-ի սահմաններում Mercedes մակնիշի 35 XS 570 համարանիշի ավտոմեքենայի վարորդը Դարակերտ գյուղի գլխավոր ճանապարհին վրաերթի է ենթարկել հետիոտնին:

Ինչպես դեպքի վայրից հայտնում է ֆոտոլրագրող Գագիկ Շամշյանը, վրաերթի ենթարկվածը տեղում մահացել է:

Դեպքի վայր են ժամանել ճանապարհային ոստիկանության 2-րդ սպայական գումարտակ 1-ին վաշտի 2-րդ դասակի ծառայողները՝ դասակի հրամանատար Կարապետ Հարությունյանի և ավագ հետաքննիչ Մարգար Մարգարյանի գլխավորությամբ: 

Վրաերթի մասին ՃՈ 1-77 օպերատիվ կառավարման կենտրոնի պատասխանատու հերթապահ Երվանդ Ալեքսանյանը տեղեկությունը փոխանցել է ոստիկանության Մասիսի բաժին, որտեղից ժամանել են մեծ թվով ծառայողներ, քանի որ տեղեկություն էր ստացվել, որ մահացածի հարազատները փորձել էին ավտոմեքենան հրկիզել: 

Տեղում քննչական աշխատանքները ղեկավարել է Հայաստանի քննչական կոմիտեի Արարատի մարզային քննչական վարչության Մասիսի քննչական բաժնի քննիչ Արշակ Բաղդասարյանը, ում կողմից փաստի առթիվ հարուցվել է քրեական գործ՝ ՀՀ քր օր-ի 242 հոդվածի 2-րդ մասի հատկանիշներով:

Քննիչի հանձնարարականով ավտոմեքենան քարշակի միջոցով տեղափոխվեց ոստիկանության Մասիսի բաժնի պահպանվող հատուկ տարածք:

Ֆոտլրագրողը հայտնում է, որ, այնուամենայնիվ, ոստիկաններն ու քննիչները կարողացան մահացածի հարազատների հետ ճիշտ հոգեբանական բանակցություններ վարել, ովքեր հրաժարվեցին իրենց մտադրությունից, այն է ՝ ավտոմեքենան վնասելուց ու հրկիզելուց: 

Ոստիկանությունն ու քննչական բաժինը պարզում են մահացածի և վարորդի ինքնությունը:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Լուսանկարները՝ Գագիկ Շամշյանի