Լույս է տեսել Հայաստանի մարզական լրագրողների ֆեդերացիայի նախագահ Յուրի Ալեքսանյանի հեղինակած գիրքը.PHOTO

Այսօր Ավետիք Իսահակյանի գրադարանում մթնոլորտը տոնական ու մարզական էր. Հայաստանի մարզական լրագրողների ֆեդերացիայի նախագահ Յուրի Ալեքսանյանը, հանրությանը ներկայացրեց իր հեղինակած «Մարզական լրագրողի հուշերից» գիրքը, որը ներկաների կողմից ընդունվեց մեծ սիրով ու ջերմությամբ:
Մարզական լրագրության ոլորտում շուրջ կեսդարյա հիշողությունների ամփոփումը՝ հեղինակը յուրօրինակ կերպով ներկայացրել էր մեկ գրքում:

Մարզական լրագրող Յուրի Ալեքսանյանի՝ «Մարզական լրագրողի հուշերից» գիրքը, ներկայացնում էր համաշխարհային սպորտի բարձունքներ նվաճած և մեծ ճանաչում ունեցող հայաստանցի մարզիկներին, ինչն անշուշտ գովելի ու գնահատելի գործ է մեր օրերում: 

Գիրքը կազմված էր 3 մասից . «Չեմպիոններ», «Վաստակաշատ երախտավորներ», եւ «Խճանկար»:
Մարզական հեղինակությունների հաղթանակներից, բացի գրքում մեծ տեղ էր հատկացված նաեւ աշխատանքից դուրս նրանց մասին պատմող, նրանց կյանքից վերցված առանձին դրվագներն ու հետաքրքրաշարժ դիպվածները, ինչը որպես պատմություն՝ այսուհետ կմնա շատ-շատերի հուշերում…

Եւ ինչպես բացման խոսքում նշեց, հեղինակ Յուրի Ալեքսանյանը.«Նպատակս մեկն է եղել՝ ներկայացնել մեր չեմպիոններին ոչ թե իրենց նվաճումներով, այլ՝ որպես մարդ, ինչպիսի՞ն են կյանքում, առօրյայում: Եւ քանի որ ոչ բոլոր Օլիմպիական, աշխարհի ու Եվրոպայի չեմպիոնների պատմություններն են տեղ գտել առաջին գրքում, այդ պատճառով էլ՝ լույս կտեսնի նաեւ գրքի երկրորդ հատոր»:

Շնորհանդեսին ներկա, սպորտի վաստակավոր գործիչ Լևոն Սամվելյանն էլ, իր հերթին նկատեց.
«Դա լրագրող-հեղինակի 40 և ավել տարիների աշխատանքի արդյունքն է, որտեղ կան ոչ միայն հուշեր, այլև՝ փիլիսոփայություն, մանկավարժություն, հոգեբանություն, օլիմպիական դաստիարակություն և հումանիտար նշանակություն ունեցող շատ ու շատ պատմական իրադարձություններ» :

Նշենք, որ ի պատիվ մարզական լրագրող Յուրի Ալեքսանյանի, Շնորհանդեսին ներկա էին Հայաստանի մարզական պատմությունը կերտած վաստակաշատ մարզիկներ ու լրագրողներ, որոնցից յուրաքանչյուրը անդրադարձավ գրքին ու հեղինակին:
Բանախոսների շարքում էին նաեւ Հայաստանի մարզական լրագրության հիմնադիրներից 88-ամյա Միսաք Նազարյանը, տեխնիկական գիտությունների թեկնածու Կառլեն Ալեքսանյանը, մարզական լրագրող Գևորգ Մարիկյանը, Հայաստանի կանանց «Հատիս» բասկետբոլի թիմի նախկին ավագ, ԽՍՀՄ կանանց հավաքականի, Եվրոպայի և աշխարհի առաջնությունների բազմակի չեմպիոն, «Բարեկամություն» մրցաշարի հաղթող Անահիտ Սարգսյանը, կինոգետ Ռոբերտ Մաթոսյանը և շատ ուրիշներ:

Տեղեկացնենք նաեւ, որ մարզական լրագրող, սիրված ու հարգված Պրոֆեսինալի՝ Յուրի Ալեքսանյանի գիրքը տպագրվել է 300 օրինակից, ինչը, ըստ ներկաների, ավելացման անհրաժեշտություն անպայման կունենա:

Fnews.am-ը նույնպես Շնորհավորում է մարզական լրագրող Յուրի Ալեքսանյանին՝ իր հեղինակած լավագույն Ձեռնարկի առիթով եւ մաղթում նոր ձեռքբերումներ ու հաջողություններ՝ գալիք գործերում: