«Հրազդան» ՔԿՀ-ի դատապարտյալ Աշոտ Հակոբյանը պայմանական վաղաժամկետ ազատ արձակվեց. Վերաքննիչ դատարանը բավարարել է պաշտպանի բողոքը

2019թ. փետրվարի 27-ին Վերաքննիչ դատարանը, քննության առնելով ՀՀ ԱՆ «Հրազդան» ՔԿՀ-ի դատապարտյալ Աշոտ Հակոբյանին պայմանական վաղաժամկետ ազատ արձակելու վերաբերյալ Առաջին ատյանի դատարանի դեմ Հայաստանի Հելսինկյան կոմիտեի փաստաբան Ռոբերտ Ռևազյանի կողմից ներկայացված բողոքը, որոշեց բողոքը բավարարել և Աշոտ Հակոբյանին ազատ արձակել:

Հիշեցնենք, որ Աշոտ Հակոբյանը դատապարտվել էր 11 տարվա ազատազրկման, որից 9 տարին արդեն կրել էր:

Աշոտ Հակոբյանի պաշտպան Ռոբերտ Ռևազյանը նշեց, որ պատժից    վաղաժամկետ ազատման ինստիտուտը կարևոր դեր է կատարում անձի ուղղման գործընթացում, և եթե նախկինում ճնշող մեծամասնության դեպքում անձինք պայմանական վաղաժամկետ ազատ չէին արձակվում, դա բացասաբար էր ազդում նրանց վարքագծի վրա.

«Անձը որևէ շահագրգռվածություն չուներ, սակայն, եթե նա վստահ լինի, որ դրական վարքագիծ ունենալու դեպքում կարող է ազատ արձակվել, ապա դա խթան կհանդիսանա, որ նա փորձի իրեն լավագույնս դրսևորել: Սակայն ամենակարևորն այն է, որ դատարանները գնահատեն դատապարտյալների այդ ջանքերը»:

Հայաստանի հելսինկյան կոմիտե