Մարտական հերթապահության ժամանակ զինծառայողը կրակել դիտակետում նստած ծառայակցի գլխի ուղղությամբ. դատարանն ազատեց պատժի կրումից

Դիրքում մարտական հերթապահություն իրականացնելու ժամանակ ծառայակցի ուղղությամբ կրակոց արձակած ժամկետային զինծառայողի նկատմամբ քրեական հետապնդումը դադարեցվել է. Նա ազատվել է պատժի կրումից՝ համաներման ակտի կիրառմամբ։

«Փաստինֆո»-ի հաղորդմամբ՝ 2016 թվականի նոյեմբերի 22-ին մարտական հերթապահության ժամանակ գլխի շրջանում ծանր մարմնական վնասվածք էր ստացել ժամկետային զինծառայող Ազնավուր Բալեյանը։ Հարուցված քրեական գործով նախաքննական մարմինը մեղադրանք էր առաջադրել ծառայակցին՝ ՀՀ քրեական օրենսգրքի 34-105-րդ հոդվածի 1-ին մասով՝ հոգեկան խիստ հուզմունքի վիճակում սպանության փորձ կատարելու համար։

Նախնական քննության տվյալներով՝ զինծառայողը 2016 թվականի նոյեմբերի 11- 25-ն իրականացրել է մարտական հերթապահություն՝ նույն զորամասի պահպանության տեղամասի մարտական դիրքում որպես դիտորդ՝ դիրքի առաջնային գծի դիտակետում։ 2016 թվականի նոյեմբերի 22-ին` ժամը 09:40-ի սահմաններում, նույն ջոկի ժամկետային զինծառայող, իր հետ միևնույն հերթափոխում որպես դիտորդ կարգված շարքային Ազնավուր Բալեյանի կողմից դիտակետում քնելու շուրջ առաջացած պարզաբանումների ընթացքում իր հասցեին հնչեցված հայհոյանքներից ստորացված զգալով զինծառայողը Ազնավուր Բալեյանին դիտավորությամբ կյանքից զրկելու նպատակով «ԱԿ-74» տեսակի ինքնաձգով մեկ կրակոց է արձակել դիտակետի ներսում` իրենից մոտ մեկ մետր հեռավորության վրա գետնին նստած Ա.Բալեյանի գլխի ուղղությամբ։ Փորձաքննության եզրակացության ժամանած զինծառայողը գտնվել է հոգեկան խիստ հուզմունքի` աֆեկտի վիճակում։Կրակոցի հետեւանքով Բալեյանը գլխի շրջանում ստացել է կյանքի վտանգ սպառնացող վնասվածք ու տեղափոխվել հոսպիտալ։ Ցուցաբերված բուժօգնության արդյունքում բժիշկներին հաջողվել է փրկել նրա կյանքը։

Հիմնավորված համարելով առաջադրված մեղադրանքը՝ դատարանն արձանագրել է, որ նշված հոդվածի վրա տարածվում է Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ հայտարարված համաներումը եւ դրա կիրառմամբ զինծառայողի նկատմամբ դադարեցրել քրեական հետապնդումը, իսկ քրեական գործի վարույթը՝ կարճել:

Նշենք,որ դատարանի որոշմամբ Արա Արտակի Ներսեսյանի նկատմամբ ընտրված խափանման միջոցը` հրամանատարության հսկողությանը հանձնելը, վերացվել է:

Աղբյուր` Փաստինֆո