Վիեննայում քննարկվել է բանակցություններին Արցախի մասնակցության հարցը, կողմերը համաձայնության չեն եկել. Նիկոլ Փաշինյան

ՀՀ վարչապետ Նիկոլ Փաշինյանն իր ու Ադրբեջանի նախագահ Իլհամ Ալիևի հանդիպումներում կարևորում է նոր տրամաբանության ու կուլտուրայի մոտեցումը։ Նա ֆեյսբուքյան իր ուղիղ եթերի ժամանակ, անդրադառնալով Ադրբեջանի նախագահի հետ Վիեննայում ունեցած հանդիպմանը, հայտարարեց, որ հանդիպումներից հետո չեն փնտրում հաղթողներ կամ պարտվողներ։ Փաշինյանը շեշտեց՝ կարևոր է, որ հանդիպումից հետո կողմերն իրենց մեկնաբանություններում 100 տոկոսով հավատարիմ մնան բանակցությունների տրամաբանությանը։ Նա նկատեց, որ 2 երկրների ղեկավարների՝ ժամեր տևած խոսակցությունից հետո լինում են հայտարարություններ, որ տրամագծորեն տարբերվում են իրարից։

«Համաձայեք՝ սա լուրջ խնդիր է առաջացնում ու հարցի տակ է դնում պրոցեսի ամբողջ լրջությունը։ Մեզ համար չափազանց կարևոր է լինել մաքսիմալ կոռեկտ, մաքսիմալ բանակցային տրամաբանության շրջանակում։ Սա է պատճառը, որ հանդիպմանը հաջորդում է համատեղ հայտարարություն՝ տվյալ դեպքում ԵԱՀԿ Մինսկի խմբի համանախագահների ու 2 երկրների ԱԳ նախարարների կողմից։ Այդ հայտարարությունն, ընդհանուր առմամբ ընդգծում է խոսակցության տրամաբանություն և այն ինչի շուրջ կողմերը կարողացել է համաձայնել որպես տեքստ»,- ասաց նա։

Վարչապետ Փաշինյանը նկատեց, որ վերջին օրերին ադրբեջանական կողմը հադես է գալիս հայտարարություններով, որոնք, ըստ էության, դուրս են համատեղ հայտարարության շրջանակից։ Նիկոլ Փաշինյանն ուշադրություն հրավիրեց այն հանգամանքի վրա, որ իր կարծիքով, բանակցություններն առավել արդյունավետ դարձնելու համար պետք է մոռանանք հին ու կրկնվող տեքստերը, որոնք ժամանակի հետ ցույց են տվել իրենց անարդյունավետությունը։ Փաշինյանն այս հարցում կարևոր է որոշակի պարզաբանումներ ներկայացնել։

«Վերահաստատում ենք, որ Վիեննայի բանակցություններին գնացել էին Ստեփանակերտի օրակարգով, այսինքն՝ այն օրակարգով, ինչ մենք նախանշել էին մարտի 12-ին Ստեփանակերտում ՀՀ և Արցախի հանրապետությունների անվտանգության խորհրդի համատեղ նիստում։ Այս նիստում ես ասել էի, որ մեզ համար շատ կարևոր է Արցախի ներկայացուցչի մասնակցությունը բանակցային գործընթացում։ Հիմա էլ ասում եմ, որ սա բանակցային ֆորմատի փոփոխության պահանջ, ակնկալիք չէ, ոչ էլ քմահաճույք, ոչ էլ նախապայման, սա զուտ բանակցային գործընթացն արդյունավետ դարձնելուն է միտված»,- շեշտեց վարչապետը։

Նիկոլ Փաշինյանը նշեց, որ հիմա ադրբեջանական կողմը հայտարարում է, որ այս բանակցություններից իրենք հաղթող են դուրս եկել, քանի որ բանակցությունների ձևաչափը չի փոխվում։ Փաշինյանն ադրբեջանական կողմի նման հայտարարությունը ոչ կոռեկտ որակեց՝ նկատելով, որ այն չի տեղավորվում բանակցությունների տրամաբանության մեջ։

«Նաև ուշադրություն եմ հրավիրում այն փաստի վրա, որ, Արցախի մասնակցության հարց դնելով, մենք ֆորմատի փոփոխության հարց չենք դրել։ ԵԱՀԿ Մինսկի խմբի համանախագահության ներքո բանակցության ֆորմատը կասկածի տակ չէ, հարց այն է, թե ինչ է նշանակում այդ ֆորմատը։ ԼՂՀ-ն շատ երկար ժամանակ եղել է բանակցությունների կողմ, և ԵԱՀԿ Մինսկի խմբի ձևավորման առաջին փուլից Ղարաբաղի մասնակցությունը եղել է հենց բանակցային ֆորմատի տրամաբանության հիմքում։ Վիեննայում արդյոք քննարկվե՞լ է Արցախի մասնակցության հարցը՝ իհարկե, քննարկվել է, արդյո՞ք մենք փաստարկել այն այդ տեսակետ՝ իհարկե, լրջորեն փաստարկել ենք, արդյո՞ք այս հարցի վերաբերյալ եկել են համաձայնության՝ իհարկե, չեն եկել համաձայնության, արդյո՞ք սա նշանակում է, որ այս հարցը քննարկումներից դուրս եկավ՝ իհարկե, ոչ, սա նշանակում է, որ այս թեմայի շուրջ քննարկումները պետք է շարունակենք»,- շարունակեց Նիկոլ Փաշինյանը։

Մանրամասները ՝ տեսանյութում։