«Սա ուղղակի սրբապղծություն է.հետո էլ ասում են մեր տղան ա, մեր հերոսն ա, լավ բա մեկը չկա՞ր էնտեղ, մի ոստիկան չկա՞ր՝ կանգներ էդ թափթփուկի ձեռքը բռներ»

«Եռաբլուր» զինվորական պանթեոնում, այսօր՝ ապրիլի 2-ին, անհայտ անձինք ավտոմեքենաներ են թալանել, որոնցից մեկը պատկանել է ապրիլյան պատերազմում զոհված կապիտան Արմենակ Ուրֆանյանի մորաքրոջ տղային:

Այս մասին Fnews.am-ի հետ զրույցում ասաց հերոսի մայրը` տիկին Համեստը` նկատելով.

-Սա ուղղակի սրբապղծություն է, խոսքեր չեմ գտնում այս բարբարոսությանը անուն դնելու: Շատ ցավալի է, հետո էլ ասում են մեր տղան ա, մեր հերոսն ա, լավ բա մեկը չկա՞ր էնտեղ, մի ոստիկան չկա՞ր կանգներ էդ թափթփուկի ձեռքը բռներ: Ինձ թվում է, տեղի 17-18 տարեկան թափթփուկ լակոտներն են եղել, ոստիկանությունը հենց հեռացել է, իրենք իրենց սեւ գործն արել են:
Հա, ես հասկանում են, որ դիտավորյալ հատուկ մեր մեքենան չեն ուզեցել անեն, բայց դա ի՞նչ կապ ունի, սա սրբապղծություն է: էս օրով. նման վայրում, նման հանցանք, ես ուղղակի մեծ ցավ եմ ապրում: Ասում են` հենց ոստիկանությունը գնացել է մի կողմի վրա, անցել են գործի, ես ուղղակի հիրասթափված եմ: Ոստիկանությունից գոնե պետք է էդ մեքենանների կողքը լինեին, լավ էս ի՞նչ է կատարվում… Ես ինձ շատ շատ վատ եմ ինձ զգում, ախր ո՞նց կարելի է մեր վիշտը, նման ձեւով… չգիտեմ:

Ավելի վաղ հայտնել էին, որ անհայտ անձինք երկու ավտոմեքենայի կողային ապակիները կոտրելու միջոցով հափշտակել են խոշոր գումար եւ թանկարժեք գույք: Մասնավորապես, Արմենակ Ուրֆանյանի հարազատներին պատկանող մեքենայից հափշտակել են խոշոր չափի գումար: Հատկանշական է, որ դեպքը տեղի է ունեցել հենց այն ժամանակ, երբ «Եռաբլուր» էր այցելել ՀՀ վարչապետ Նիկոլ Փաշինյանը եւ այդ ընթացքում «Եռաբլուրում» ուժեղացված հսկողություն էին իրականացնում ոստիկանները: Իրավապահները թույլ չեն տվել պանթեոնի վերեւի հատվածում կայանել ավտոմեքենաները, ուստի մարդիկ ստիպված են եղել ոստիկանների ուղղորդմամբ մեքենաները կայանել նրանց նշված վայրում, իսկ երբ վերադարձել են՝ հայտնաբերել են ավտոմեքենաները թալանված: