Հիմա, ի՞նչ պատասխան ենք տալու սեւազգեստ մայրերին, եւ ի՞նչ ենք ասելու սահմանը պահող այսօրվա մեր հերոսներին…. Ո՞ր նրանք հանուն ինչի՞ են վտանգում իրենց կյանքը՝ ամեն վայրկյան…

Առնվազն տարակուսելի է Նիկոլ Փաշինյանի տիկին՝ Աննա Հակոբյանի «Ամերիկայի  Ձայն» -ին տված հարցազրույցում հնչեցված այն միտքը. մեջբերում եմ. «Այս նախաձեռնության միակ իմաստը զինվորների կյանքը պաշտպանելն է. եւ նրանց ուղղակի չզոհաբերելը՝ հանուն ոչնչի: Որովհետեւ հակամարտության պատմության այս տարիների ընթացքում, բազմաթիվ զոհեր ենք ունեցել երկու կողմից էլ. հազարավոր զոհեր ենք ունեցել, բայց մենք նրանց կյանքը զոհաբերել ենք հանուն ոչնչի:Որովհետեւ ոչ մի կերպ, ոչ մի անգամ այդ զոհերը չեն մոտեցրել մեզ հակամարտության կարգավորմանը: Եթե չասենք որ ընդհակառակը՝ հեռացրել են կարգավորումից»:

Տիկի՛ն Աննա , մինչ հանունի մասին խոսելը. չպետք է մոռանանք, որ Արցախյան գոյամարտ ենք ունեցել: Եւ առաջնահերթ. մեր տղաները, մեր հերոսները իրենց կյանքը նվիրաբերել են հայրենիքին՝ որպեսզի գոյատեւենք, եւ որպեսզի ապրեն մեր սերունդները:
Կարծում եմ, Ձեզ ծանոթ են. խաղաղ, աշխատող այգեգործի վրա կրակող, կենդանի մարդու գլուխ կտրող, քնած սպային կացնահարող նենգ ու խորամանկ թշնամու դավադիր ցանկությունները…

Ամենատարբեր ժամանակներում, Ադրբեջանի իշխանություններն են անընդհատ անհեթեթ հայտարարություններ հնչեցնում. մեկ նշում՝ թե Արցախն Ադրբեջանի պատմական տարածքն է, մեկ ասում, որ Սյունիքն է ադրբեջանական, ու բանը հասել էր նրան, որ արդեն Երևանն էին իրենցը համարում:

Այդ իրականությունը կորցրած Էլչիբեյն էր, որ սովորություն ուներ հայտարարելու, թե Արցախը իր համար խոչընդոտ չէ, եւ որ շուտով ինքը, ոտքերը լվանալու է Սևանա լճում՝ հաղթելով թույլ ու անպաշտպան, շրջափակման մեջ գտնվող Հայաստանին։
Իսկ մեր տղաները հերոսաբար կռվելով զոհվում էին, եւ հիմա էլ շարունակում են իրենց կյանքը նվիրաբերել, որպեսզի ոխակալ թշնամու այս եւ շատ այլ ցանկություններ իրականություն չդառնան:
Նրանք հերոսբար զոհվում էին. հանուն հայ ազգի, հանուն մեր ինքնության պահպանման, հանուն մեր պետականության, հանուն մեր սերունդների շարունակության…

Որ ունենանք Հայաստանի Հանրապետություն. հայկական դրոշ, պետություն, որ ունենաք վարչապետ, վարչապետն ունենա տիկին, ով որպես վարչապետի տիկինը հարցազրույցներ տրամադրի տարբեր միջազգային լրատվամիջոցների, եւ որ ամենակարեւորն է՝ նման վրիպումներ թույլ չտա…որ մեր տղաները զոհվել են՝ հանուն ոչնչի:

Հիմա, տիկին Աննա. մենք ի՞նչ պատասխան ենք տալու զոհված հերոսների ծնողներին, հարազատներին, նրանց երեխաներին, ի՞նչ ենք ասելու սեւազգեստ մայրերին, եւ ի՞նչ ենք ասելու սահմանը պահող այսօրվա մեր հերոսներին…. Ո՞ր նրանք հանուն ինչի՞ են վտանգում իրենց կյանքը՝ ամեն վայրկյան…

ԳԱՅԱՆԵ   ԶԱՐԳԱՐՅԱՆ