«Դաստակները լրիվ արյունլվիկ էր, էնքան էին ծեծել, hիվանդանոցում գալստուկ էին փաթաթել, որ չերևան վերքերը».խոշտանգում ոստիկանությունում. forrights.am

Այսօր Հայաստանի ոստիկանությունը նշում է ոստիկանի օրը: Կհնչեն ելույթներ Նոր Հայաստանի նոր, վերափոխված ոստիկանության մասին՝ «ոստիկանը մերն է» հեղափոխական կարգախոսների կոնտեքստում: 

Սակայն, ինչպես պարզվեց, ոստիկանության շարքերում դեռ պահպանվում են ոչ միայն «քոչարյանասերժական ռեժիմի» մեթոդներով, այլև ստալինյան բռնարարքների մեթոդաբանությամբ գործող ոստիկաններ, որոնք ոչ մի դեպքում չեն կարող մերը լինել: Ու մինչև նրանք չբացահայտվեն ու պատասխան չտան օրենքի առաջ, ոստիկանը չի կարող մերը լինել: 

Մինչդեռ ապրիլի 8-ին «Արմենիա» բժշկական կենտրոնում մահացած 36-ամյա Էդգար Ծատինյանի դեպքով, որը հարազատների պնդմամբ, մահացել է ոստիկանության բաժանմունքում դաժանորեն ծեծվելու, ահաբեկվելու, այնուհետև սպառնալիքի պատճառով վտանգավոր թմրանյութ կուլ տալու ու բժիշկների անտարբերության պատճառով, ՀՀ ոստիկանությունը հետաքննություն է սկսել սուտ մատնության հոդվածով: Ասել է թե՝ մահացածի հարազատների, ոչ թե նրան խոշտանգած ոստիկանների դեմ: Ոստիկանների դեմ բողոքի առթիվ միայն ծառայողական քննություն է նշանակվել: 

Մահացած Էդգարը կին ունի, երկու երեխա, մեկն՝ առաջին կնոջից, մայր ու քույր: Ամուսնուն նոր հուղարկավորած Էդգարի կինը՝ Սաթենիկ Մելքոնյանն այսօր արդարություն է խնդրում, որ ոչ ոք այլևս սգավոր ու որբ չդառնա: 

Մահացածի մայրը՝ Լարիսա Եփարյանը պատմեց, որ տղային ոստիկանությունում խոշտանգել են՝ փորձելով հարևանի դեմ ծեր կնոջ սպանության ցուցմունք կորզել: 

«Կողքի շենքում ծեր կին էին սպանել, ապրիլի 7-ին ոստիկանները եկել էին, թաղի բոլոր տղերքին տարել էին: Կիրակի օր էր, քանի որ կիրակի օրով ոստիկանությունում մարդ չի լինում, տարել էին, որ լավ ծեծեին, ծեծելով սպանեին: Կենտրոնի ոստիկանները կանդալներով Էդգարին տարել ու Մասիվի ոստիկանությունում ծեծել էին: Դաստակները լրիվ արյունլվիկ էր, էնքան էին ծեծել, իսկ հիվանդանոցում դաստակներին գալստուկ էին փաթաթել, որ չերևան վերքերը»,- Forrights.am-ի հետ զրույցում պատմեց որդուն կորցրած մայրը: 

Մոր խոսքով՝ տղան իրեն հիվանդանոցում պատմել է, որ ոստիկանությունում ասել է՝ ջուր եմ ուզում, տարել են զուգարան, հայհոյելով «գցել են քացու տակ»: «Էնքան են քացով խփել, տղաս ասել ա՝ ոտքիս մեջ շիշ կա, մի խփեք, ոտքս ցավում ա: Ոստիկաններն ասել են՝ ասա որ ոտքդ ա, որ էդ ոտքդ կտրենք: Ջուրը շփել են վրեն՝ էս էլ քեզ ջուր: Ոստիկաններն իմ տղային ասել են՝ հենց հիմա գրի, որ դու տեսել ես, որ հարևան Արմանն ու իր կինն են այդ կնոջը սպանել»,-պատմեց վշտահար մայրը՝ շարունակելով. 

«Արմանն ու իր կինը երիտասարդ ամուսիններ են, փոքր երեխա ունեն: Էդգարն ասել է՝ ես ըտենց բան չեմ գրի, ես չեմ տեսել, ո՞նց ըտենց բան գրեմ: Ոստիկանն ասել ա՝ դե որ չես գրի, հեսա քրիստիկին կգցենք ջեբդ, կգնաս 7-15 տարի կդատվես: Էդգարը հարցրել ա՝ քրիստիկն ո՞վ ա, ասել են կրիստալը: Դե ինքն էլ, որ դատված ա եղել նախկին կնոջ հետ վեճերի պատճառով, վախեցել ա: Հանել ա ու վախից էդ թմրանյութը փաթեթով գցել ա իրա բերանը, երեք գրամ կրիստալ ա եղել»,- պատմեց մայրը:

Մոր խոսքով՝ ծեծված վիճակում ոստիկանները Էդգարի ձեռքից բռնելով ստիպել են ինչ որ թղթեր ստորագրել: «Էնքան վիճակը վատ է եղել, որ չի կարողացել հասկանալ՝ ինչ թղթեր էին»: 

մանրամասն՝այստեղ: