Արտակարգ դեպք Տավուշի մարզում. «Զնդանչի Զազոն» դիմել է ոստիկաններին ու հայտնել. իր հարևաններ Կայծակյանն ու Որոտյանը հողատարածքի պատճառով միմյանց ծեծում են. ոստիկանների օպերատիվ գործողությունների արդյունքում «բանը կարկուտին չհասավ»

SHAMSHYAN.com-ի տեղեկությյուններով՝ երեկ, մայիսի 21-ին, վիճաբանություն ու ծեծկռտուք է տեղի ունեցել Տավուշի մարզում։ Ժամը 13։30-ի սահմաններում ոստիկանության Տավուշի մարզի բաժիններից մեկում ահազանգ է ստացվել, որ նշված բաժնի կողմից սպասարկվող վարչական տարածքի Կամոյի փողոցի տներից մեկում վիճաբանություն է տեղի ունենում։ 

Ինչպես հայտնում է ֆոտոլրագրող Գագիկ Շամշյանը, ահազանգով դեպի վայր են մեկնել տարածքի ոստիկանները, ովքեր պարզել են, որ հողատարածքի հետ կապված վիճաբանության ժամանակ 51-ամյա Արամ Կայծակյանը մետաղաձողով մի քանի անգամ հարվածել է հարևանի՝ 60-ամյա Հրայր Որոտյանի մարմնի տարբեր մասերին՝ պատճառելով մարմնական վնասվածքներ։

Փաստի առթիվ ոստիկանության տարածքային բաժնի հետաքննչական բաժանմունքում նյութեր են նախապատրաստվում։ Նշանակվել է դատաբժշկական փորձաքննություն։

Ֆոտոլրագրողի տեղեկություններով՝ Ա. Կայծակյանն ու Հ. Որոտյանը հրավիրվել են ոստիկանություն, կատարվածի մասին բացատրություն են տվել և բաց թողնվել։

Գ. Շամշյանի տեղեկություններով՝ դեպքի մասին տեղեկությունը ոստիկանություն է հայտնել վիճաբանողների հարևան՝ «Զնդանչի Զազոն»։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: