Այս օրերին «օրենքով գողեր» համարվող երկու առանցքային դեմքերի հետ՝ տարբեր հանդիպումներ, քննարկումներ են տեղի ունենում

Մամուլում ակտիվորեն լուրեր են շրջանառվում այն մասին, որ Հայաստանի իշխանություններն առաջիկայում խստացնելու են քրեակատարողական հիմնարկների վերահսկողությունը, այսպես կոչված՝ «զոն նայողների», «օրենքով գողերի» եւ քրեական հեղինակությունների համար, ասում են բարդ օրեր են սկսվելու: Մասնավորապես ըստ լուրերի՝ «օրենքով գողերին» եւ «զոն նայողներին» տեղափոխելու են ԱԱԾ-ի «պադվալ»՝ «Երեւան-Կենտրոն» ՔԿՀ, իսկ բանտերում քրեական հեղինակություն համարվողների մեծ մասին՝ Գորիսի ՔԿՀ։

Եւ թե ի՞նչ դրական եւ բացասական հետեւանքներ կարող է իր հետ բերել այս «օպերացիան», եւ թե ի՞նչ վերադասավորումներ են իրարականում սպասվում քրեական աշխարհում ներկա փուլում , եւ թե ովքեր են այս պահին իրադրության տերերը, այս եւ այլ հարցերի շուրջ Newsmedia-ն փորձեց ստանալ հասարակական-քաղաքական գործիչ ԳՈՒՐԳԵՆ ԵՂԻԱԶԱՐՅԱՆԻ մեկնաբանությունը, ով փաստեց.

-Նախ եւ առաջ ուզում եմ ասել, որ «օրենքով գողերին» եւ «զոն նայողներին» մեկ կալանավայր տեղափոխելը՝ նոր պրակտիկա չէ: Այդ պրակտիկան օգտագործվել է նախկին ՍՍՀ-ում՝ մի քան անգամ: Վերջին անգամ ՍՍՀ փլուզումից առաջ եւս, այդ գործիքակազմը օգտագործվեց եւ որքան հիշում եմ օրենքով գողերին տեղավորեցին «Սպիտակ Կարապում»: «Օրենքով գողերին» տեղավորում էին մի խցում՝ ստեղծելով բավական անհարմար վիճակ: Մասնավորապես, գողական օրենքը թույլ չէր տալիս, որ նրանք խուց մաքրեն. այլ գործողություններ կատարեն կապված անձնական հիգենիայի հետ, եւ այլն: Փաստորեն ստեղծվում էր իրավիճակ, որ «Օրենքով գողերը» լուրջ կոնֆլիկտների մեջ էին մտնում, թե ով պետք է մաքրի խուցը: Հենց դա բերում էր ներքին բախումների:
Հիմա ես չգիտեմ, թե սրանք ինչ են ուզում անել եւ ինչպես են ցանկանում դա անել: Բայց ըստ օդում կախված լուրերի, այս օրերին կոնկրետ օրենքով գող համարվող երկու առանցքային դեմքերի հետ՝ տարբեր հանդիպումներ, քննարկումներ են տեղի ունենում:

-Նկատի ունեք ազատազրկման վայրերում գտնվողների՞, թե՞ ազատության մեջ գտնվող «օրենքով գողերի»:

- Ոչ միայն, նաեւ ազատության մեջ:

- Այսինքն իրենց կարծիքներն ե՞ն ուզում լսել:

-Չէ, չէ, նաեւ այլ խոսակցություններ են ընթանում:

-Լավ, եթե մի պահ պատկերացնենք, որ իրականում կարող ենք վերադառնալ ՍՍՀ-ի պրակտիկային, ի՞նչ է լինելու ՔԿՀ-ներում:

-Կալանավայրերում կսկսվի բեսպրեդել, որովհետեւ այսօր կալանավայրերը հանդարտ պահողները իրականում իրենք են՝ «օրենքով գողերն» ու «զոն նայողները»:

-Եթե ամփոփենք մեր զրույցը, ապա ըստ Ձեզ ի՞նչ է կատարվում քրեական աշխարհում այս պահին, ովքեր են այսօր իրավիճակի տերերը:

-Կարճ պատասխանեմ. քրեական աշխարհ ոնց կար, այդպես էլ մնացել է: Եւ այո, այդ աշխարհում այսօր լուրջ վերադասավորումներ կատարվում են:

- Ի դեպ, խոսակցություններ կան, որ ՀՀ-ում առաջիկայում «օրենքով գողերի» նոր հավաք է սպասվում: Իսկ դուք նման տեղեկություն ունեք, թե՞…

-Եկեք այդ հարցին չպատասխանեմ, հստակ ոչինչ ասել չեմ կարող, չեմ տիրապետում նման տեղեկության այս պահին:

Զրույցը՝ Նոնա Ադամյանի