Գործը կարծես փորձում են դեպի փակուղի տանել. Ուշագրավ մանրամասներ նախկին բարձրաստիճան պաշտոնյանների կողմից բիզնես խլելու գործով

Դեռեւս նախորդ տարվա օգոստոս ամսին` Հայաստանի քննչական կոմիտեն մասնավորապես հայտարարել էր. « ՀՀ օրենսդիր և գործադիր մարմինների պատասխանատու անձանց կողմից պաշտոնեական լիազորություններն անցնելու, խարդախություն կատարելու առերևույթ դեպքերի վերաբերյալ փաստական տվյալներ են ձեռք բերվել։

Տվյալները ձեռք են բերվել ՀՀ քննչական կոմիտեի ՀԿԳ քննության գլխավոր վարչության կոռուպցիոն, սեփականության դեմ ուղղված հանցագործությունների և կիբեռհանցագործությունների քննության վարչության վարույթում քննվող քրեական գործով»:
Արդյունքում քրեական գործ հարուցվեց «Ավազահատիկ» ՍՊ ընկերության տնօրենի կողմից ներկայացված հաղորդման հիման վրա, եւ ձեռնարկված քննչական գործողությունների արդյունքում պարզվեց, որ ընկերությունը հիմնադրվել է 2000 թվականին և Արարատի մարզում զբաղվել է հանքարդյունաբերությամբ։
Ընկերությունը «ներգրավելով վարկային միջոցներ՝ կատարել է շուրջ 80 000 ԱՄՆ դոլարի կապիտալ ներդրում՝ ձեռք բերելով ավազի լվացման և մաղման հոսքագծեր, սակայն 2008 թվականին բարձրաստիճան պաշտոնատար անձինք ստեղծել են արհեստական խոչընդոտներ, պահանջելով ընկերության բաժնեմասերի 60 տոկոսը, նշելով, որ հակառակ պարագայում հանքերը չեն շահագործվի։ Ընդ որում, բաժնեմասերի 60 տոկոսը պահանջվել է ձևակերպել երկու տարբեր անձանց անունով՝ յուրաքանչյուրին 30 տոկոս»,– ասվում էր հաղորդման մեջ։
Բացի այդ, հաղորդման մեջ ասվում էր, որ Նորամարգ համայնքի ղեկավարը հայցադիմում է ներկայացրել դատարան՝ հողատարածքի վարձակալության վերաբերյալ «Ավազահատիկ» ՍՊ ընկերության տնօրենի հետ ավելի վաղ ստորագրված պայմանագիրը լուծարելու վերաբերյալ։ Նշված հողատարածքում ընկերությունը զբաղվում էր ավազի հանույթով։ Դատարանը բավարարել է հայցադիմումը, որից հետո նոր պայմանագիր է ստորագրվել տվյալ հողատարածքի վարձակալության վերաբերյալ այլ սեփականատերերի հետ։

ՍՊԸ-ի ընկերության հիմնադիրը և այլ վկաներ, իրենց ցուցմունքներում առերևույթ չարաշահումներին առնչություն ունեցած անձանց թվում մատնանշել էին Հովիկ և Ջոնիկ Աբրահամյանների, ինչպես նաեև Ալիկ Սարգսյանի անունները։

Որոշ ժամանակ անց` Հովիկ Աբրահամյանին մեղադրանք է առաջադրվել ՔՕ 309 հոդվածի 1-ին մասով՝ պաշտոնեական լիազորությունների չարաշահում եւ ՔՕ 310 հոդվածով՝ ձեռնարկատաիրական գործունեությանը ապօրինի մասնակցելը։ Հավելենք, որ քրեական գործը հարուցված է «Ավազահատիկ» ՍՊԸ-ի հետ կապված գործի շրջանակներում:
Ի՞նչ փուլում է սույն գործով նախաքննությունը, ովքեր այս պահին մեղադրյալի կարգավիճակում` բացի նախկին վարչապետից, Newsmedia.am-ի թղթակիցը փորձեց պարզել
«Ավազահատիկ» ՍՊԸ-իհիմնադիր Գեւորգ Գեւորգյանի շահերի ներկայացուցիչ Հովիկ Արսենյանից, ով նկատեց.

-Զարմանալիորեն գործը ոնց կար էդպես էլ մնացել է, տեւական ժամանակ է ինչ որեւէ գործողություն չի իրականացվում: Գործը կարծես փորձում են դեպի փակուղի տանել: Նախկին վարչապետի հետ առեևսումները մի քանի անգամ ձախողվել են: Չգիտենք, թե ինչով է պայմանավորված:
Այս պահին գործով անցնում է մեկ մեղադրյալ եւ մի քանի վկա, որոնց թվում է նախկին ոստիկանապետ Ալիկ Սարգսյանը: Ինչը, մեզ համար մեղմ ասած զարմանալի է, քանի որ իմ պաշտպանյալը նրա առնչության մասին բավականին լուրջ փաստարկներ է ներկայացրել, բայց վերջինս չգիտես ինչու մնաց վկայի կարգավիճակում:
Սպասենք քննության ընթացքին:

Ն. ԱԴԱՄՅԱՆ