Պատերազմը վերջացել է Երեւանի կաֆեներում, ծառերի տակ, կաբինետներում նստածների համար, բայց ոչ արցախցու համար. Արցախի պատգամավոր

Սահմանում տիրող իրավիճակի, հնարավոր լայնամաշտաբ պատերազմի վերսկսման, ինչպես նաեւ Հայաստան-Արցախ ներկայիս հարաբերությունների շուրջ, NewsMedia-ն զրուցել է Արցախի Ազգային ժողովի «Հայրենիք» խմբակցության անդամ, ԱԺ պատգամավոր ԱՐՊԱՏ ԱՎԱՆԵՍՅԱՆԻ հետ, ով նախ անդրադարձավ սահմանային լարվածության մասին խոսակցություններին, ու արձագանքեց.

-Իսկ ո՞վ է ասում, որ պատերազմը վերջացել է, պատերազմը վերջացել է Երեւանի կաֆեներում, ծառերի տակ, կաբինետներում նստածների համար: Պատերազմը ոչ մի ղարաբաղցու համար չի վերջացել, առավել եւս նորից եմ կրկնում. մեզ համար: Պատերազմը ամեն րոպե, ամեն վայրկյան ծեծում է մեր պատուհանը: Եվ այս հարաբերական դադարը ամենեւին էլ խաղաղություն չէ: Եթե Երեւանում կարծում են, որ մենք պատերազմի մեջ չենք. չարաչար սխալվում ենք: Պատերազմը այսօր էլ շարունակվում է, պարզապես պատերազմի տարբեր փուլեր են լինում…

Ի՞նչ եք կարծում, եթե պատերազմ չէ, ապա ինչո՞ւ ենք պարբերաբար ցավալի կորուստներ ունենում, հենց այպես կորուստներ չեն լինում: Այնպես որ պետք է ժողովրդի գլուխը մտցնել, որ պատերազմը ամեն օր, ամեն րոպե առավել եւս յուրաքանչյուր արցախցու տանը շարունակվում է:

Ինչ վերաբերում վերջին շրջանում ոմանց կողմից շրջանառության մեջ դրված Հայաստանցի-արցախցի եզրույթին, արցախցի պատգամավորը նկատեց.

-Հայաստանի եւ Արցախի իշխանությունների հարաբերությունները ինչպես եղել են, այնպես էլ մնում են` բարեկամական, սրտացավ: Իսկ այն անձիք, ովքեր փորձում են ինչ-ինչ ակնկալիքներից ելնելով պառակտում մտցնել պետք է ասեմ, որ վաղը-մյուս օրը փոշմանելու են: Վստահ եմ, որ սա էլ կանցնի, եւ կգա մի օր, որ այդ մարդիկ չեն կարողանալու նայել մեր ժողովրդի աչքերին, որովհետեւ սխալ ճանապարհ են ընտրել: Այսօրվա նմանատիպ խոսակցությունները ես համարում եմ, որպես պահի թելադրանք` հույս ունենալով, որ շուտով կանցնի:

Տաթեւ  Աբրահամյան