Կառավարությունն առաջարկում է քաղաքացիական կացության ակտերի գրանցում կատարելու հնարավորություն տալ քաղաքացուն հարմար ցանկացած ՔԿԱԳ մարմնում

ՀՀ ազգային ժողովը քննարկում է քաղաքացիական կացության ակտերի գրանցում կատարելու համար միայն տարածքային Քաղաքացիական կացության ակտերի գրանցման մարմիններին դիմելու սահմանափակումը վերացնելու և ամենահարմար ցանկացած մարմնին դիմելու հնարավորություն տալու հարցը: «Արմենպրես»-ի հաղորդմամբ՝ Քաղաքացիական կացության ակտերի մասին օրենքում փոփոխություններ և լրացումներ կատարելու մասին օրենքի նախագիծն ԱԺ լիագումար նիստում ներկայացրեց ՀՀ արդարադատության փոխնախարար Աննա Վարդապետյանը:

«Մեր առաջնահերթ նպատակն է եղել լուծել Քաղաքացիական կացության ակտերի գրանցման (ՔԿԱԳ) ոլորտում քաղաքացիների սպասարկման հետ կապված մի շարք խնդիրներ՝ նվազեցնել ժամանակի ծախսը, վարչարարությունն ու դրանից բխող հնարավոր կոռուպցիոն ռիսկերը: Նախագծով առաջարկում ենք իրավունք վերապահել ՀՀ արդարադատության նախարարության ՔԿԱԳ գործակալության կառուցվածքային և տարածքային ստորաբաժանումներին մեկ պատուհանի սկզբունքով ծառայություններ մատուցել և անձին հնարավորություն ընձեռել դիմել տարածքային առումով իրենց ամենահարմար ՔԿԱԳ մարմնին»,-ասաց Վարդապետյանը:

Ներկայում կա նախկին կարգավորումներից մնացած պրակտիկա, որ անձինք կցվում են իրենց տարածքային ՔԿԱԳ մարմիններից, և սահմանափակված են այդ մարմիններին դիմելու պարտականությամբ: Արդյունքում մարմինն էլ կարողանում է քաղաքացուն ժամանակային սահմանափակման մեջ դնել:

«Երկրորդ խնդիրն այն է, որ հնարավորինս նվազեցնում ենք փաստաթղթի տրամադրման հետ կապված ծախսերը, սա միտված է թեթևացնել և քաղաքացու և պետբյուջեի ծախսն ու բեռը: Նախագծով առաջարկվում է քաղաքացուն իր ցանկության դեպքում էլեկտրոնային տարբերակով ուղարկել անհրաժեշտ փաստաթուղթը, որը QR կոդով հնարավոր կլինի վերիֆիկացնել ցանկացած վայրում»,-ասաց Վարդապետյանը:

Նախագծով լուծվում է նաև վերարտադրողականության օժանդակ տեխնոլոգիաների կիրառությամբ ծնված երեխաների պետական գրանցման ընթացակարգերը: Դա համապատասխանեցնում են մարդու վերարտադրողական առողջության և վերարտադրողական իրավունքների մասին օրենքի պահանջներին, որով սահմանված է ԴՆԹ թեստի հիման վրա երեխայի ծննդի գրանցումն իրականացնելու պարտականությունը: «Այսօր քանի որ չունենք օրենսդրական կարգավորում, դա իրականացնում ենք փոխնակ մոր հետ կնքված պայմանագրի հիման վրա, սակայն օրենսդրական կարգավորումը պահանջում է, որ ունենաք նաև ԴՆԹ որոշումը»,-նշեց փոխնախարարը:

Առաջարկվող փոփոխությունների արդյունքում պետբյուջեում կլինի տնտեսում՝ մոտ 27 մլն դրամի չափով: