Video.«Ինձ լուսանկարներ էին ցույց տվել, ես էլ նման կարծիք էի հայտնել, իսկ պարոն նախարարն էլ դա հերքել էր, եւ դա ինձ բավարար էր».Արտյոմ Վարդանյան

Հայտնի է, որ Շրջակա միջավայրի նախարար Էրիկ Գրիգորյանը հայցադիմում է ներկայացրել ընդդեմ «Ջամբո» էկզոտիկ պարկի տնօրեն Արտյոմ Վարդանյանի՝ զրպարտության դիմաց փոխհատուցում ստանալու եւ հրապարակայնորեն հերքելու պահանջով:

Հիշեցնենք, որ դատարան դիմելու մտադրության մասին Էրիկ Գրիգորյանը հայտնել էր մայիս ամսին, երբ «Ջամբո» էկզոտիկ պարկի հիմնադիր Արտյոմ Վարդանյանն ասել էր, որ լուրեր են պտտվում, թե բնապահպանության նախարարն աջակցում է Կենդանաբանական այգու տնօրենին։

Այդ առթիվ, Էրիկ Գրիգորյանը հանդես էր եկել հայտարարությամբ, ուր մասնավորապես ասված էր. «Սույն հայտարարությունը որեւէ աղերս չունի իրականության հետ։ Ինքս միշտ հանդուրժողաբար եմ վերաբերվել եւ վերաբերվում քննադատությանը, գիտակցելով խոսքի ազատության կարեւորությունը: Սակայն նշված անձի արտահայտությունը ոչ քննադատություն է, ոչ էլ գնահատողական դատողություն, այլ զրպարտություն, որով փորձ է արվել արատավորել իմ գործունեությունն ու համբավը։ Այդ իսկ պատճառով որոշել եմ օրենքով սահմանված կարգով դիմել դատարան հրապարակայնորեն հերքման եւ պատճառված վնասի փոխհատուցման պահանջներով»,- գրել էր նախարարը:

Մինչդեռ, «Ջամբո» էկզոտիկ պարկի տնօրեն Արտյոմ Վարդանյանն էլ, NewsMedia-ի հետ զրույցում եւս մեկ պնդում է, որ իր խնդիրը ոչ թե արհեստական ինտրիգներին տուրք տալն է, այլ գործով զբաղվելը: Իսկ անհրաժեշտությամ դեպքում, ինչու չէ, որպես ՀՀ քաղաքացի նաեւ այս կամ այն շրջանառվող տեղեկատվության շուրջ՝ մեկնաբանություններ ստանալը: Արտյոմ Վարդանյանի խոսքով.

-Ցանկացած քաղաքացի իրավունք ունի այս կամ այն գործընթացի շուրջ հայտնելու իր տեսակետը, ինչպես նաեւ ճշտելու, հարցապնդումներ անելու՝թե օրինակ ճի՞շտ են, թե՞ սխալ են այս կամ այն պաշտոնյայի շուրջ պտտվող տարաբնույթ խոսակցությունները… Հատակապես որ համացանցում շատ հաճախ տեղեկատվական հոսքն այնքան մեծ է լինում, որ իսկապես պարզաբանումների կարիք զգացվում է:
Ես նման խոսակցություններ՝ (նախարար Էրիկ Գրիգորյանի եւ Կենդանաբանական այգու տնօրեն Ռ. Խաչատրյանի մտերմության մասին) լսել եմ տարբեր մարդկանցից, եւ հիմա էլ այնպես չէ, որ նման լուրեր չկան:

Բայց ես իմ խոսքում չեմ պնդել, որ այդ լուրերը բացարձակ ճշմարտություն են: ես ընդամենը փորձել եմ պարզել. կա՞ իրականում նման բան , թե ոչ:
Ինձ ընկերներս ցույց են տվել լուսանկարներ, որտեղ նախարար Էրիկ Գրիգորյանը Ռուբեն Խաչատրյանի հետ ձի է քշում: 

(Լուսանկարը՝Գալուստ Նանյանի ՖԲ էջից )

Ասել են, որ իրենք ընկերներ են: Ես չեմ ունեցել նպատակ զրպարտելու նախարարին, եւ որեւէ մեկին: Իմ խնդիրը, իմ երկրում նոր ծրագրեր իրականացնելն է, եւ իմ կողմից կատարած ներդրումները ճիշտ նպատակին ծառայեցնելն է: 

Ինչ վերաբերում է դատի տալուն՝ ես դատարաններից չեմ վախենում, քանի որ չեմ վիրավորել, ու կեղծ պնդումներ չեմ արել: 

Թեմայի մանրամասները՝առաջարկվող Տեսանյութերում: