«Գողական աշխարհում այսօր շատ մեծ են խաղադրույքներ են դրված, ակտիվ պայքար է մղվում տարբեր կլանների միջեւ»

Օրենքով գող մասվիցի Անդիկի, ով հանցավոր աշխարհում առավել հայտնի է Խրամոյ անվամբ`սպանությունից հետո քրեական աշխարհն արդեն եռում է. ո՞վ է սպանել է գողին, ինչի՞ համար: Այս հարցերը այսօր տանջում են քրեական աշխարհի ներկայացուցիչներին, եւ ոչ միայն…

Իսկ ինչպես են մեկնաբանում վերը նշված սպանությունը քաղաքական շրջանակներում , հարցի պատասխանը NewsMedia.am-ը փորձեց ստանալ հայտնի քաղաքական վերլուծաբան, պատմաբան ԳԱԳԻԿ ՀԱՄԲԱՐՅԱՆԻՑ, ով նկատեց.-Նախ նշեմ, որ ես չեմ կարող հիմա վստահորեն ասել, որ այս սպանությունը հաստատ քաղաքական գործընթացների հետ կապ ունեցող սպանություն էր, եւ պատճառն էլ հենց քաղաքական է: Բայց այն որ անկախությունից հետո, կրիմինալը եւ հատկապես գողական աշխարհի ներկայացուցիչները բավական մեծ ազդեցություն են ունեցել ներքաղաքական իրավիճակի վրա` անժխտելի փաստ է: Դա հատկապես արտահայտվել է Լեւոն Տեր-Պետրոսյանի կառավարման տարիներից հետո: Ինչ վերաբերում է պարոն Փաշինյանի կողմից տարվող գծին` մասնավորապես կրիմինալի դեմ պայքարին, ապա նշեմ, որ պարոն Փաշինյանը բոլոր առումներով գրեթե ընդօրինակել է նախորդ իշխանությունների վարքագիծը: 

Եվ պարոն Փաշինյանի այն հայտարարությունները, որ պետք է խիստ պայքար մղվի կրիմինալի դեմ` ընդամենը խոսակցություններ են, կոնկրետ քայլեր չեն արվում այս բնագավառում, ես չեմ էլ սպասում, որ կարվի: Որովհետեւ Դուք շատ լավ գիտեք, որ քրեածին էլեմենտները` սկսած թաղային հեղինակություններից վերջացրած ամենաբարձր գողական ներկայացուցիչները, շատ լավ համագործակցել են նախորդ իշխանությունների հետ՝ համապատասխան ձայներ եւ ռեսուրսներ ապահովվելով այդ նույն իշխանությունների համար: Եվ չի բացառվում, որ այս իշխանությունները եւս, ապագայում փորձեն կրիմինալի ներուժը օգտագործել սեփական քաղաքական թիմի բարեկեցությունը ապահովվելու, եւ իշխանությունը իրենց ձեռքում պահելու համար:

- Իսկ կոնկրետ այս օրենքով գողի սպանությունը ի՞նչով կպայմանավորեիք:

-Ինչ վերաբերում է կոնկրետ այս սպանությանը, ապա պետք նշեմ, որ հետհեղափոխական Հայաստանում տեղի են ունենում ազդեցության ոլորտների վերաբաշխումներ: Նույն գողական աշխարհում այսօր շատ մեծ են խաղադրույքները, ակտիվ պայքար է մղվում տարբեր կլանների միջեւ: Երեւանում տեղի ունեցած օրենքով գողի սպանությունը, ըստ իս կապված է հիմնականում ազդեցության ոլորտների վերաբաշխման հետ:

-Պարոն Համբարյան, իսկ Ձեր կարծիքով, արդյո՞ք միայն Փաշինյանն է պատասխանատու ներկայիս իրավիճակի համար, հաշվի առնելով, որ հեղափոխության օրերին նրա կողքին էին նաեւ այլ քաղաքական ուժեր, ովքեր ջանք չէին խնայում հեղափոխությունը նաեւ իրենց վերագրելու…

-Ոչ, քանի որ ՀՀ-ում ԱԺ-ի ընտրություններից հետո, որը լեգիտիմացրեց հեղափոխության առաջին փուլը, միանձնյա իշխանությունը հանձնվել է ՔՊ-ին, եւ նրա ԱԺ «Իմ քայլը» խմբակցությանը: Որեւիցէ քաղաքական ուժ՝ դրանից հետո իրավունք չունի հայտարարելու, որ ինքը պատասխանատվություն է կիսում եւ այլն, եւ այլն: Ինչի համար պետք է կիսի, եթե ինքը իշխանության մեջ չկա: Իշխանության միանձնյա կառավարումը ստանձնել է Նիկոլ Փաշինյանն ու իր թիմը:

Հեղափոխությունը ողջունել են ասենք նույն ԼՀԿ-ն կամ ԲՀԿ-ն, հարց է առաջանում` ի՞նչ իշխանական լծակներ ունեն այդ երկու քաղաքական ուժերը, որոնք այս պահի դրությամբ ընդիմություն են, որպեսզի լուծեն կրիմինալի հետ կապված հարցերը ՀՀ-ում: Եվ մեխանիկորեն ՀՀ-ում տեղի ունեցող բոլոր գործընթացների համար պատասխանատու է ներկայիս իշխանությունը, որովհետեւ մեզ մոտ կոալիցիոն կառավարություն չկա: Եվ որեւիցէ քաղքական ուժ պատասխանատվություն չի կրում հասարակության առջեւ, քանի որ ունենք միանձնյա իշխանություն:

Պատրաստեց՝  ՆՈՆԱ ԱԴԱՄՅԱՆԸ