Ինչո՞վ էր պայմանավորված օրենքով գող Անդիկի սպանությունը. նման անուններ շրջանառողները նպատակ ունեն նոր, ավելի լարված խժդժությունների ալիք բարձրացնել հանցավոր աշխարհում

«Բեսպրեդելը նոր թափ է հավաքում, վենդետանները, խժդժությունները դեռ առջեւում են»

«Օրենքով գողի Անդիկի սպանությունը բացառված է, որ ունենա քաղաքական կամ կենցաղային ենթատեքստ , որովհետեւ իրական օրենքով գողը որեւէ հարաբերություն չպետք է ունենա պետության հետ, դա առաջին պայմանն է օրենքով գող դառնալու եւ ապրելու այդ տիտղոսով», NEWSMEDIA-ի հետ զրույցում անդրադառնալով օրենքով գող Խրամոյի սպանությանը, ասաց հասարակական-քաղաքական գործիչ ԳՈՒՐԳԵՆ ԵՂԻԱԶԱՐՅԱՆԸ, նկատելով.

 -Սպանվածը իրականում հին տրադիցիաներով ապրող օրենքով գող էր, որը նոր գողերի ցոփ կյանքը չէր ընդունում: Ապրում էր օրենքով գողերի օրենքով, որը ամրագրված էր 1961 թվականի սխոդկայում՝ Ռաստովում: Օրենքով գողի սպանությունը, ինչպես ասացի բացառված է նաեւ, որ լինի կենցաղային խնդիրներով պայմանավորված:

-Ինչո՞ւ եք բացառում եւ, ուրեմն ինչո՞վ եք պայմանավորում այդ դեպքում այդ սպանությունը:

-Կենցաղային չի կարող լինել միանշանակ, որովհետեւ հին տրադիցիաների հին սկզբունքները պահպանող գողը բացարձակ մաքուր է լինում իր կենցաղում: Ոչ ոքին ոչինչ չի խոստանում, իսկ եթե մի բան էլ ասում է` անում 100 տոկոսով, հակառակ դեպքում «կփչանա»:

- Էս դեպքում, որոնք ե՞ն սպանության դրդապատճառների հնարավոր վարկածները:

-Ես շատ քիչ տվյալներ ունեմ այդ մարդու մասին: Այդ հարցը պետք է տան այսօրվա օպերատիվ աշխատողները:

-Պարոն Եղիազարյան, սպանությունից հետո տարբեր, այդ թվում հանցավոր աշխարհի ներկայացուցիչների անուններ են շրջանառվում, որպես հնարավոր սպանություն կատարող կամ պատվիրատուներ: Սա որքան՞ով է նորմալ:

-Իհարկե սխալ է այս պահին նման բաներ շրջանառել, առանց կոնկրետ փաստերի աննուններ շրջանառել` հատկապես գողական աշխարհի ներկայացուցիչների: Իսկ նման անուններ շրջանառողները նպատակ ունեն նոր, ավելի լարված խժդժությունների ալիք բարձրացնել հանցավոր աշխարհում: Որպեսզի անարխիան հասնի գագաթնակետին: Իսկ այն, որ խժդժություններից անպակաս չենք լինելու՝ դա փաստ է:

- Լավ, իսկ ո՞վ կարող էր օրենքով գողի սպանության «զակազը» տալ:

-Չեմ կարծում, որ Հայաստանից լինի, բայց այս պահին այլ ենթադրություններ էլ չեմ ուզում անել: Բայց, այն որ շատ արագ հրապարակվեց տեսանյութը, որտեղ երեւում է կիլլերը` խոսում է այն մասին, որ փորձում են ապահովագրել պատվիրատուին:

- Նկատի ունեք նպատակային է՞ր այդ տեսանյութի հրապարակումը:

-Կարծում եմ այո. շատ դժվար է խոսել, երբ դու չունես տվյալներ: Ես ընդամենը վերլուծում եմ իրավիճակը:
Ամփոփելով խոսքս կարող եմ մի բան հստակ ասել, բեսպրեդելը նոր թափ է հավաքում, վենդետանները, խժդժությունները դեռ առջեւում են:

ՆՈՆԱ   ԱԴԱՄՅԱՆ