Արցախում ներքաղաքական կյանքը ակտիվ փուլ է թեւակոխել, լուրջ վերադասավորումներ են սպասվում Արցախի քաղաքական քարտեզի վրա. Դավիթ Բաբայան

Արցախի Հանրապետությունում տիրող ներքաղաքական իրավիճակի, Հայաստան-Արցախ ներկա հարաբերությունների, ինչպես նաեւ տարբեր ռազմական փորձագետների կողմից կանխատեսվող լայնամաշտաբ ռազմական գործողությունների վերսկսման հնարավորության մասին, NEWSMEDIA.am-ը զրուցել է Արցախի հանրապետության նախագահ Բակո Սահակյանի մամուլի պատասխանատու, «Արցախի Պահպանողական» կուսակցության նախագահ ԴԱՎԻԹ ԲԱԲԱՅԱՆԻ հետ:

- Պարոն Բաբայան, ներքաղաքական ի՞նչ մթնոլորտ է տիրում այսօր Արցախում:

-Պետք է ասեմ, որ Արցախում ներքաղաքական կյանքը իրականում ակտիվ փուլ է թեւակոխել. շուտով լուրջ վերադասավորումներ են սպասվում Արցախի քաղաքական քարտեզի վրա, ինչը բնական է: Ձեւավորվելու է նոր իշխանություն, բացի այդ փոխվելու է նաեւ ընտրական կարգը: Առաջին անգամ Արցախում, նախագահական եւ խորհրդարանական ընտրությունները լինելու են մեկ օրում: Դրան գումարած՝ փոխվել է նաեւ քվեարկության ձեւը. հետեւաբար, այն որ այլեւս մեծամասնական կարգով ընտրություններ տեղի չեն ունենալու խորհրդարանական ընտրություններում, բնական է, որ այս առումով եւս պետք է ակտիվանա քաղաքական կուսակցությունների ձեւավորման գործընթացը:

Որովհետեւ այլընտրանք պարզապես չկա: Եվ սա է պատճառը, որ բավականին մեծ թվով ուժեր են ի հայտ եկել քաղաքական դաշտում: Ու սա, նորից եմ կրկնում. բնական գործընթաց է, որովհետեւ հատկապես նոր ձեւավորված քաղաքական ուժերը, պետք է իրենց ծրագրերը ներկայացնեն հանրությանը, եւ մարդիկ պետք է ծանոթանան այդ կուսակցությունների հետ: Սա քարոզարշավ չէ, սա ավելի շուտ ինչ-որ տեղ կարելի է ասել, որ ինքնաներկայանալու գործընթաց է: Ներկա պահին այո, քաղաքական դաշտում ակտիվություն է նկատվում, ու ամենակարեւորը՝ այդ պրոցեսները ընթանում են բացառապես օրենքի շրջանակներում:

«ԱՇԽԱՏԱՆՔ ԵՆՔ ՏԱՆՈՒՄ, ՈՐՊԵՍԶԻ ՄՏՆԵՆՔ ՔԱՂԱՔԱԿԱՆ ԴԱՇՏ, ԵՒ ԼԻՆԵՆՔ ԱԶԴԵՑԻԿ ՈՒԺԵՐԻՑ ՄԵԿԸ»

-Պարոն Բաբայան, հանրությանը հետաքրքիր է նաեւ. արդյո՞ք առաջիկա ընտրություններին Ձեր թեկնածությունը կտեսնենք խորհրդարանական կամ նախագահական ընտրություններում:
Ինչպես նաեւ կցանկանայինք անդրադառնալ Ձեր կողմից հիմնած՝«Արցախի Պահպանողական» կուսակցությանը, ու նրա առջեւ դրված նպատակներին: Հաշվի առնելով, նաեւ այն հանագամանքը, որ կուսակցությունը ( կարճ ժամանակահատվածում) հասցրել է մեծ համակիրների բանակ ունենալ, որի շարքերը գնալով խտանում են:

-Այն, որ մենք մասնակցելու ենք ընտրություններին՝ սա միանշանակ է: Խորհրդարանական ընտրություններին բնական է, որ հստակ մասնակցելու ենք:
Իսկ ինչ վերաբերում է նախագահական ընտրություններին, ապա պետք է նշեմ, որ դեռ  չենք որոշել, թե ինչ ձեւաչափով ենք մասնակցություն ունենալու: Կարծում եմ երբ գա ժամանակը, մենք արդեն հստակ կհայտարարենք, թե ում ենք պաշտպանում, պաշտպանո՞ւմ ենք որեւէ մեկին, թե՞ սեփական թեկնածուով ենք հանդես գալիս եւ այլն:
Այսինքն այդ բոլոր հարցերի պատասխանը՝ կտանք ճիշտ ժամանակին:
Իսկ մեր կուսակցության հետ կապված, կարող եմ ասել, որ քաղաքական դաշտում մեր ուժը ստեղծվել է հստակ գործունեություն ծավալելու, եւ հանրությանը ծառայություն մատուցելու համար:
Իսկ այդ ծառայությունների մատուցման լավագույն տարբերակներից մեկն էլ՝ խորհրդարանական ընտրություններում մասնակցելն է, եւ ինչ խոսք. քաղաքական դաշտում ամուր տեղ զբաղեցնելը:

Մենք այսօր նպատակասլաց կերպով աշխատանքներ ենք տանում, որպեսզի մտնենք քաղաքական դաշտ, եւ լինենք ազդեցիկ ուժերից մեկը:

«ՄԵՐ ՎԵՐՋՆԱՆՊԱՏԱԿԸ՝ ԴԱ ՄԻԱՑՅԱԼ ՀԱՅՈՑ ՊԵՏԱԿԱՆՈՒԹՅԱՆ ԿԱԶՄԱՎՈՐՈՒՄՆ Է »

-Ովքե՞ր են այսօր «Արցախի Պահպանողական» կուսակցության շարքերում:

-Ճիշտ է ՝ կուսակցությունը երիտասարդ է, բայց կարեւորը՝ դինամիկ է ու զարգացող: Ունենք տարբեր սերունդների ներկայացուցիչներ` վետերաններ, Մարտական Խաչ 1-ին, Մարտական Խաչ 2-րդ աստիճանի ասպետներ, մեծ մասը իհարկե երիտասարդներ են: Եվ այն պահպանողական գաղափարները, որոնք որ մենք որդեգրել ենք, նպատակը մեկն է. պաշտպանել ու պահպանել մեր արժեքները, բարձր մակարդակի վրա պահել մեր երկրի անվտանգությունն ու անկախությունը: Մեր վերջնանպատակը՝ դա միացյալ Հայոց պետության կազմավորումն է, բայց մինչ այդ մենք պետք է ուժեղացնենք Արցախի պետականությունը: Պետք է ամեն ինչ անենք, որպեսզի մեր հայրենիքը հզոր, եւ ամուր լինի: Աշխատելու ենք ժողովրդավարական սկզբունքների զարգացման, խորացման, սոցիալական արդարության ուղղությամբ: Հատուկ ուշադրություն ենք դարձնելու տնտեսության համաչափ զարգացմանը, շրջակա միջավայրի պահպանությանը, եւ այլն:

«ՄԻՇՏ ՊԵՏՔ Է ԼԻՆԵՆՔ ՊԱՏՐԱՍՏ, ՈՒԺԵՂ ԵՒ ՄԻԱՍՆԱԿԱՆ»

-Պարոն Բաբայան, Արցախի մասին խոսելիս, չենք կարող չանդրադառնալ նաեւ սահմանային իրավիճակին: Ինչպիսի՞ն է իրավիճակը այս պահին, եւ որքանով է այս պահին ռեալ՝ թշնամու կողմից ռազմական գործողությունների վերսկսման վտանգը:

- Առհասարակ, երբ խոսում ենք վտանգների մասին. պետք է իմանանք, որ թշնամին չի փոխել իր մոտեցումները, որ թշնամին մնացել է նույնը, որ թշնամու նպատակը` Արցախի եւ Հայոց պետականության կործանումն է:
Դրա համար միշտ պետք է լինենք պատրաստ, ուժեղ եւ միասնական: Ինչքան
ուժեղ լինենք, ինչքան միասնական լինենք, ճիշտ աշխարհաքաղաքականություն վարենք՝ այնքան ավելի ենք նվազեցնելու թշնամու կողմից արկածախնդրության սցենարի ընտրումը:
Իսկ այս պահին, Զինված ուժերը գտնվում են բարձր մարտական վիճակում. վերահսկում ենք իրավիճակը` պատրաստ լինելով յուրաքանչյուր պահի պաշտպանելու մեր հայրենիքը:

Պատրաստեց՝ ՆՈՆԱ  ԱԴԱՄՅԱՆԸ 

NewsMedia.am 

Լուրեր Հայաստանից եւ Աշխարհից