«Սա է դատավոր Իսկոյանի արդարադատությունը. մեղավորները լինեն ազատության մեջ, իսկ անմեղ-մեղավոր երիտասարդը մնա ճաղերի հետեւում».Փաստաբանը ահազանգում, եւ փաստեր է ներկայացնում

NEWSMEDIA.am-ը շարունակում է հետեւողականորեն լուսաբանել շուրջ երկու տարի Հրազդան ՔԿՀ-ում, հարազատների, եւ գործով փաստաբան Հովսեփ Սարգսյանի խոսքերով. «չգործած հանցանքի համար, ընկերների կողմից քավության նոխազ դարձած» քսանամյա Վիկտոր Պետրոսյանի դատավարության ընթացքին: 

Հիշեցնենք, սույն գործով դատավարությունը, որը թեւակոխել է դատաքննության փուլ՝ քննվում է Գեղարքունիքի մարզի ընդհանուր իրավասության դատարանի դատավոր Յուրի Իսկոյանի նախագահությամբ:

Նկատենք, որ սույն՝ բնակարանային գողության գործով անցնում են երեք ամբաստանյալ, բայց կոնկրետ գողություն կատարողը այսօր ազատության մեջ է: Իսկ այսօր,  հերթական դատական նիստի ընթացքում երկու միլիոն գրավի դիմաց ազատ է արձակվել նաեւ գործով մյուս մեղադրյալ Դավիթ Հարությունյանը:

Սա է դատավոր Իսկոյանի արդարադատությունը՝ «մեղավորները լինեն ազատության մեջ, իսկ անմեղ-մեղավորը մնա ճաղերի հետեւում»,-այս մասին NEWSMEDIA-ի հետ զրույցում ասաց Վիկտոր Պետրոսյանի փաստաբան Հովսեփ Սարգսյանը, ով լավատեսորեն նկատեց.

-Ճիշտ է դատավոր Իսկոյանից շատ հեռու է արդատարադատությունը, բայց հույս ունեմ, որ հաջորդ դատական նիստին, որի ընթացքում ես եւս պատրաստվում եմ իմ պաշտպանյալի համար գրավի միջնորդություն ներկայացնել՝ դատավորը կբավարարի միջնորդությունը: Քանի որ սույն գործով, ստացվում է, որ այս պահին անազատության մեջ է միայն այս գործով քավության նոխազ դարձած, շնորհալի մի երիտասարդ, ում փորձում են մեղսագրել բնակարանային գողի պիտակը: Այն ինչ գործում առկա փաստերը որեւէ ձեւով չեն ապացուցում մեղադրանքի բովանդակությունը:

Հարցին, որքա՞ն գրավի միջնորդություն եք ներկայացնելու, փաստաբանը այսպես պատասխանեց.

-Նախորդ անգամ երեք միլիոն դրամ գրավի մջնորդություն էի ներկայացրել, որն առանց հստակ պատճառաբանության մերժվեց: Այս անգամ երեւի ավելի քիչ կներկայացնենք, քանի որ հասել ենք դատաքննության փուլ, եւ նախաքննությանը ըստ էության խոչընդոտելու որեւէ պատճառաբանություն չեն կարող բերել: Հույս ունեմ. հաջորդ դատական նիստից հետո, Ձեզ հետ արդեն կկարողանա զրուցել նաեւ պաշտպանյալս՝ Վիկտորը:

Հավելենք, որ Վիկտորը բոլորի կողմից բնութագրվում է որպես դրական անձնավորություն, իսկ այժմ անազատության մեջ է. երբեմնի ընկերոջ՝ գործով անցնող Մանուկ Ապրեսյանի տված մեկ ցուցմունքի պատճառով: Որեւէ այլ հիմնավորում, թե՛ նախաքննության, թե՛ դատավարության ընթացքում, փաստաբանի պնդմամբ Պետրոսյանի նկատմամբ չի հայտնաբերվել:
Հիշեցնենք, սույն գործով հաջորդ դատական նիստը տեղի կունենա սեպտեմբերի 17-ին: