Անձամբ դիմելու եմ վարչապետին. քաղաքացին զարմացած է «Գուդ Կրեդիտ » վարկային կազմակերպության կայացրած որոշումից

Խմբագրությունը շարունակում է բազմաթիվ քաղաքացիներից ամենատարբեր տեսակի բողոքներ ու դժգոհություններ ստանալ մայրաքաղաքում օր-օրի սնկի նման աճող մասնավոր վարկային կազմակերպությունների գործունեությունից:

Հերթական նմանատիպ ահազանգը այս անգամ NewsMedia.am-ին ներկայացրեց քաղաքացի Գ. Մ-ն, ով շուրջ հինգ տարի առաջ անսալով ընկերուհու Շուշաննա Սեդրակյանի խնդրանքին՝ երաշխավոր է կանգնել նրա համար «ԳՈՒԴ ԿՐԵԴԻՏ վարկային կազմակերպությունում: Եվ վստահելով, որ ընկերուհին բարեխղճորեն կվճարի եւ կկատարի վարկային պարտավորությունները, այլեւս չի հետաքրքվել նրանից, որպեսզի վերջինս չկարծի, թե ընկերուհին չի վստահում իրեն:

Բայց հինգ տարի անց, տիկին Գայանեի հասցեով ԴԱՀԿ-ից ծանուցում է գալիս, որ իր հաշիվների եւ գույքի վրա կալանք է դրված: Բնականաբար, տիկին Գայանեն, ով վերջերս է ծանր վիրահատության ենթարկվել. զարմացած է նմանատիպ ծանուցագրի առկայությունից, քանի որ որեւէ տեղից, որեւէ անգամ անձամբ վարկ չի վերցրել: Հետագայում, հետաքրքրվելով պարզում է, որ դա դեռեւս 2015 թվականին՝ ընկերուհու համար վերցված վարկի հետեւանքն է:

«Ես գնացել եմ Գուդ Կրեդիտի վարկային կազմակերպության գրասենյակ, տեղեկացրել եմ, որ ես ընդամենը երաշխավոր եմ, ոչ թե վարկառու: Նրանք հանեցին բոլոր փաստաթղթերը, ասացին, որ տեղյակ են, որ ես սույն գործով երաշխավոր եմ, բայց քանի որ չեն գտնում Շուշաննա Սեդրակյանին, փաստորեն ես եմ որպես պատասխանատու, մնում »,- վատառողջ վիճակում խնդիրը համառոտ ներկայացրեց տիկին Գայանեն:

Ըստ մեր զրուցակցի. վարկային կազմակերպության աշխատակիցներին տրամադրել է Շուշաննայի եւ նրա որդու հեռախոսահմարները, բայց փաստորեն մինչ օրս կալանքը շարունակում է մնալ տիկին Գայանեի վրա:
Հարցին, ինքը անձամբ արդյո՞ք չի կարողանում կապ հաստատել ընկերուհու հետ, տիկին Գայանեն նկատեց.
«Քանի որ վատառողջ եմ, չեմ կարողանում տանից դուրս գալ, բայց կազդուրվելուն պես՝ գնալու եմ այդ խնդրի ետեւից: Ես չգիտեմ ինչն է խնդիրը. գուցե իրենք տեղյակ չեն, չեմ կարող ասել: Բայց, ո՞նց է ստացվել, որ հինգ տարի անց է միայն կազմակերպությունը որոշել կալանք դնել. այն էլ ինձ՝ երաշխավորիս վրա:

ԱՆՁԱՄԲ ԴԻՄԵԼՈՒ ԵՄ ՀԱՐԳԱՐԺԱՆ ՎԱՐՉԱՊԵՏԻՆ

Միառժամանակ տիկին Գայանեն վստահեցնում է.

«Ես իմ անունով ոչինչ չունեմ.անգամ անձնագիր չունեմ, խնդրեմ թող գան բռնագանձեն, իմ ի՞նչն են բռնագանձելու, կամ որ իրավունքով: Այսօր, փառք Աստծո իրավունքները շատ լավ գործում են մեր երկրում, եւ ես իրավասու եմ իմ իրավունքները պաշտպանելու:
Եթե խնդիրը չկարգավորվի, ես անձամբ դիմելու եմ հարգարժան վարչապետին: Ես էլի եմ ասում. տվյալ մարդը այստեղ է, թող գնան սանդղակ կազմեն՝ կամաց-կամաց վճարեն, բայց ես ինչո՞ւ պետք է տուժեմ: Ես շատ լավ գիտեմ օրենքները, գիտեմ որ մեր վարչապետի հրամանով բոլոր մանր-մունր ժամկետանց պարտավորությունները տվյալ կազմակերպությունները զրոյացնում են, ինչո՞ւ է իմ դեպքում նման որոշում կայացվել՝չգիտեմ:

Թե ի՞նչ գումարի մասին է խոսքը, տիկին Գայանեն հավելեց.

«Կարծեմ 800 հազար էր, ինքը վճարել է դրա զգալի չափը, եւ մնացել է ինչ-որ 160 հազարի չափ գումար: Ստույգ չեմ կարող ասել, քանի որ նորից եմ կրկնում. ընդամենը երաշխավոր եմ կանգնել՝ ընկերուհուս համար»:

Պատրաստեց՝ ՆՈՆԱ ԱԴԱՄՅԱՆԸ