«Հասանովի հայտարարություններով չէ, որ պետք է զգոն լինենք, մենք ոչ մի վարկյան չպետք կտրվենք իրականությունից». Դավիթ Բաբայան

Ադրբեջանի պաշտպանության նախարար Զաքիր Հասանովը տեղական ԶԼՄ-ների հետ ճեպազրույցում մեկնաբանելով ՀՀ վարչապետ Նիկոլ Փաշինյանի այն հայտարարությունը, թե «Արցախը Հայաստան է և վե՛րջ», հանդես է եկել հերթական հոխորտացող հայտարարությամբ: Վերջինս մասնավորապես ասել է. «Մենք մեր խոսքը կասենք ռազմի դաշտում, մենք երազում ենք այդ մասին: Եվ դա կլինի առաջիկայում: Այդ ժամանակ կտեսնենք՝ նա պատասխան կտա՞ իր խոսքերի համար, թե՞ ո՛չ»:

Զաքիր Հասանովը նաև հայտարարել է, որ Հայաստանը միայն «դատարկ խոսում է, քանի որ Երևանը մինչև հիմա չի ճանաչել ԼՂՀ անկախությունը»:

Այս հայտարարությունները չպետք է դիտարկել, որպես արտառոց երեւույթ

Վերոհիշյալի հետ կապված պաշտոնական Ստեփանակերտի տեսակետը NewsMedia.am-ը փորձեց ստանալ Արցախի Հանրապետության նախագահի մամուլի խոսնակ Դավիթ Բաբայանից, ով նկատեց.
- Սա նորություն չէ մեզ համար եւ սա առաջին անգամը չէ, որ նման հոխորտացող կոչերով են նրանք հանդես գալիս: Այս անգամ նույնիսկ մի քիչ ավելի զուսպ էին, որովհետեւ սովորաբար ասում էին, որ թեյ պիտի խմեն Շուշիում, Ստեփանակերտում, որ պետք է ոչնչացնեն բոլորիս եւ այլն, եւ այլն: Ուստի այս հայտարարությունները չպետք է դիտարկել, որպես արտառոց երեւույթ: Սա այն է՝ ինչ կա: Ե՛ւ Հասանովը, ե՛ւ Ալիեւը երբեւիցէ իրենց տեսակետները չեն վերանայում: Ուստի մենք էլ մեր հերթին երբեւէ չպետք է մոռանանանք ում հետ գործ ունենք` չկտրվելով իրականությունից:

-Պարոն Բաբայան, Հասանովի հայտարարությունը շատերը մեկնաբանեցին, որպես լայնամասշտաբ եւ հանկարծակի ռազմական գործողությունների վերսկսման նախազգուշացում: Ի՞նչ կասեք սրա վերաբերյալ:

-Այն, որ մենք միշտ պետք է պատրաստ լինենք պատերազմի` միանշանակ է: Բայց դա չի նշանակում, որ հենց վաղը ինչ-որ բաներ են սկսվելու: Բայց այ՛ո, միեևւնույն ժամանակ ամեն պահ, ամեն վարկյան պետք է պատրաստ լինենք նման զարգացումների: Հետեւաբար, Հասանովի հայտարարություններով չէ, որ պետք է զգոն լինենք, մենք ոչ մի վարկյան չպետք կտրվենք իրականությունից: Որպեսզի ամեն վայրկյան կարողանանք համարժեք ձեւով դիտարկենք ե՛ւ հակառակորդին ե՛ւ նրա բոլոր գործողությունները:

NewsMedia.am

Լուրեր Հայաստանից եւ աշխարհից