Պետության մեջ բոլորի՝ թե´ մարզպետի, թե՛ սպայի, թե՛ հասարակ քաղաքացու հավասարությունը օրենքի առաջ պետք է հստակ լինի. Սուրեն Պապիկյանը՝ Վայոց Ձորի մարզպետի հրաժարականի մասին

Վայոց Ձորի մարզպետը հստակ նշել է, թե որն է իր հրաժարականի պատճառը. այս մասին լրագրողների հետ զրույցում հայտարարեց տարածքային կառավարման և ենթակառուցվածքների նախարար Սուրեն Պապիկյանը՝ անդրադառնալով Վայոց Ձորի մարզպետի հրաժարականին:

«Նրա հրաժարականի պատճառը ստեղծված իրավիճակն է, հիվանդանոցում ունենք սպա, որը պայքարում է իր կյանքի համար: Վայոց Ձորի մարզպետն ուղղակի քաղաքական որոշում է ընդունել, որ նպատակահարմար չի համարում այս իրավիճակում պաշտոնավարել: Անկախ նրանից, թե հետագա քննությունն ինչ է պարզելու, ինչ արդյունք է լինելու, որովհետև հիմա մեր սպայի կյանքը շատ կարևոր է, բայց նաև արդարությունը, պետության մեջ բոլորի հավասարությունը օրենքի առաջ պետք է հստակ լինի՝ թե՛ մարզպետի, թե՛ սպայի, թե՛ հասարակ քաղաքացու»,- հայտարարեց նախարարը:

Պապիկյանը նշեց, որ որոշում դեռ չկա, թե ով է փոխարինելու Տրդատ Սարգսյանին, որովհետև մարզպետը հայտարարել է, որ վայր է դնելու լիազորությունները զորավարժություններից հետո. «Երբ արդեն թափուր կլինի մարզպետի պաշտոնը, համապատասխան ընթացակարգով վարչապետը որոշում կընդունի»,- ասաց նա:

Հիշեցնենք, որ Վայոց Ձորի մարզպետ Տրդատ Սարգսյանը որոշում է կայացրել դադարեցնել լիազորությունները: Այս մասին նա տեղեկացրել է ֆեյսբուքի իր էջում` որոշ պարզաբանումներ ներկայացնելով Եղեգնաձորում սեպտեմբերի 18-ի գիշերը զինվորականների և մարզպետարանի աշխատակիցների մասնակցությամբ տեղի ունեցած միջադեպից, որի ժամանակ կոչումով փոխգնդապետ զինվորականներից մեկը ծանր մարմնական վնասվածքներով տեղափոխվել էր հիվանդանոց: