«Ո՛չ Ալիկ Սարգսյանի, ո՛չ Գեւորգ Կոստանյանի խիզախությունը չի հերիքում, որ ասեն. այո, մենք գործել ենք այդ հանցագործությունը, մենք փորձել ենք կոծկել մարտի 1–ին տեղի ունեցածը».Դանիել Իոնիսյան

Մարտի 1-ի գործով մեղադրանք է առաջադրվել նախկին ոստիկանապետ Ալիկ Սարգսյանին։ Ալիկ Սարգսյանի նկատմամբ որպես խափանման միջոց է ընտրվել ստորագրություն չհեռանալու մասին: Այս մասին հաղորդագրություն է տարածել Հատուկ քննչական ծառայությունը.

«2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործի նախաքննության ընթացքում ձեռք բերված բավարար ապացույցների համակցության հիման վրա ՀՀ նախկին ոստիկանապետ Ալիկ Սարգսյանին մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ մասով, 314-րդ հոդվածի 1-ին և 334-րդ հոդվածի 1-ին մասերով:
Ըստ առաջադրված մեղադրանքի` 2008 թվականի մարտի 1-ին և 2-ին Երևան քաղաքում տեղի ունեցած իրադարձություններից հետո Մարդու իրավունքների եվրոպական դատարանում ՀՀ կառավարության լիազոր ներկայացուցիչ, համատեղությամբ նաև 2006 թվականի մարտի 14-ից ՀՀ արդարադատության նախարարի տեղակալ, իսկ 2008 թվականի հուլիսի 2-ից՝ ՀՀ նախագահի օգնական Գևորգ Կոստանյանը և ՀՀ նախագահի օգնական, իսկ 2008 թվականի հուլիսի 2-ից՝ ՀՀ ոստիկանության պետի տեղակալ Գևորգ Մհերյանը ՀՀ նախագահ Ռոբերտ Քոչարյանի կողմից այլ անձանց հետ նախնական համաձայնությամբ կատարված առանձնապես ծանր հանցագործության՝ սահմանադրական կարգի տապալման գործիքներն ու միջոցները, ինչպես նաև հանցագործության հետքերը, այն է՝ 2008 թվականի մարտի 1-ին և 2-ին Երևան քաղաքում տեղի ունեցած իրադարձությունների ժամանակ ՀՀ ոստիկանության կողմից իրականացված անօրինական գործողությունները և ՀՀ զինված ուժերի հակասահմանադրական օգտագործման, այդ թվում՝ զինված ուժերի ծառայողների կողմից հրազենի ապօրինի գործադրման իրական հանգամանքները թաքցնելու և մարդու իրավունքների եվրոպական դատարանում ու միջազգային այլ կառույցներում տեղի ունեցածն իրավաչափ քողի ներքո ներկայացնելու խմբային շահերից ելնելով, ինչպես անձամբ, այնպես էլ այլ անձանց հետ հանցակցությամբ, չարաշահել են իրենց պաշտոնեական լիազորությունները, ՀՀ ոստիկանության մի խումբ բարձրաստիճան պաշտոնատար անձանց, այդ թվում՝ 2008 թվականի մայիսի 29-ից ՀՀ ոստիկանության պետ Ալիկ Սարգսյանի և սույն քրեական գործով նշված ժամանակահատվածում վարույթն իրականացնող մարմնի միջոցով կազմակերպել են նշված՝ առանձնապես ծանր հանցագործությունը նախապես չխոստացված պարտակելը՝ իրենց հանձնարարություններով ու ցուցումներով պաշտոնատար անձանց դրդելով պաշտոնեական լիազորությունները չարաշահելուն, պաշտոնեական կեղծիքների կատարման և ապացույցները կեղծելուն:

Հատկանշական է, որ վերոհիշյալ մեղադրանքն առաջադրելուց հետո, թե՛ նախկին ոստիկանապետ Ալիկ Սարգսյանը, թե՛ այն ժամանակ նախագահի օգնական Գեւորգ Կոստանյանը մամուլով սկսեցին իրենց ոչ միայն արդարացնել, այլ նաեւ ինչ որ տեղ հեգնական տոնով խոսել նախաքննությունն իրականացնող մարմինների հետ:

Մասնավորապես նախկին ոստիկանապետ Ալիկ Սարգսյանը, տարբեր լրատվամիջոցների հետ զրույցում ասել է. «Ամեն դեպքում, առաջադրված մեղադրանքը, հերյուրանք է, որն իմ հետ կապ չունի, ես առնչություն չունեմ այդ մեղադրանքի հետ, դա փաստ է, ինքներդ առաջիկայում դրանում կհամոզվեք: Հերյուրանք է, շոու, ճշմարտության բացահայտումը սարերի ետևում չէ», -ասել է Սարգսյանը: 

Գեւորգ Կոստանյանն էլ իր հերթին հանդես է եկել հայտարարությամբ՝ ժխտելով իր առնչությունը վերոհիշյալ գործին, եւ իր ոճին հավատարիմ մնալով, մասնավորապես ասել է. «Ցանկանում եմ հիշեցնել մեր ողջ իրավապահ համակարգին, որ նրանք, ովքեր իրենց գործունեության ընթացքում թույլ կտան կամ արդեն թույլ են տվել ապօրինություններ, անպայման կրելու են անձնական, քրեական և բարոյական պատասխանատվություն իրենց գործողությունների համար` օրենքի տառին համապատասխան»:

Թե ինչո՞վ է պայմանավորված սկանդալային ու աղմկահարույց պատմությունների մեջ պարբերաբար հոլովվող այս երկու ամենակարողների՝ Ալիկ-Սարգսյան-Գեւորգ Կոստանյան «դուետի» այստեսակ հայատարարություններն ու կրավորական կեցվածքը, NewsMedia.am-ը փորձեց ստանալ «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյան մեկնաբանությունը, ով նախ նկատեց.

-Անկեղծ ասած չեմ զարմանում. նրանց արադարացումները լսելիս: Պարզապես ո՛չ Ալիկ Սարգսյանի, ո՛չ Գեւորգ Կոստանյանի խիզախությունը, «տղամարդկությունը»

չի հերիքում, որ ասեն այո, մենք գործել ենք այդ հանցագործությունը, մենք փորձել ենք կոծկել մարտի 1–ին տեղի ունեցածը: Այդ մարդիկ չունեն խիզախություն, որպեսզի ընդունեն իրենց արարքները եւ ներողություն խնդրեն:

Առհասարակ, ես կոնկրետ Գեւորգ Կոստանյանին վաղուց լուրջ չեմ ընդունում,. նա մեկ ասում էր, որ որեւիցէ պարագայում Նիկոլի օգտին չեմ քվեարկի, հետո ասեց, որ միշտ Նիկոլի կողքն եմ կանգնած, ուղղակի ծիածաղելի է: Այն որ ինքը եղել գլխավոր դատախազ՝ դա դեռ չի նշանակում, որ նա լուրջ վերաբերմունքի է արժանի:
Իսկ Ալիկ Սարգսյանը ընդհանրապես… լավ դուք հանցագործություն կոծկող չե՞ք ընդամենը , էդ մարդը առանձնապես ծանրագույն հանցագործություն է կոծկել, այն էլ կազմակերպված:

Ն. ԱԴԱՄՅԱՆ

NewsMedia.am

Լուրեր Հայաստանից եւ Աշխարհից